نا شرکاریں پاکستان،بلوچ پدریچ کُشی ءُ دنیا ءِ گناہگاریں ھاموشی نبشتہ کار: اختر ندیم بلوچ بلوچ راجی زُرمبش ءِ سوبمندی ءِ ھاترا آشوبی جُہدکاراں راجی جُہد ءِ تہالس مھلوکءِ ھوار کنگءُ راج ءِ ھر مردم ءَ یکین دیائینگ اولی کار اِنت کہ اے جنگ کہ سرمچار وتی ساہ ءِ پروا ہ نداران ءَ جنگ کنگ ءَ اَنت اے راجی ھپازت ءِ جنگ اِنتءُ اے جنگ ءِ سوبمندی مئے آوکیں پدریچ ءِ جوانیں زِند ءِ زمانت اِنت۔چوناہا سرجمیں دُنیا ءَ پاکستان ءِ سہروّیں کار بلوچ جُہدکارانی سوبمندیں سیاسی ءُ جنگی راھبنداں روچ ءِ پیم ءَ روشناس کُتگ۔بلئے اے بدماشیں استان دُنیا ءَ گُمراہ کنگ ءِ ھاترا لہتیں وتگڑیں بلوچ سردار ءُ مڈل کلاس ءِ مردماں وزارت ءُ زَر ءِ لبّ دیان ءَ بلوچ راج دوست پیش دارگ ءَ اِنت۔بلئے دُنیا زانت کہ بلوچ راج ءَ پاکستان ءَ گوں وتی ھر رنگیں سیادی پُروشتگ۔ءُ بلوچ راج نوں آجوئی ءِ جنگ ءَ ایوک ءَ منزل ءَ چارگ ءَ اِنت ،نہ کہ وتگڑیں وزارت ءُ لبّ ءُ پائدگ ءَ۔گوستگیں 10سال ءَ چہ گیش وھد اِنت بلوچ سرمچاراں ءُ آجوئی دوستیں سیاسی راھشون ءُ آجوئی لوٹوکیں سیاسی باسکاں وتی جان ندری پیش کنان ءَ آجوئی ءِ منزل ءَ را سک نزیک کُتگ۔اے جنجالیں وھد ءَ بلوچ یک سکّیں جناورانی پیمیں دژمنِ ءَ گوں دیم پہ دیم اِنت۔کہ وتی سرجمیں استانی زوراں کودکیں بلوچانی سرا کارمرز کنگ ءَ اِنت۔بلئے بلوچ سرمچار جنگی راھبنداں دیما ایر کنانءَ دژمنیں لشکر ءُ کارندگاں نشانگ جوڈ کنگ ءَ اَنت۔ھمے ھاترا یو این او ءُ سرجمیں شرپداریں دُنیا ءَ را لوٹیت کہ بلوچ راج ءِ ھلاپ ءَ جنگی گناہ کنوکیں پاکستانی نا شرکاریں استان ءِ سرجمیں لشکری،سیاسی ءُ سپارتی سیادیاں پُروشان ءَ ھر رنگیں مالی کُمک ءَ بند بکن اَنت۔پرچہ کہ شرپداریں راجانی لشکری ءُ مالی کُمک ءَ پاکستان بزّگیں بلوچانی ھلاپ ءَ کارمرز کنان ءَ بلوچ پدریچ کُشی ءِ زمّہ وار بوھگ ءَ اِنتءُ ھمئے کُمکی وسائل نا شرکاریءُ پرکہ واریت ءَ ودینگءِ ھاتراکارمرز بوھگ ءَ اَنت۔کہ سرجمیں دُنیا ءِ ایمنی ءِ ھا ترا نیکیں گامگیجے نہ اِنت۔پاکستان کہ یک در مُھکمیں اِستانے بوھگ ءِ ھوری ءَ سکّیں بے زمّہ واریں اِستانے۔کہ نا شرکاری،پرکہ واریت،بے ایمنی ءُ کرپشن استان ءِ نیمگ ءَ چہ بُرز روگ ءَ اَنت۔پاکستان ءِ وتی لشکری زانتکاراں پاکستانی لشکر ءَ را دُنیا ءِ کرپٹ تِریں لشکر گُشتگ۔