مارا اے گواچن زانگی اِنت کہ نیشنلزم ذات ءِ رد کنگ ءِ نام نہ اِنت۔ بلکیں راجی زند ءَ فرد ءِ ذاتی واھگ، ذاتی لوٹ ءُ ذاتی نپ ءُ دگہ بازیں کار کرداں کہ ایشانی گوں لس راجی چاگرد ءَ ھمگرنچ کنگ ءَ چاگرد دوستی ءُ راج دوستی ءِ بنیاد ٹہہ اِیت۔ ہر فرد ءِ ذاتی واھگ ءُ لوٹ قومی ءُ چاگردی زانت ءِ بنیاد ءَ ایر کن اَنت۔ اگاں ما اے گپ ءَ عام بزانت ءَ بزوریں ، انچو کہ یک ماڑی ئے ابئید سنگ ءُ ھشت ءَ جوڑ بیت نہ کنت، راج یا چاگردی زانت ءِ بنیاد ھم فردی زانت اِنت۔ فرد ءَ چہ خاندان جوڑ بیت ءُ خاندان ءَ چہ راج ءُ چاگرد ءِ بنیاد ٹہہ اَنت۔ راجی اجتماعی زانت ھم فرد ءِ ذاتی لوٹ ءُ واھگانی برورد اِنت۔ نیشنلزم ھم یک راجی ئے راجدپتر، کلچر ءُ پجار ءِ پھازگ ءُ رکینگ ءِ بنیاد ءَ ایر کنگ بیت ءُ گوں قومی وجود ءَ ھمگرنچ اِنت۔ اینگلز گُشیت کہ راج ، فرد ءِ لوٹ ءُ گزر ءُ فرد ءِ ذاتی واھگانی پدا وجود ءَ اَتکگ اَنت۔ فرداں وتی ذاتی لوٹ، ذاتی نپانی پھازگ ءَ خاندان ءُ راجانی بنیاد ایر کُتگ۔ او اے گپ ءِ زانگ ھم ھژدری اِنت کہ نیشنلزم محدودیں سطحے ءَ راج پھازی ءِ نام اِنت۔ ایشی ءَ انسانیت دوست ءُ سوشلزم ءِ وڑیں شاھگانیں بنیاد نیست۔ انفرادی اِنت۔ تھنا یک راجی ءِ انفرادی لوٹ ءُ گزرانی پھازگ ءِ نام اِنت نیشنلزم۔۔۔۔۔۔ادا چہ اے گپ پدر اِنت کہ فرد ءِ انفرادی واھگ، ذاتی لوٹاں گوں چاگردی ءُ راجی لوٹاں ھمگرنچ کنگ، فرد ءِ ذاتی نپاں گوں اجتماعیت ءِ آدینک ءَ چارگ مستریں نیشنلزم اِنت۔﴿ اگاں کسے سارتر ءِ وجودیت ءِ بنیاد ءَ سرپد اِنت تہ آ اے بابت ءَ سرپدی داریت﴾
ادا یک مثالے چوش اِنت کہ یک نودربرے وتی ذاتی شوق ءُ ذاتی لوٹ ءُ واھگانی پدا ڈاکٹرے وانیت، پدا ھمے انفرادی واھگ ءُ شوق آئی ءِ اجتماعی زانت جوڑ بیت۔ وھدیکہ آ ڈاکٹر جوڑ بیت آ راج یا چاگرد ءِ حدمت ءَ کنت۔
نو اگاں ما بچاریں، تہ یک جُستے پاد کئیت کہ راجدوستی ءِ جُہد ءَ گوں ذات ءِ رد کنگ ءَ چے کار؟ اے لیکہ مذھبی صوفی ءُ پنڈتانی نہ چکاس اِتگیں ءُ پد نبودیں ھیالے ءُ نیشنلزم ءُ انسان دوستی ءَ گوں دپ نہ وارت۔ ﴿ او ھمے مردم کہ ھمے لیکہ ءَ من انت ھم عمل نہ کناں، چیاکہ ترا چہ منی زھگ ءَ وتی زھگ ءِ ھیال گیشتر گور اِنت﴾۔۔۔۔۔۔۔۔۔۔۔۔۔او دُنیا ءِ ھچ تاریخی کتاب ءُ علم چہ انسان ءِ انفرادی وجود ءَ انکاری نہ اِنت۔ دومی دُنیا ءِ ٹوھیں کواس فرائیڈ، ولسن ءُ ایرک فرام کہ جدید نفسیاتی ءُ چاگردی علم ءِ بنیاد ھمے کواسانی فکر ءِ سرا ایر اِنت۔ اے انسانی چاگرد ءِ ھرابکاری، سلکاری ، دُزی ، ڈنگی ءُ کُشت ءُ کوشانی سوب ءَ ، فرد ءِ ذات ءِ رد کنگ ءِ سوب گُشنت، اے بابت ءَ ایشانی لیکہ ءِ بُن شون ھمیش اِنت کہ فرد وھدی وتی ذات ءَ رد بہ کنت، تہ ذھنی گپچلانی آماچ بیت، خود رحمی ءِ شکار بیت۔ پَرآئی ءَ انسانی ءُ راجی چاگرد ءُ دومی انسانانی زندگی ھچ وڑیں بستار نہ دارنت، آ وت ءَ تباہ کنت ءُ چاگرد ءِ تباہ کنگ ءَ ھم چک ءُ پد نہ بیت۔
