وھدے  چارٹر آف لبریشن واجہ خیربیار مری ءَ پیش کُت، ما ھمے سرپد بوتیں کہ اے جوانیں گامگیجے پہ بلوچ راج ءِ ھاترا۔۔۔۔ اے چارٹر بلوچ راجی جُہد ءِ بابت ءَ یک جوانیں سرپدی  ئے دات ءُ کُلیں آزادی لوٹوکیں گلانی یک مشت کنگ ءَ سوب مند بیت کنت۔

چارٹر آف لبریشن ءِ وانگ ءَ چہ پد ما ھمے سرپد بیتیں کہ اے چارٹر پہ جہد آزادی ءِ ھاترا یک روڈ میپ  ئے ، پہ جہد آجوئی ءِ منزل ءِ  سر بیئگ ءُراھانی گیش ءُ گیوار کنگ ءَ یک رُژنائی ئے، پہ بلوچ راج ءَ۔۔۔۔ او اگاں دری راجے بلوٹیت تئی جہد ءِ بابت ءَ  سرپد بیت، اے درگت ءَ چارٹر آف لبریشن ءَ جوانیں وڑی ءَ ، رنگ ءُ دروشمی ءَ بلوچ راجی جنز ءِ گیش ءُ گیوار کنگ بیتگ کہ اے جہد ملائی، دینی، یا دگہ تنگ نظر جہدے نہ انت ءُ میان استمانی لوٹ ءُ گزرانی مطابق انت۔ اے ھم پدر انت مئے جہد سرداری، نوابی جہدے نہ انت، یک ترقی پسند ءُ سیکولر جہدے کہ ہر قوم ءُ ہر مذھب ءِ مردم ماں بلوچستان ءَ جہہ منند انت،  چارٹر آف لبریشن آھانی حق ءِ زمانت انت۔ انسانی حق، زالبولانی حق، زھگانی حق، اقلیتانی حق ءُ ہرکس ءَ وتی وتی دین ءُ مذھب ءِآزادی ءِ حق ھست انت۔ ہرکسی حق محفوظ انت۔

واجہ خیر بیار ءَ اے ھم گُوشتگ ات کہ اے چارٹر آزمانے کتابے نہ انت۔ اگاں کسی بدلی سدلی کاریت، من ہرکسی شور ءُ سلاھانی رھچاراں، او بدلی ءِ گنجائش ھست۔

صرف دو رھبند ءِ سرا بدلی بیت نہ کنت

1.Freedom

2.One man one vote

باقی کُلیں چارٹر ءِ سرا بدلی آرگ ءِ گنجائش ھست انت۔ یا آرگ بیت کنت۔ ہرکس وت یشور ءُ سلاھاں پہ ما دیم بدنت۔ کم ءُ گیش سالے ءِ بے تواری ءَ پد اناگت ءَ چارٹر ءِ بابت ءَ گپء ُ تران ترند ترند ءَ بندات بیت۔ لھتے بے سر ءُ بنیں نبشتانک چہ درباری نبشتہ کارانی نیمگ ءَ چاپ ءُ شنگ بوت انت۔ بے سر ءُ بنیں زبان، پد گشی، بد گشی، ملنڈی، کپتگیں زبان کارمرز کنگ بوت۔ بلوچی سیمسراں چہ ڈن درکپتاں۔ اے درباری نبشتہ کاراں مورے ، مزارے کُت ءُ مزارے کدء مورے، شیری روباھے کُت ءُ روباھی کد ء شیری، پوڑے کلاتے کُت ءُ کلاتے پوڑے، وتی چانیگ ءِ ھاترا بلوچ ءِ کٹء ُ نپانی ھچ پردگ نہ کُت۔ بلوچ تپاکی ءُ یکجاھی ءِ تاوان دیگ ءِ جہد کُت۔وڑ وڑیں بھتام ءُ ایلنگی پہ یک دومی ءَ بندگ بیت انت۔

بلے کُلیں سرپد ءُ ایماندار ءُ مخلصیں جہدکار ایشانی اے عملاں پدرد ءُ بژنیگ کُت انت۔

ایشاں لیڈرشپ ءِ نزیک کنگ ءِ بدل ءَ یکے دومی ءَ دیر برگ ءِ جہد کت۔ لھتے پہ زانت ءُ لھتے پہن نزانتکاری ھمے کارا ھوار اَت۔