بلئے اپسوز اِنت کہ اے کرپٹیں لشکر ءِ دست ءَ دُنیا ءَ تباہ کنوکیں ایٹم بمب ءُ نزاناں چنچوں کیمیکل ءُ بیالوجیکل سلاہ اَنت۔اِشی ءِ متلب اے بوت کہ دُنیا شورہانی جُمپ ءِ سرا نندان ءَ شورہ ءَ ریموٹ کنٹرول ڈیوائیس ءَ چہ ڈیٹونیٹ کنانءَ ریموٹ کنٹرول ءَ یک لُچّیں گونڈوِ ءِ دست ءَ دیان ءَ وتی تباہی ءِ ندارہءَ چارگ لوٹیت۔ مروچی دُنیا بلوچ پدریچ کُشی ءِ ھاموشیں تماشائی ءِ کردءَ کنگ ءَ اِنت بلئے اے وڑ مہ بیت کہ باندا یورپ ءُ امریکہ ءَ ھوار سرجمیں دُنیا ءِ بازاراں داکتر کدیر ءِ ایٹم بمب بہا بہ بنت۔ھما وھد ءَ مروچیگیں آلم ءِ ہست ءُ نیستاں پشومانی بہ بیت۔ما دُنیا ءَ اے گُشگ لوٹاں کہ مروچی اے آس کہ پاکستان ءَ بلوچ ءِ کُڈکانی سرا جتگ۔اگں اِشی ءِ گِر ءُ دار نہ بوت گڈا اِشی ءِ برانز سرجمیں دُنیا ءَ وتی تہا پتاھیت گُڑاں نہ کہ واجہی ماڈی پشت کپنت ءُ نہ کہ آزمان ءَ گوں گپ کنوکیں ٹاور ءُ ماڈی۔دُنیا وھدے شام ءَ بشرالاسد ءِ رجیمءِ ھلاپ ءَ شامی بُنیاد دوستیں ناشرکاران ءَ ما لی ءُ لشکری کمک کت کنت کہ آئی سیم ءُ سند گوں القاعدہءَ بستگ اَنت، گُڑاں بلوچ کہ سیکولر آشوبی اَنت ،آہانی کمکءَ چیا بیمءِ آماچ اَنت؟بلوچ کہ یکیں وھدا پاکستان ءُ ایران ءِ وڑیں دو بنیاد پرستیں اِستان ءَ گوں دیم پہ دیم اِنت ۔بلوچ جُہدکارانی پلّہ مرزی کنگ ءَ نہ ایوک ءَ بزگّیں بلوچ پاکستانی استانی نا شرکاری ءَ چہ رکّیت بلکیں چہ اِشی ءَ میاں اُستمانی ایمنی ءَ تباہ کنوکیں نا شرکاری ءِ پکٹری(کارخانہ) ھم بند بنت کہ پاکستانی استانی شاباشی ءَ چہ سرجمیں دُنیا ءَ ناشرکارءُ وتکُشیں بمبار دیم دیئگ ءَ اِنت۔پاکستان ءِ مزنیں اھوالکار ھامِد میر ءَ اے ھال داتگ کہ جنرل کیانی ءِ دیما وھدے ھما وھد ءِ ڈی جی آئی ایس آئی جنرل پاشا ءَ اھوالکارانءَ گُشتگ کہ مُلّا پزل اللہ ءُ بیت اللہ مھسود مئے اولی کتارءِ مردم اَنت۔ اسامہ بن لادن ءَ امریکہ ءُ اوگانستانءَ راجنگ ءِ آسءِ زْرابءَ دوردئیان ءَ ھزاراں امریکی لس مہلوک ،لشکر ءِ کارندگ ءُ اوگان ءِ اُلس ءِ گران بہائیں جاناں گوں ھون ءِ لیب کُتءُ وت پاکستان ءِ ہاسیں لشکر ی ہنداں نشت ءُ ندارہ چاران ے کُت۔۔بلئے سد اپسوز ءِ گپ اِنت کہ درستیں کاراں چہ سرپد بوھگ ءَ ابید ھم دُنیا ہا اے اُمیت داشتگ کہ پاکستان ناشرکاریءِ ھلاپ ءَ کاروائی کنت۔ھما استان کہ نا شرکاری ءَ چہ دُنیا ءَ بلیک میل کنان ءَ مال گِرگ ءَ اِنت گڈا آئی ءَ دُنیا ءِ ایمنیءَ گوں چے کار بوت کنت۔