ما مدام گُشتگ کہ انسان ءَ اشرف المخلوقی ءِ شان نہ براھیت۔ ذاتی ھوس، لالچ ءُ واک ءُ اگدہ ءِ ھاترا انسان ھما کنت کہ حیوان ھم شرمندہ بیت۔ عرب تاریخ ءِ تھا زالمیں حاکمانی کسہ سک دراج اِنت ، اے کسہ چہ ھمودا بندات بیت کہ مسلماناں پہ واک ءُ اگدہ ءِ ھاترا پیغمبر ءِ خاندان زھر دپیں تیگانی دپ ءَ داتنت ءُ یکے ھم پشت نہ کپت۔ عرب اے گپ ءَ شموشکار اِتنت کہ ما تاریخ ءِ ہر دور ءَ دومی راجانی غلام بیتگ اِنت ، ھمے پیغمبر اَت کہ عربے چِت ءُ یکمُشت کُت اَنت ءُ دُنیا ءُ جھان ءِ واجھی کُت اَنت۔ بلے عرباں ھما کُت کہ کنگی نہ اَت۔
دومی مسلمان ءُ عرب مھلوک ءِ یک مستریں بد بھتی ایش اِنت کہ اے بزگاں تاریخ ءِ ھر دور ءَ یک خدائی سرا ایمان آرگ ءَ ھوار دگہ بازیں خداہانی سرا ایمان آرگ ءَ لاچار کنگ بیتگ اَنت۔ مصری جمال عبدالناصر ءَ ابئید دگہ ھچ عرب حاکم الس ءِ واھگانی پدا اگدہ ءِ سرا نیاتکگ اَنت۔ بلکیں زالم بوتگ اَنت۔
مسلمانانی شیعہ ءُ سنی جیڑہ ءَ ھم مذھبی بنیاد نیست۔ اے فرقہ سیاسی ءُ واک ءُ اگدہ ءِ لوٹ ءِ پدا ردوم دیگ بیتگ اَنت۔ تاریخی ھساب ءَ اے جیڑہ ، فرقہ بندی اگدہ ءِ ھاترا ءُ سیاسی ئے، امام حسین ءِ قتل ءَ پد سیاسی نپ ءُ اگدہ ءِ ھاترا مذھبی فرقہ بندی بندات بوتگ، گوستگیں روچاں ڈاکٹر ذاکر نائیک ءِ ھمے گپ ءِ سرا ملایاں بد بُرت کہ آئی ءَ گُشتگ اَت کہ امام حسین ءِ قتل سیاسی قتلے بیتگ، چیاکہ ملایانی سیاسی نپ ءُ فائدگ گوں ھمے فرقہ بندی ءَ ھمگرنچ اَنت۔
شامی بشار خاندان ءِ کِسہ ھم ھمیش اِنت، حافظ الاسد ءَ ۳ مارچ ١۹۷١ ءَ اگدہ ءِ دز گرگ ءَ پد شامی مھلوک ءِ سرا ھما زلم ءُ زوراکی ءِ کسہ بندات کُت کہ جھان ءَ چوشیں زوراکی ءِ مثال کم اِنت۔ ١۹۸۰ ءَ تدمر ءِ ھند ءَ خافظ الاسد ءِ زوراکی ءِ کسہ بندات بوت، ھزاراں مھلوک بشار لشکر ءِ دست ءَ کُشگ بوتَنت۔ پدا ١۰ مارچ ١۹۸۰ ءَ جسرالشغور ، پدا ۵ اپریل ١۹۸۰ ءَ حمات، ١١ اگست ١۹۸۰ ءَ حلب ءَ۔۔۔ اے شش ءُ ھپتیں ماہاں چِل ھزار مردم بشار لشکر ءِ دست ءَ کُشگ ءُ گار کنگ بوت اَنت ءُ ۲۰ ھزار روچ ء مروچی گار ءُ بیگواہ اَنت۔ اے ششیں ماھاں حمات شھر ءَ یک زندگیں سھدارے ھم پشت نہ کپت۔
حافظ الاسد ءَ مرگ ءَ پد آئی ءِ بچ ١۰ جون ۲۰۰۰ ءَ شام ءِ حاکم بوت، اے مرد ءَ چہ پت ءَ بوگے پر کُت۔ ایشی ءِ حاکمی ءِ دوران ءَ ۴۵ ھزارءَ چہ گیش شامی مھلوک جنگ ءُ کُشگ بوتگ اَنت ءُ ھزارانی کچ ءَ بیگواہ کنگ بوتگ اَنت۔ اے زلم ءُ زوراکی روچ ء مروچی برجاہ اِنت۔