 پمیشا بلوچاں گُشتگ 

1973 ءَ نیپ ءِ بلوچ لیڈرانی تھا بے اعتمادی پیدا کنگ ءِ اولی سواب زمرد خان بوت۔ زمردخان ءِ یک کچلیں دانکےبلوچ لیڈرانی تھا بے اعتمادی پیدا کنگ ءُ پُرشت ءُ پروشانی سواب بوت۔ پدا مرچی زمرد خاناں ھما داسپان  بندات کُتگ انت۔ آزادی لوٹوکیں گلانی تھا وھدے بے اعتمادی ودی بیت، گڑا گل پُرشت ءُ پروش ءِ نیمگ ءَ رونت۔ مرچی پدا لھتے درباری نبشتہ کاراں چو زمرد خان ءَ وڑا وتی قلم چو کارچ ءَ تیز کُتگ ءُ زبان چو زھم ءَ۔۔۔۔نزانتکاریں نبشتہ کاراں اے نہ زانت کہ ر اہ ءُ رھبندانی گیش ءُ گیوار پہ گپء ُ تران بیت۔ نند ءُ نیاد بیت۔ یکے دومی ءِ گوشدارگ، یکے دومی ءَ سرد بیئگ ءُ کنگ، مھر ءُ دوستی ءُ تپاکی ءَ اڑ ءُ جنجالانی گیش ءُ گیوار بیت۔ھمے عمل بلوچ راج ءَ تپاکی ءِ منزل ءَ سر کنت۔

پہ تژن، سوچاکیں دانک، یکے دومی ءَ ایر جنئگ، راج دژمن گُشگ، غداری ءِ سرٹیفکیٹ دیگ ءَ جنجالانی گیش ءُ گیوار نہ بیت۔ بلوچی راجی سروکانی ایمانداری ءِ سرا کس ءَ شک نیست۔ خیر بیار بہ بیت، براھمدگ بگٹی بہ بیت، خان آف کلات بہ بیت، جاوید مینگل بہ بیت، مھران بلوچ بہ بیت یا ڈاکٹر اللہ نظر ءُ ایدگہ سروک بہ بنت۔ لیڈرشپ چہ شک ءَ بالاتر انت۔ بلے بازیں وھد ءَ طریقہ کار ءِ سرا گپء ُ تران بیت۔اگاں کسی یک دومی ءِ طریقہ کار ءِ سرا ایراد بہ گیپت۔ ایشی ءِ متلب اے نہ انت کہ پگر بھر ءُ بانگ انت۔ پگر کُلانی یک انت۔ او مئے شھید ءُ سرمچارانی پگر انت۔ کُلیں بلوچ راج ءِ لوٹ انت۔ طریقہ کار ءِ سرا پہ گپء ُ تران گیش ءُ گیوار بیت کنت۔

پہ ز بریں دانک ءُ بیھار ءَنہ بیت۔ اگاں ما وتی گوستگیں جہداں بچاریں گُڑا اے الم ءَ گندگ ءَ کئیت کہ ھمے وڑیں عملاں مارا باز تاوان بار کُتگ، بلوچاں گُشتگ کہ

بلوچ ءِ مستریں سلاہ راجی تپاکی انت۔ پہ آجوئی ءِ جہد ءِ ھاترا کُلیں آشوبی گلانی تپاکی پکار انت۔ ما  مروچاں گندیں کہ ھما پارلیمنٹ پرستاں سک گل کُتگ کہآ زادی لوٹوک وت ماں وت گر ءُ ریس انت۔ بلوچ راج ءِ سر بتگ کنگ ءَ ھاترا ھمے پندل ءَ دیما  کارنت کہآ زادی لوٹوک وت ماں وت ءَ تپاک نہ انت۔ گڑا بلوچ راج ءَ چون تپاک کن انت۔ دژمن مدام وھد ءُ پاس چاریت۔ ما دژمن  ءَ دست ء وت تمرد مہ کنیں، موہ مہ دئیں کہ مئے راج دوستانی ھلاپ ءَ مورچہ زنبہ بیت۔

بلے مروچی آ وڑ نہ انت، بلوچ ایشانی پندلاں سرپدانت۔ مروچی جاور ھم آ نہ انت۔ جہد ہر کسی دیما انت۔ مروچی شھیدانی ھونانی برکت ءَ  ، او سرمچارانی جہد اں راج شر سرپد انت کہ کئے دژمن ءُ کئے دوست انت۔ راھانی ھم گیش ءُ گیوار بیتگ انت۔ من گوں کُلیں بلوچ سروکاں دزبندی کناں کہ اے چارٹر آف لبریشن ءَ ایشو ئے جوڑ مہ کننت۔ ایشی ءَ بابت ءَ بہ نند انت ءُ سسّا ءُ پگر بہ کناں۔ یکے دومی ءَ گوش بِدارَنت۔ یکے دومی ءَ برداشت بہ کن انت۔ اوپار ءُ صبر ءِ دامن ءَ شاھگان بہ کن انت۔ گوں تپاکیءَ چارٹر ءَ منظور بہ کن انت بلے اگاں کسیء َ چارٹر ءِ بابت ءَ تحفظات ھست، گڑا آ غدار گُشگ مہ بیت، ھما تحفظات ئے کہ ھست انت، دور کنگ بہ بیت۔اے جہد کُلیں بلوچ ءِ جہد اِنت۔ خدا مہ کنت، خدا مہ کنت اگاں اے جہد دُژمن ءِ ھرجان بوت، گڑا بلوچ ءَ دگہ سدسال انتظار کنگ لوٹیت۔ اے وڑ شھیدانی ھون مارا کُلاں اے ٹوھیں گُناہ ءَ نہ بکشیت۔ چوشیں ھالتے جوڑ مہ بیت کہ راج ءِ تھا دلپروشی بئیت۔قومی ادارھانی مضبوط کنگ جہد ءِ بھرے۔۔۔۔وھدی قومی ادارہ مضبوط بنت، جہد مضبوط بیت، نیشنلزم ءِ سنچ ودان کنت۔ راجی شعور ردوم زوریت۔ اے گپ المی انت کہ قومی ادارھانی نزوریانی ، جست ءُ باوست ءِ بزاں تنقید برائے تعمیر ءِ عمل اگاں اوشت ءِ آماچ بہ بیت گڑا قومی تحریک ءِ سرا منفی اثرات کپ انت۔ ھمنچو کہ قومی ادارہ مضبوط بنت، جست ءُ باوست ءُ تگ ءُ گیچن ءِ عمل دیمروئی کنت۔ قومی شعور ردوم زوریت۔ قومی تحریک ءِ تھا سرپدیں مھلوک گیش ءَ چہ گیش بھر زورانت۔نیشنلزم ءِ پگر ودان کنت۔ بلوچ قوم ءَ را شعور دیگ ءِ ھمے عمل تحریک ءَ مھکم کنت۔ ھمنچو کہ تحریک ءِ ادارہ مضبوط بیت۔ آزادی ءِ شون ودان کنت۔

