روایت کِشیں بالاچ

بالاچ ءِ دہ یا دوازدہ سالئیں جنگانی کِسّہ ءَ دیما برگ ءَ پیش،بالاچ گورگیج ءِ بابت ءَ لھتے پاد اَتگیں جُستانی بابت ءَ زانت  ءُ  نبشتہ کنگ ھژدری اِنت۔ اے ردا مستریں جُست ھمے پاد کئیت ءُ مرچیگیں وانندھیں ورناھیانی پول ءُ جُست ھمیش اِنت کہ بلوچ تاریخ ءِ تھا بازیں میارجلیں سر گوستگ اَنت کہ  آھاں پہ میارانی ھاترا یا وتی ننگ ءُ شرپ ءُ ڈگار ءِ پھازگ ءَ وتی گھگیریں سر داتگ اَنت کہ ایشانی تھا میر قمبر بنتی، میر حمل کلمتی ، میر دودا گورگیج﴿بالاچ ءِ برات﴾ ءُ دگہ ،  بلے ایشانی تھا درستاں چہ گیش مرد کُش ءُ برات کُشیں بالاچ ءَ چیا نام کَش اِتگ، پہ بلوچ ءَ بالاچ چیا سمبل اِنت۔ بلوچ چیا ہر گھگیر ءُ سرمچار ءَ پہ بالاچ نام دَنت؟ 

میر حمل کلمتی ءِ جنگ پہ بلوچ ڈگار ءُ زر ءِ پھازگ ءَ بیتگ، آئی ءَ پہ بلوچ زمین ءُ راجی ننگ ءِ پھازگ ءَ وتی سر داتگ۔ قمبر پہ میاراں مُرتگ، پہ بلوچ ءِ ننگ ءِ پھازگ ءَ زوراک ءِ ھلاپ ءَ جنگے کُتگ، یاکہ دودا گورگیج۔

یا بلوچ راجدپتر ءَ دگہ بازیں  بھادر ءُ دلیریں سر گوستگ اَنت۔ بلے پہ بلوچ ءَ بالاچ چیا نشانے، سمبلے، 

دومی  بازیں کَس بالاچ ءِ برات کُشیں جنگانی پُژدر ءَ ھمے سوال ءَ چِست کنت کہ مرچیگیں پہ وتن شھید بیتگیں راجی سرمچاراں گوں بالاچ گورگیج ءَ ھمدرچ کنگ، پہ بالاچ نام دیگ، بالاچ مری ءَ گوں بالاچ گورگیج ءَ موازنہ کنگ ، مزنیں ناانصافی ءُ بژن ءِ گپے۔۔۔  ھمے ھیال ءُ لیکہ اَنت کہ بالاچ گورگیج ءِ بابت ءَ بازیں سوال چست کن اَنت۔ پمیشا اے بابت ءَ تران کنگ ءُ اے جُستانی گیشّینگ ھژدری اِنت۔

اے درگت ءَ اگاں ما بلوچ راجدپتر ءَ چماں شانک بدئیں تہ مارا بازیں جُستانی پسہ رسیت۔  میر حمل بہ بیت یا میر قمبر، رندانی لشکر ءِ ٹوھیں جنگول ملک میران بہ بیت یا چاکر ءُ گوھرام، میر نصیر خان ءَ تاں سرمچاریں نواب اکبرخان ءُ بالاچ مری یا  اے ردا دگہ بازیں گھگیر  ءُ بہادریں سرگوستگ اَنت۔ اگاں ما اے سرجمیں کرداراں گوں بالاچ ءَ تور بہ کنیں ءُ بچاریں تہ ھمے راستی دیمءَ کئیت کہ بالاچ گورگیج بلوچ راجدپتر ءِ اولی سر اِنت کہ آئی ءَ بلوچی لبزانک ءُ ربیّت ءُ دودمان ءِ سرا وتی نکش اِشتگ اَنت، اے ردا دگہ کس اے اسٹیج ءَ سر نہ بوتگ۔بُرز ءَ نام داتگیں کرداراں کس ءَ اینکہ بلوچ راجمان ءُ لبزانک ءُ روایتانی سرا وتی اثر دور دات نہ کُتگ کہ  بالاچ ءَ آ اثر دور داتگ اَنت۔عامیں بزانت ءَ ما ھمے گُشت کنیں بلوچ راجدپتر ءِ تھا بالاچ گورگیج اولی کس انت کہ آئی ءَ روایت پروشتگ انت ءُ نوکیں روایت ءُ ربیّت ردوم داتگ انت۔ بلوچی لبزانک بہ بیت  کہ راجی زند ءُ دودمان آ چہ بالاچ ءِ روایت پروشی ءِ عملاں نہ رک اِتگ اَنت، بالاچ ءَ راجی زندمان ءِ  بازیں تکانی سر اینکہ وتی اثر دور داتگ انت، دگہ کسانی کارے نہ بیتگ۔بلوچی ادب ءُ شاعری ءُ دودمان ءِ تھا اے شعری ترکیب ءُ ھیال، جوڑشت ءُ شعری سنچ بالاچ ءَ ردوم داتگ انت کہ

بلوچی لبزانک ءُ شاعری ءِ تھا  چوشیں شعری ترکیب ءُ ھیال بالاچی داتگیں بھر اَنت کہ بلوچی لبزانک ءُ  دودمان ءِ بھر جوڑ بیتگ اَنت۔ بلوچی دودمان ءُ ربیّتانی سرا بالاچ ءَ وتی اثر تاں ھمے حد ءَ دور داتگ کہ چدو ءُ پیش پہ بلوچ ءَ شپ جنگی، چیر جنگی ٹوھیں عیبے زانگ  بوتگ۔ بلوچ ءَ دژمن کُشگ ءَ پیسر توار پِر جتگ۔ چد ءُ پیش ھمیش بلوچ ءِ روایت ءُ دودمان ءِ بھر بیتگ اَنت۔ ھچ کس ءَ مجال نہ بیتگ کہ چُشیں روایتاں سر گوز بہ کنت، اگاں ناں شگانی بیتگ،بلوچ تاریخ ءِ تھا چوشیں روایت پروش ایوک بالاچ بیتگ کہ آئی ءَ روایتانی سرا نوکیں روایت کِشتگ ءُ سبزینتگ،

اے ردا ما ھمے کُشت کنیں ، آ کس ءَ کہ بلوچ راجی زند ءُ دودمان ءِ سرا درستاں چہ گیش وتی اثرات  ءُ رنگ دور داتگ ءُ منارینتگ اَنت، آ بالاچ گورگیج اِنت۔پمیشا بلوچ راجدپتر ءِ بالاچ ءِ یک جُتائیں بستارے ءُ بالاچ تاریخ ءِ مستریں نام انت۔  آ نام بالاچ اِنت کہ مرچیگیں راجی غلامی ءِ زند ءَ بلوچ ورناہ چہ بالاچ ءِ جنگی  تیکنیک ءُ سائنسی رھبنداں نپ چست کُت کنت ءُ غلامی ءِ لوپ ءَ وتی گردن ءَ سِست ءُ دور دات کنت، بصورت دیگر اے  اٹامک عہد ءَ آزادی ءِ ھیال پدنبودیں ھیالے۔۔۔