درستاں چہ پیسر ، ابکہ کنوکیں گپ اِش اِنت کہ سوشلزم ءِ لیکہ ءَ مغرب ءَ رودم زُرتگ، بلے اے لیکہ مشرق ءَ چکاسگ بوتگ۔﴿فیڈل کاسترو ءُ ھوگو شاویز ءِ منافقانہ دو پوستی ءُ گوچلی وتی جاہ ءَ کہ اے مرد چو گُرک آسک ءَ بیست ءُ سی سال اِنت کہ ھما راجانی سرا چٹی اَنت﴾ اے وت یک جُستے کہ دنیگہ زانوگر اے پسہ ءِ دیگ ءَ بے سوب بیتگ اَنت۔ گُشنت کہ سوشلزم ءَ کیپیٹلزم ءِ پژگرد ءَ ردوم زُرتگ۔ پمیشا مارکسی زانوگر انسانی تاریخ ءَ پنچ عھدانی تھا بھر کن اَنت۔
١۔ قدیم سوشلزم عھد
۲۔ زمین داری ءِ عھد
۳۔غلام داری ءِ عھد
۴۔کیپٹیلزم ءِ عھد
۵۔ جدید سوشلزم ءِ عھد
بلے پہ راستی بچاریے ، اے سرجمیں لیکہانی پُشت ءَ یک منافقانہ ذھنی کار کنگ اِنت﴿ پمیشا مغرب ءِ ردوم گیپتگیں لیکہ مشرق ءَ چکاسگ بوتگ ءُ تاں روچ ء مروچی سوشلزم ءِ واب ءِ معنیٰ در نیاتکگ ءُ ناکہ دیم ءَ دراَتک کنت﴾۔
بلے اگاں کسے پہ راستی اے سرجمیں کردارانی سرا چار ءُ تپاس بہ کنت تہ یک راستی ئے دیم ءَ کئیت۔ انچو کہ گُشنت ھژدھمی کرن یورپ یا مغرب ءِ قومی بیداری ءِ کرن اِنت۔ بلے دومی نیمگ ءَ ما ھمے گُشت کنیں کہ ھژدھمی کرن مغرب ءِ قومی بیداری ناں بلکیں قومی بیزاری ءِ کرن اِنت۔ ھما عھد ءَ اگاں ما یورپی ندکار ءِ سساساچانی سرا چار ءُ بچار بہ کنیں کہ ندکار ءِ سساساچانی تھا یورپی چاگرد ءِ تب ءُ نفسیات جوانیں وڑی ءَ گندگ ءَ کئیت۔ روسو، سگمنڈ فرايیڈ ، ژاں پاول سارتر ءِ سساساچانی تھا مارا یورپی چاگرد ءِ بوریت یا چاگردی بیزاری گندگ ءَ کئیت۔
اے ھمے عھد اِنت کہ مغرب چرچ یا مذھب ءِ عھد ءَ چہ سیکولر عھد ءَ داخل بیتگ۔ چاگرد چہ ملا ءُ مذھب ءَ بیزار بوتگ ءُ نوکیں سنچی ءِ درگیجگ ءَ سرگردان بوتگ۔ نوکیں ھیال ءُ لیکہ دیما آیان بوتگ اَنت۔ تاں دو کرناں یورپی چاگرد مذھب بیزاری ءِ گپچلانی آماچ بوتگ۔ کدی روسو ءِ انقلابی لیکہ دیما اتکگ اَنت ءُ کدی سارترے وجودیت ءِ لیکہ۔۔۔۔۔۔۔۔۔۔ مغربی بوریت ءُ بیزاری ءِ جوانتریں مثال والٹئیر ءِ لیکہ اَنت کہ چرچ ءِ زلم ءُ زوراکیانی پژگرد ءَ والٹئیر منکر خدا جوڑ بیتگ۔ ھمے چاگردی بیزاری ءَ وکٹورین بادشاہ ءُ چرچ ءُ ملا لپرزگ کُتگ اَنت۔ پمیشا آھاں چوشیں مذھب بیزاری ءِ دیمگیری ءِ ھاترا یک انچیں یوٹوپیائی لیکہے جوڑ کُتگ ءُ مشرق ءَ چکاس اِتگ کہ سوشلزم ءِ دروشم ءَ مرچی ھمے لیکہ ھست اِنت۔ ما گُشت کنیں کہ سوشلزم ءِ لیکہ ھمے چاگردی بوریت ءُ مذھب بیزاری ءِ دیمگیری ءِ ھاترا مغربی سامراجیاں وت ٹھینتگ۔