کسانیں معاملہانی سرا وت ماں وتی گر ءُ چیل، ذاتی کٹء ُ نپ، گروھی فائدگ، وت پرستی، جہد ءِ عمل ءِ اندر ءَ کنفیوژن پیدا کنگ ءَ بلوچ راج سربتگ بیت۔اگاں ادارھانی بدل ءَ فرد مضبوط کنگ بہ بنت تہ جہد ءَ مولیں تاوان رسییت ءُ اے وڑا دژمن فائدگ چست کنت۔ چوشیں منفی عمل دژمن ءِ حق ءَ رؤت۔ ھما قبضہ گیر ءِ دلال کہ جہد ءِ ھلاپ انت۔ گڑا قبضہ گیر وتی ھمے دلالاں کار بندیت ءُ تئی سرپانی تھا پُتران کنت۔ گیش ءَ چہ گیش کنفیوژن پیداک کنت۔ بلے اگاں ادارہ مضبوط بہ بنت، دژمن ءِ اے عمل دارگ بیت کنت۔ لیڈرشپ ءِ آگاھی، بروقت ءَ ھالتانی سرا تجزیہ ، تپاکی ءُ رابطہ دژمن ءِ اے کُلیں پندل ءُ رپکاں ڈامیچ کت کنت۔ جہدکارانی دلبڈی بیت۔ نیشنلزم ءِ سنچ ردوم زیریت ءُ غلامی ءِ احساس چو نوہ بوگیں زیمّ ءَ دجان کنت۔

دژمن جہد ءِ ھلاپ ءَ ہرنوکیں محاذ بوجیت، تئی مھکمیں ادارہ ھما نوکیں پندل ءَ نیست ءُ نابود کن انت۔ بائد انت کہ لیڈرشپ ءُ جہد کار وت ماں وت ءَ بھر ءُ بانگ مہ بنت۔ بازیں وھداں، بازیں جیڑھانی سرا تحفطات الم بنت۔ لیڈرشپ ءُ قومی ادارہ ھما تحفظات ءُ خدشاتانی گیش ءُ گیوار ءَ ، گوں گپء ُ تران ءَ کن انت۔ چہ بیان بازی ءَ پھریز کنگ لوٹیت۔ پرچا کہ دژمن تئی ھلاپ ءَ مورے مزارے کنت ءُ پندل سازی ءَ تیز کنت۔ تئئ ھلاپ ءَ نوکیں مورچہ بندی کنت۔ اے پندلانی پدر کنگ تئی قومی ادارھانی ذمہ واری انت۔ مروچی ما گندیں کہ بلوچ راج تپاک انت۔ خون ءِ دیگ ءَ ساڑی انت۔ جیل ءُ زندانانی پرواہ ءَ نہ کنت۔ بلوچ ھون ماں بلوچستان ءِ ہر دمک ءُ دراں شنزان انت۔ بلوچ ورناہ ءُ جہدکار گرگ ءُ بیگواہ کنگ بیئگ ءَ انت۔ بلوچ مات ءُ گُھارانی ننگ ءُ شرپ لگتمال کنگ بیئگ انت۔ او مروچی دُنیا ءِ مہذبیں راج ھم بلوچ ءِ نیمگ ءَ دلگوش گور کنگ ءَ اَنت۔ بائد انت کہ بلوچ راج چوشیں حالاتاں وتی حق ءَ بیاریت۔ اے ھما وھد ءَ بیت کنت کہ بلوچ تپاک ءُ یکدست بہ بیت، خاصکر ھما قوت کہ بلوچستان ءِ آزادی ءِ واھوک اَنت