اپریل ءِ براھدار ءُ درپشناکیں سُھبے، روچ ءِ برانز نوگلیں پُلانی گُما گوازی کنگ ءَ اَنت۔ باگ ءِ جھگیر سُھب ءِ سمین ءِ وشبوئیں کولاں خمار واب کُتگ۔۔۔۔۔۔۔۔۔۔۔۔۔۔
بلے من آہ۔۔۔۔۔۔۔منی زند تا انگت یک بے رژنیں گوربامے ءِ چھرگ ءَ جنت۔ بے برمش ءُ بے چاڑ۔۔۔۔ھمے وڑا کہ آسر اِتگیں پُلّانی تاک شِنگ ءُ شانگ بہ بنت۔۔۔۔۔۔۔۔۔۔۔
ترا چہ پد۔۔۔۔پہ منی چماں باگ ءِ براھداری ھُشک گندگ ءَ کئیت ءُ گوربام ءِ مھروانیں پیشانیگ گیمُرتگ۔۔۔۔۔۔۔۔۔۔۔۔۔۔۔۔
گیدی ءِ دِلبند ءَ رولہہ ءَ مانشانتگ ، روچ ایر روان اِنت ءُ ”فضا” پُر کیفیں چاڑے ءَ چاگرد کُتگ۔۔۔
ھر چیز زندگ مانیں لپرزگے ءَ گور جتگ، ھمے وڑا کہ گوات ءِ کول درچکانی لھمیں شاھاں چنڈین اَنت.......
بلے پہ من اے بیگاہ ھم، چو گُشئے ھزّام جت ءُ بے چاڑیں نیمروچے۔۔۔۔۔۔ اَنچو مارگ ءَ اوں کہ ٹال ٹال بد رنگی آنی تھا بُڈّگا انت۔۔ گیدی ءِ باگ بے رُژن ،،،،، ءُ پُل اُپّارگ ءَ اَنت۔۔۔۔۔۔۔۔۔۔
ترا چہ پد۔۔۔۔ من ءَ ھر وشی غم ءُ اندوھانی چاگردی گندگ ءَ کئیت ۔۔۔۔۔ ءُ مارشتانی چیھال پُرشت ءُ پروشیانی آماچ۔۔۔۔۔۔۔۔۔۔۔۔۔۔۔۔۔۔۔
نیلیں آزمان ءِ زر ءَ اِستال درپشگ ءَ اَنت۔ ماہ گوں زر ءِ چولاں لئیب ءَ اِنت، آئی ءِ رُژن پُر تاھیر اِنت ءُ ارواہ ساچ۔۔۔۔۔۔۔۔۔۔ پدا نہ زاناں پرچا ؟ من ءَ اِستالانی مراگش گیمُرانک ، ماہ ءِ زیبداریں پیشانیگ زرد چَک گِندگ ءَ کئیت ءُ شپ بے برمشیانی میتگ ءُ بے تاھیریانی ھنکین۔۔۔۔۔۔۔۔۔۔
ترا چہ پد۔۔۔۔۔ منی مارشتانی جزبگ لپاشگ بوتگ اَنت۔ نو بس یک بے سریں وجودے ءُ بے چاڑیں ارواھے ( پش کپتگ ) ، چو گنوکانی دیستگیں واب ءَ۔۔۔۔۔۔۔۔۔۔۔۔۔۔۔۔۔۔
..........................................................................................................
دِلگوش: خلیل جبران ءِ سیاھگانی رجانک ءَ لغوی رجانکاری ءَ ، بزاں لبزانی رند ءَ تچگ ءَ ابئید گیش ءَ چہ گیش بُنکی ھیال دیم ءَ کنگ بیتگ۔ دانکہ ھیال ءِ شررنگی ھم مہ پُرشیت ءُ بلوچی ءِ تب ءَ ھم بہ کپ اَنت۔ چوناھا کُجام یک زبانے بہ بیت آ وتی اسل رنگ ءَ رجانک کار ءَ نہ دنت۔ پدا لغوی رجانک وا گیشتر بد رنگ ءُ بے سوب بیت۔۔۔
