چار سد ءُ ھشتاد سال پیش مسیح ءَ ایرانی بادشاہ کیخسرو ءَ یونان ءِ سرا ارش کنگ ءِ ھاترا دوازدہ سد آپی جنگی گرابانی لشکرے دیم دات۔ اے ارشانی دیمگیری ءِ ھاترا پہ شور ءُ سلاہ ءَ یونانیاں شھری ریاستانی جھگیرانی یک مراگشے لوٹائینت۔ اے درگت ءَ شور ءُ سلاہ بوت کہ ایرانی ارشانی دیمگیری چتور ءُ چون بہ بیت۔ مراگش ءَ باز ءَ ھمے سوڑگ دات کہ ایرانی لشکر ءِ دیما سلاہ چگل دیگ بہ بنت ءُ ایران ءِ فرمان منّگ بہ بیت۔ وھدیکہ بازیں جھگیراں ھمے سوڑگ دات کہ یونانی ھمینکہ نزور بہ بنت، بلے مارا وتی پت ءُ پیرکی مُلک ایران ءِ دست ءَ دیگی نہ انت ءُ ایران ءِ لشکر ءِ ھلاپ ءَ جنگ کنگی انت۔ ما درست سرگڑ بہ بئیں بلے وتی ڈیھ ءَ ایران ءِ دست ءَ نہ دئیں ءُ اگاں ما سرجم کُشگ بہ بئیں۔۔
اے ردا یونانیاں وتی وھد ءِ رسم ءُ دودانی ردا وتی عرض ’’ڈیلفی‘‘ ءِ ’’غیبی آواز‘‘ ءَ بُرت۔ ڈیلفی ءِ مسیت ءَ نشتگیں مُلا ءَ پھکیں چات ءَ آپ ورگ ءُ پھکیں درچک ءِ تاکانی جائگ ءَ پد آھاں ھمے سوڑگ دات کہ ’’تراشتگیں دیوالانی‘‘ سرا بھیسہ کنگ بہ بیت۔ بلے مُلا ءَ اے راز نہ ڈس ات کہ تراشتگیں دیوالاں آئی ءِ مول ءُ مراد چی اِنت؟
بلے یونانی لشکر ءِ سرخیل ءُ رھشون واجہ تھیمسٹو فلیز ءَ بازیں چار ءُ بچار ءَ رند ھمے توجیل دیما آورت کہ چہ تراشتگیں دیوالاں ڈیلفی خدا ءِ مول ءُ مراد آپی جنگی گُراب اَنت۔ پمیشا یونانیاں وتی ’’ڈیلفی‘‘ ءِ پاکیں خدا ءِ گُشگ ءِ پدا جنگی آپی گُرابانی وسیلت ءَ ایرانی لشکر ءِ ھلاپ ءَ جنگ دات ءُ اے جنگ ءَ ایرانیاں پروش وارت ءُ یونانی سوبین بوتاں، پہ یونانیاں آھانی ماں اے جنگ ءَ سوب مندی ءِ مستریں وجہ آھانی مندر ڈیلفی ءِ خدا ءِ داتگیں توجیل اَت۔ بلے پہ راستی اے سوب مندی ءِ مستریں سوب یونانی رھشون ’’تھیمسٹو فلیز‘‘ اَت کہ آئی ءَ خدا ءِ داتگیں توجیل ءَ راستیں تعبیر دات ءُ جنگ ءَ سوبین بوت۔
پاکستان ءَ 1948 ءَ بلوچستان ءِ سرا بیڑ آورت، بلوچ روچ ء مروچی غلام اَنت۔ بلوچ اینکہ وھد ءُ مدت ءَ پد چیا غلام اَنت؟ ایشی ءِ سوب دو بنت۔ یا وا بلوچانی خدا چو یونان ءِ ڈیلفی ءِ مسیت ءِ خدا ءَ ایماندار نہ اِنت ءُ آھاں تچکیں رھبند نہ ڈس ایت یا بلوچانی ’’تھیمسٹو فلیز‘‘ آنی تھا آ بود ءُ قابلیت نیست اِنت کہ غیبی آواز ءِ توجیل ءَ راستیں تعبیر ءُ ڈائریکشن دات بہ کن اَنت۔