چر ایشی ءَ چہ مغربی سامراج ءَ سوب مندی رستگ۔ بیپاری حوالہ ءَ مرچی سرجمیں مشرق ، مغرب ءِ ایر دست اِنت۔ بلے مشرقی مھلوک ءَ تاں روچ ء مروچی مغربی گوچلی نہ فھم اِتگ اَنت۔
پدا دومی نیمگ ءَ اگاں ما بچاریں سوشلزم ءِ لیکہ ءُ فکر گیشتر ھما راجانی تھا ردوم دیگ بوتگ کہ آ راج ایردست بوتگ اَنت۔ مشرقی ءُ مغربی بلوچستان اے ھندانی بستارداریں زمین بیتگ اَنت کہ اے ھند ءَ راجی سنچ ءِ ایرجیگ کنگ ءَ سامراجیاں وتی داشتگیں دلارانی کمک ءَ ھمے بے سوتیں لیکہ ردوم داتگ۔ تاں روچ ء مروچی بلوچ ھاک ءَ اے نشانی موجود اَنت۔ کھور خان ءِ شکل ءَ۔ ڈاکٹر مالک ءِ دروشم ءَ اے درمیانہ طبقہ ءِ، سیمی جنس ءِ مھلوک تاں انگت ھست ءُ موجود اَنت۔
ایشی ءِ پدریں مثال واجہ ڈاکٹر مالک ءِ آزمانکے کہ ماھتاک بلوچی جولائی ۲۰١۲ ءِ تاک ءِ تھا شنگ بوتگ۔ گُشنت کہ انسان ءِ چیریں ابرم لبزانی تھا زاھر بیت۔ نیشنل پارٹی ءِ سروک واجہ ڈاکٹر مالک ءَ باز جاہ ءَ پہ نادلکشی وتی پیشی ردیانی درنگازی کُتگ ءُ گُشتگ کہ ما نو میر غوث بخش بزنجو ءِ لیکہ ءِ منوک اِنت۔ سوشلزم ءِ لیکہ ءِ پلہ مرزی ءَ مئے جتگیں نعرہ بے سوت ءُ مئے ردی بوتگ اَنت۔ پمیشا آ سامراجیانی جوڑینتگیں استان ءِ اندر ءَ نندیت ءُ راجی حقانی گپ ءَ جنت۔ بلے اے آزمانک ءِ تھا واجہ ءَ وتی درمیانہ طبقہ یا سیمی جنس ءِ لیڈری ءِ سِنچ ھم دیما نیاتکگ ءُ یک نیمگے وتی ذاتی کینگانی درنگازگ ءَ ھم چک ءُ پد نہ بوتگ ءُ آزمانک ءِ کردار ءَ میدُک ءِ زھگ گُشیت ءُ وتی اندری مکاری ءِ صفت ءَ زاھر کنت ءُ دومی نیمگ ءَ آزمانک ءِ مرکزی خیال ءَ چہ ھمے نشون رسیت کہ واجہ تہ انگت اینٹی کیپیٹلزم ءُ سوشلزم ءِ پلہ مرزی ءِ لیکہ ءَ دز کش نہ بوتگ۔ واجہ ءَ وتی کردار ءِ نادوستیں مردم فیڈل کاسٹرو گوشتگ۔ بلے واجہ اے گپ ءَ ھم سرپد نہ اِنت کہ نو کاسٹرو ءِ جند چہ سوشلزم ءِ لیکہ ءَ بیزار ءُ دست بردار بوتگ ءُ گوں امریکا ءَ بیپاری معاہدہ کُتگے۔
دومی نیمگ ءَ واجہ ءَ وتی کردار ٹی۔وی چینل ءُ ھالتاک ءِ مالک پمیشا نادوست اِنت کہ آ سرمایہ دارے۔ بلے واجہ اے گپ ءَ شموشکار اِنت کہ انٹرنیشنل اسمگلر، مکران ءِ ڈرگ مافیا ءِ سروک ، بلوچ راج ءِ قاتل، بلوچستان ءِ بدنام تریں دُز واجہ امام بخش بزنجو ﴿قابل احترام اِنت﴾ آئی ءِ پارٹی ءِ باسکے۔
نو من ابکہ ءُ خیراناں کہ چُشیں مکاری، دوتل ءُ دوپوستی ءَ کُجام نام ءَ بدیاں۔ چوشیں لبز منی گورا نیست۔ پمیشا من اے سیاست ءَ سیمی جنس ءِ سیاست گُشاں۔
سیمی جنس ءِ سیاست زندہ بات