اگن میاں اُستمانی بردال دُنیا ءَ را ایمن جوڑ کنگ لوٹیت گڈا آئی ءَ اے دمگ ءَ ڈالچار کنگ نہ لوٹیت ءُ دمگ ءِ زمینی ھقائکاں دیما ایر کنان ءَ اے جاہءِ بُنجاہی جامنندانی لوٹ ءَ را ہشکنگ لوٹیت۔بلوچ ھچ توسیع پسندیں لیکہ ءِ ھمایت ءَ ھم نہ کنت۔ءُ اے دمگاں نندوکیں سرجمیں راجانی سیاسی،دودمانی ءُ روایتانی کدر ءَ کنت۔ءُ ہنچو کہ بلوچ بلوچستان ءِ آجوئی ءُ بلوچ راج ءِ وش ھالی ءِ ھاترا جُہد کنگ ءَ اِنت۔ھمے وڑا اے دمگاں نندوکیں سرجمیں راجانی سیاسی،دودمانی ءُ روایتانی کدر ءَ کنت۔ءُ ہنچو کہ بلوچ بلوچستان ءِ آجوئی ءُ بلوچ راج ءِ وش ھالی ءِ ھاترا جُہد کنگ ءَ اِنت۔ھمے وڑا اے دمگاں نندوکیں پشتون،سندھی ءُ پنجابیانی ھم رژنائیں باندات ءِ لوٹوک اِنت ، بِلّے تُری ہمے راج بلوچانی کُشت ءُ کوش ءَ ھاموش اَنت۔اے استان ءِ چالاکیں حاکم اے دمگاں نندوکیں راجانءَ گوں وتی بازیں پندلاں وت ما وتءَ جیگ ما جیگ کنائینتگ ءُ وت آسراتی نشتگ اَنت ۔بلوچ،سندھی ءُ پشتون مروچی دُنیا ءِ سیرتریں دمگ ءِ واھُنداَنت بلے مہاجرانی زند گوازینان ءَ شام ءِ نان ءَ مُھتاج اَنت۔اے دمگ ءِ راجاں لوٹیت کہ آ جاورانی جوانیں گِر ءُ دار بہ کننت ءُ وتی آوکیں پدریچ ءِ وشّیں باندات ءَ مھکم ءُ نہ دائمی وشی ءِ ھاتراہوریں دژمن ءَ پجّا بیاراں۔ زِرباری ایشیا ھال ءِ اھوالانی رِد ءَ دُنیا ءِ دُرستاں چہ مستریں 5چاندی ءُ سُہر ءِ انبارءَ چہ یکے بلوچستان ءَ اِنت۔دُنیا ءِ دُرستاں چہ مستریں تیل ءُ گیس ءِ reserves بلوچستان ءَ اَنت۔پاکستان ءَ کینیڈین کمپنی ( (THETHEYAN COPPER COMPANYءَ را ریکوڈکءَ سُہر ءُ تابنہ کشگ ءِ ٹیکہ داتگ،کہ ھودا کساس500 بلین امریکی ڈالرءِ مالیتءِ سُہر ءُ تانبہءِreserves اَست اِنت اِشی ءِِ بدلءَ پاکستانءَ را سالءِ سرا 106 ملین امریکی ڈالر رسگءَ اِنت ۔ایشی مُزءَ پاکستانءَ ہمے دمگ ءَ ایٹمی تراک کنان ءَ ادءِ جاہ منندانءَ ایٹمی تابکاریاں چہ ودی بوتگیں ساہ گروکیں نادرائی ءِ سوگات دات۔بلوچ سرڈگار دیمپانی ءُ بیپاری بِستار ءَ ھم دُنیا ءِ ھاترا سکّ اہم اِنت ءُ اے چیزانی ارزشت ءِ پدا میاں اُستمانی برادلاں لوٹیت کہ بلوچستان ءِ آجوئی ءِ جُہد ءَ منزل ءَ سر کنگ ءِ ھاترا بلوچ جُہدکارانی سیاسی ءُ جنگی کُمک ءَ یکینی جوڑ بکننت دانکہ جہان ءِ راجانی میان ءَ وتی پہازگ ءِ تب دیمروئی بکنت۔