نبشتانک۔۔۔۔۔۔ واجہ میجر مجید بلوچ

ڈاکٹر نصیر دشتی ھما بلوچ زانتکاراں چہ یکے کہ وتی گپ ءُ فگرے تچک ءَ قوم ءَ دیما ایر کُتگ ءُ گواچنے پدر کُتگ ، اگاں کسے ءَ ڈاکٹر ءِ آرٹیکل ءُ نبشتانک ونتگ انت گُڑا زانت کہ ڈاکٹر ءَ مدام بد گوشی ، ملنڈ، دو تل ءُ دوپوستی ، رپک ءُ ھنر ، لگوری پدر کُتگ ءُ یک مسکالے ھم ریا بند ءُ لپرزگ نہ بیتگ۔ ڈاکٹر منی پجار ءِ محتاج نہ انت۔ ڈاکٹر ءِ قلم ءُ پگر ڈاکٹر ءِ پجار اِنت۔ ڈاکٹر ءِ سئے کتاب پیش ءَ چاپ ءُ شنگ بیتگ ءُ چارمی کتاب ﴿بلوچ ءُ بلوچستان﴾ شمئے دیما انت۔ منی تران ءِ شاھدی ءَ کتاب وت دنت۔ آدگہ چاپ ءُ شنگ بیتگیں کتابانی نام چو اے وڑ انت

(1) In a Baloch Perspective

(2) The Baloch of Reason

(3) The Baloch Traditional Health perception

ڈاکٹر ءِ دو کتاب ءِ سرا پاکستان ءَ پابندی جتگ ءُ کتاب بلیک لسٹ ءَ کُتگ انت ءُ پاکستان ءَ ڈاکٹر ءِ جند ءِ گرگ ءُ بند کنگ ءِ ھم چن ءُ لانچ کُتگ۔ ھمے سوب ءَ ڈاکٹر چہ ۲۰۰۸ ءَ بگر تاں روچ ء مروچی ماں برطانیہ ءَ دراں ڈیھی زند گوازینگ ءَ انت۔

اے کتاب ءِ سرا بائد وا اش انت کہ شریں پٹ ءُ پولکار چمشانک بِدینت پرچا کہ منی گونگیں نابزانتے ءِ واستا گرانیں کارے، من جہد کُتگ کہ کتاب ءِ بابت ءَ وانوکاں سرپد بہ کناں۔

چوناھا ڈاکٹر نصیر دشتی بلوچ نبشتہ کار ءُ تجربہ نگارانی ھما رم ءَ ھساب بیت کہ آ ماں بلوچی لبزانک ءِ پڑا لنککانی سر ءَ ھساب بنت۔ بہرحال من چہ ڈاکٹر ءِ کتاباں بازیں در بُرتگ ءُ بازیں اڑ ءُ جنجالانی بابت ءَ شَر سرپدی زُرتگ۔

انچو کہ شُما سرپد اِت کہ بلوچ راجدپتر ءِ بابت ءَ دری ءُ ھندی پٹ ءُ پولکاراں وتی وتی رنگ ءُ دروشم ءَ بلوچ راجدپتر ءِ سرا نبشتہ کُتگ، کلانی جہد ستاہ کرزنت۔

عرب زانتکارے گُشیت کہ ؛ یک راجے ءِ اگاں گوستے مہ بیت۔ آ راج ءِ جوانیں بانداتے بوت نہ کنت۔ بزاں راجے ءِ کہ راجدپتر مہ بیت، آ الکاپیں راجے منگ نہ بیت، بلوچ ءِ راجدپتر گیشتر چہ بلوچ ءِ قدیمی شاعری ءَ دست کپتگ اَنت۔ انچو ڈاکٹر نصیر دشتی وت ھم گُشیت؛ راجدپتر ءِ پول کنگ ، درگیجگ چو ارزان نہ اِنت۔

بلے ڈاکٹر نصیر دشتی ءِ اے نوکیں کتاب ﴿بلوچ ءُ بلوچستان﴾ نوکیں رنگ ءُ دروشمے ءَ مئے ءُ شُمئے دیما اِنت۔۔۔ اے کتاب ءَ ﴿بلوچ راجدپتر﴾ ءِ سرا ڈاکٹر ءَ مزنیں پٹ ءُ پولی کُتگ ءُ بازیں راجدپتری پٹ ءُ پولکارانی حوالہ ھم داتگ اَنت۔ اے کتاب ءِ تھا ڈاکٹر ءَ بلوچ راجدپتر ءِ پٹ ءُ پول ءُ گیش ءُ گیوار تا حدے ءَ کُتگ، بلے انگت باز کار لوٹیت۔

