”زن و پیر مرد و کودک نماند”

اگاں راج ءَ گار ءُ بیگواہ کنگ لوٹ ئے تہ آئی ءَ چہ وتی گوست ءَ سِند، راج چہ وتی گوست ءَ چون سدیت؟ اے چوشکہ آئی ءِ ماتی زبان ءِ سرا ارش بہ کن، ماتی زبان ءِ دیمروئی ءِ ھر تکاں بند بہ کن۔

پہ بلوچ راج ءِ گار ءُ بیگواہ کنگ ءَ ھر دؤر ءُ ھر زمانگ ءَ عھد ءِ زوراکاں پندل سازتگ۔ بلوچ راج ءِ ورناہ پہ وتی ماتیں گُلزمین ءُ ماتی زبان ءِ پھازگ ءَ ھر دؤر ءَ ھمے قبضہ گیرانی دیمگیری کُتگ ءُ وتی گھگیریں سر ندر کُتگ اَنت۔ اے ایردستی انوگیں شست ءُ پنچ سال ءِ پنجابی یے تھنا نہ اِنت۔ بلوچ یک انچیں پُرگنج ءُ مال ءُ مڈی ءَ چہ چکاریں گلزمینے ءِ خُدا بند اِنت کہ ھر عھد ءَ ھر زوراک ءَ ھمے زمین وتی چمانی چیر ءَ کُتگ۔ آ بلوچ ءِ گار ءُ بیگواہ کنگ ءُ اے گلزمین ءَ وتی دست ءَ آرگ ءِ سراپا بیتگ اَنت۔ عرب بہ بنت یا فارسی یا دگہ دیر ءُ دراج ءِ زوراک۔۔۔۔ بلے بلوچ راج یک انچیں شاھگانیں زبان ، تہذیب ءُ تاریخی یے خدا بند اِنت کہ ھچ زوراک ءَ بلوچ ءِ پجار ءُ نشان گار ءُ بیگواہ کُت نہ کتگ اَنت۔ آھاں بلوچستان ءِ سرا قبضہ کُتگ ءُ بلے ابئید ءِ بلوچ ءِ گار ءُ بیگواہ کنگ ءَ بلکیں بلوچ ءِ ھمے عظیمیں تہذیب ءِ تھا گار ءُ بیگواہ بیتگ اَنت۔ بلے بلوچ تاں ھزاراں سالاں ھمے گلزمین ءِ سرا نشتگ، آئی ءِ پجار تہ انگت ھما اِنت پیش ءَ بیتگ۔ آئی ءَ وتی ماتی زبان برجاہ داشتگ۔ نو پنجابی ھم اے وش گُمانی ءَ مہ بیت کہ من اے راج ءَ گار ءُ بیگواہ کناں، او ناکہ مئے بلوچیں برات اے ترس ءِ آماچ بہ بنت کہ پنجابی مئے راجی پجار ءَ گار ءُ بیگواہ کنت۔ او ناکہ مئے تاریخی بستار گوں کینیڈا ءِ ”فرنچ اسپیکنگ” ءُ آئرش مھلوک ءَ گوں ھمدپ بیت کنت۔ بلوچ یک انچیں پجار ءُ زبانے ءِ وارث اِنت کہ بلوچ ءِ گار ءُ بیگواہ کنگ پد نبودیں ھیالے۔۔۔۔۔۔۔۔

بلے مرچیگیں زوراک ءِ ارش کمے ترند تر اِنت۔ ایشی ءَ مستریں ارش مئے زبان ءِ سرا کُتگ۔ زوراک ءَ مئے ماتی زبان ءِ ایردست کنگ ءَ وڑ وڑیں پندل سازتگ۔ دگہ دری زبانے مئے سرا پہ زور مُشگ بیتگ۔ اے یک انچیں زبانے کہ مئے تب ءَ گوں ھچ سیادی نہ داریت۔ دُژمن ءَ مئے چاگرد ءَ یک انچیں تبے ردوم داتگ کہ مئے ھما ورناہ کہ وت ءَ راجدوست گُشنت ، آ ھم ماتی زبان ءِ سرا اینکہ دلگوش دیگ ءَ نہ اَنت۔ دانکہ واجہ ناگمان گُشیت ” آ کس کہ زبان دوست مہ بیت راج دوست بیت نہ کنت” ھما پمفلٹ ءُ سیاھگ کہ راجدوستیں گلانی نیمگ ءَ شنگ کنت بنت، دژمن ءِ زبان ءَ نبشتہ کنگ بنت۔ سائٹ ءُ چاگردی کُڈکاں گیش ءَ چہ گیش دُژمن ءِ زبان ءَ نبشتہ کنگ بیت۔ پمیشا چوشیں سیاھگ راج زھگانی ذھن ءِ سرا اثر دؤر دات نہ کن اَنت۔ نواب اکبر خان ءَ لوٹ اِت کہ من ھمے اردو ءِ تب ءَ ھتم بہ کناں ءُ ماں بلوچستان ءَ بلوچ زھگاں بلوچی وانینگ بہ بیت۔ آئی ءَ اے کار کُت ھم ، بلے دُژمن ءَ تور اِت۔ دُژمن ءَ لھتے وتگڑیں راجدوستانی کمک ءَ نواب صاحب ءِ اے واھگ گُٹگیر کُت۔ ھمے وتگڑیں سیاسی ”للی پوتین” اں ھمے گپ دیم ءَ آؤرت کہ نواب ءِ شون داتگیں رھبند ءِ کتاب بگٹی ءُ مری گالوار ءَ نبشتہ بیتگ اَنت، پمیشا اے راج دُژمناں اردو دوست بوت، بلے بگٹی ءُ مری گالوار دوست نہ بوت۔ بلے دژمن ءُ آئی ءِ کاسگ چٹاں کہ یک گپے زانگ لوٹیت کہ بلوچ ھما زبان ءِ خدابند اِنت کہ اے زبان ھچ زوراک ءَ گار ءُ بیگواہ نہ کُتگ۔ پنجاب ھم بے سوب بیت۔۔۔۔۔

گُڈا من امریکی سنیٹر واجہ ”ڈینا روھراباکر” سلام دیاں کہ آئی ءَ بلوچ ماتی زبان ءِ ارزشت مارتگ ءُ آئی ءَ ھمے گپ ءِ نشوندھی کُتگ کہ پہ راج زھگانی سیاسی ءُ چاگردی سنچ ءِ دیمروئی ءَ ماتی زبان ءِ مزنیں بستارے۔ آئی ءَ گُشتگ پہ بلوچ ءَ بائد بلوچی زبان ءَ ھال شنگ کنگ بہ بیت۔ واجہ ڈینا روھراناکر ھم بائدیں بلوچی زبان ءِ دیمروئی ءِ ھاترا کار کنوکانی سرپ ءَ جاگہ دیگ بیت۔