ڈاکٹر وتی کتاب ءِ تھا نبشتہ کنت کہ راجدپتری پٹ ءُ پولکاراں گوں بلوچ راجدپتر ءَ انساف نہ کُتگ۔ ہر یکے ءَ وتی وتی راجی کٹ ءُ نپانی ھاترا راجدپتر گوں راست ءُ تچک ءَ نبشتہ نہ کُتگ۔ بازیں نبشتہ کاراں بلوچ عرب گُشتگ ءُ بازینے ءَ فارس۔۔۔ بلے ڈاکٹر وتی کتاب ءِ تھا گوں دلیلاں اے گیش ءُ گیوار ءَ کنت کہ بلوچ نے عرب اَنت ءُ نیکہ فارس اَنت، بلوچ، بلوچ اَنت۔ آہاں وتا یک جتائیں دود ءُ رھبند ءُ بستارے ھست، وتا سرزمینے ھَست ءُ وتا دودمانے ھَست ءُ یک بلاھیں حیثیتے خدا بند انت، بلوچ بازیں ٹک ءُ بولکانی تھا بھر بیتگ اَنت۔ اے واستا بازیں سیاسی چست ءُ ایراں شریکدار نہ بیتگ انت۔ بلے بلوچ ءِ بازیں ٹک ءُ بولکاں ماں راجدپٹر ءَ ارزشت ھَست کہ ھما دھر ءِ سیاسی ، سماجی چست ءُ ایرانی بھر بیتگ اَنت کہ مروچی ھم تاریخ ءِ بھر جوڑ اَنت۔

ڈاکٹر گُشیت کہ بلوچ دوازدہ سد پیش مسیح ءَ چہ سنٹرل ایشیا ءَ اودا کیپسین سی ءَ یک ٹوھیں لڑ ءُ بوجے ءَ پد اے ھند ءُ دمگاں سر بیتگ اَنت۔ چہ لڈ ءُ بوج ءَ بلوچانی اولی منزل کوہ البرز بیتگ ءُ کوہ البرز ءَ بلوچ سک دیراں جہہ منند بیتگ اَنت۔ اے درگت ءَ گوں ایرانی لشکراں بلوچانی بازیں جنگ ءُ چوپے بیتگ۔

ڈاکٹر کرد ءُ بلوچانی سیادی ءِ منوگر اِنت۔ آ گُشیت کہ بلوچ ءِ ءُ کرد ءِ زبان، دود ءُ ربیدگ، دودمان، سیاسی ءُ سماجی کٹ ءُ نپ ھما وھد ءَ ھم یک بیتگ اَنت ءُ فارس ءُ عرب نبشتہ کاراں بلوچ راجدپتر پہ راستی نبشتہ نہ کُتگ۔ بازیں وھد آیاں وتی کٹ ءُ نپ ءُ سیاسی ءُ سماجی اڑ ءُ جنجال دیما آورتگ انت ءُ ھما وڑا بلوچ ءِ دپتر نبشتہ کُتگ کہ بلوچ راجدپتر ءَ بلاھیں تاوانے رستگ۔

کم ءُ گیش دو ھزار سال اِنت کہ بلوچ مذھب ءِ نیمگ ءَ اتکگ اَنت۔ چہ اسلام ءَ پیش بلوچ زرتشت ءِ دین ءِ منوگر بیتگ اَنت ءُ بلوچ چہ بندات ءَ مذھبی انتہا پسند نہ بیتگ انت۔ بلوچانی دہ ﴿١۰﴾ ٹک ، فارس ءُ عرب ءِ جنگ ءِ دور ءَ گوں عرب لشکر ءَ عربستان ءَ شتگ اَنت ءُ عراق، بصرہ ءَ جاھمنند بیتگ اَنت۔ دیریں وھدے اودا جاھمنند بیتگ اَنت۔ پدا حجاج بن یوسف ءَ بلوچانی سرا بازیں زُلم ءُ زیادھی کُتگ۔ بلوچ چہ عراق ءَ در کپتگ ءُ شام بزاں حلب ءَ جاھمنند بیتگ اَنت۔

بازیں وھد ءَ چہ پد سلطنت عثمانیہ ءِ دور ءَ دہ بلوچ ٹک چہ حلب ءَ پدا در کپتگ ءُ وتی ھند ءُ دمگاں بزاں بلوچستان ءَ اتکگ اَنت۔

براھوئی بلوچانی بابت ءَ ڈاکٹر نبشتہ کنت کہ براھوئی ءُ بلوچ یک اَنت۔ براھوئی بلوچ ءِ یک ٹکے۔ ڈاکٹر نصیر ءَ ادا ﴿Dr Gershevitch) ءِ کہ راجدپتری پٹ ءُ پولکاری حوالہ داتگ کہ اے پٹ ءُ پولکار گُشیت بش کردی کوھنیں گالوار گوں براھوئی زبان ءَ سک نزیک اِنت۔ چہ پٹ ءُ پول ءَ اے ھم پدر بیتگ کہ براھوئی چہ کرمان ءَ جاھمنندیں بلوچانی ٹکاں چہ یک ٹکے ءُ براھوئی ءُ بلوچ ءَ ھچ تپاوت نیست، براھوئی بزاں بُرز کوھی ، بلوچ ءِ اے ٹک گیشتر کوھاں جہہ منند بوتگ اَنت ایشاں برز کوھی گُشگ بیتگ۔ دیمترا ھمے لبز برز کوھی چہ براھوئی ءَ بدل بیتگ۔ اے یک جوانیں راستی ئے پدر بیتگ کہ اے قبضہ گیر بزاں پاکستان ءَ باز پلینڈی کُتگ کہ بلوچ دگر اَنت ءُ براھوئی دگر اَنت۔ بلوچ ءِ بھر ءُ بانگ کنگ ءِ ھاترا اے بے بُنیں دروگ بلوچ ءِ ھلاپ ءَ قبضہ گیر ءَ سک باز کارمرز کُتگ۔

اے کتاب ءِ سرا تاک تاک چمشانک دیگ سک گران اِنت۔ حبر ءِ راستی پہ درور من شمئے دیما عرض کُت۔ اے کتاب ءَ کہ سرجم ءَ کسے وانیت، گُڑا وتی راجدپتر ءَ سرپد بیت۔ راجدپتر ءِ نبشتہ کنگ گرانیں کارے، بلے بلوچ راجدپتر ءِ گیشتر گران اِنت۔ پرچا کہ بلوچ راجدپتر دنز ءُ مجاں سک تامور کُتگ ءُ داکٹر نصیر دشتی ءِ جہد ستاہ کرزیت۔ اے کتاب ءِ نبشتہ کنگ ءَ ڈاکٹر ءَ مزنیں پٹ ءُ پولے کُتگ۔ اے کتاب بلوچ راجدپتر ءِ اولی کتاب اِنت کہ گوں مھکمیں دلیل ءُ ثبوتاں دیما آرگ بیتگ۔ اے کتاب ءَ بلوچ ءِ اولی لڈ ءُ بوج ءَ بگر داں کلات ءِ سرا بلوچانی حکومتی بزاں وت واجہی ءُ دو گشتاں کلات اسٹیٹ ءِ سرا درملکی لشکرانی ارش ھم بیتگ۔ اولی گشتاں پرنگاں ١۳ نومبر ١۸۳۹ ءَ ارش کُتگ ءُ اے جنگ ءَ سردار مھراب خان ءُ دگہ بازیں سرمچارے شھید کنگ بیتگ، دومی گشتہ پاکستان ءَ ۲۷ مارچ ١۹۴۸ ءَ کلات ءِ سرا ارش کُت ءُ بلوچ سر ڈگار ءِ سرا قبضہ کُت ءُ روچ ء مروچی اے ناجائزیں قبضہ جاری اِنت۔ اے دوئیں ارشانی بابت ءَ کتاب ءَ گوں دلیلاں نشون داتگ۔

اے کتاب ءَ اے ھم پدر کُتگ کہ بلوچانی بنکی جہہ منند بلگشان ﴿Balashagan) بوتگ۔ بلگشان آزربائیجان ءُ ترکی ءِ نیام ءَ انت ءُ ھزار سال ءِ لڈ ءُ بوج ءَ پد بلوچ ماں بلوچستان ءَ سر بیتگ اَنت ءُ مختلف ٹک ءُ بولکانی شکل ءَ بلوچستان ءَ جاھمنند بیتگ انت ءُ وتی حاکم وت بیتگ اَنت۔

اے کتاب ءَ اگاں کسے لوٹائینیت گڑا ڈس ءُ نشان اے وڑ انت۔ ۔۔۔

www.amazon.com

من گوں بلوچی اکیڈمی ءَ دزبندی کناں کہ اے کتاب ءَ بلوچی، براھوئی، فارسی، عربی ءُ اردو ءَ ترینگ بہ بیت۔ تاکہ ہر یکے اے کتاب ءَ ونت بہ کنت ءُ وتی راجدپتر ءَ سرپد بہ بیت ءُ وتی دیمتر ءِ منزل ءِ راہ ءَ گیش ءُ گیوار بہ کنت۔