تاریخ ءَ ھَست اِنت بلوچ ءَ وتی زبان نہ وارتگ ءُ دگرانی زبان ءِ سرا ھم سِتک داشتگ۔ ھمے زبان شناسی ءِ ستک اِنت کہ بلوچ ءَ دگرانی زبان وتی زبان گُشتگ ءُ ھمے روایت ءُ زبان ءِ سِتک ءَ مدام بلوچ ءَ تاوانبار کُتگ۔ بلے پنجابی ءُ گجر ھما زبان ور ءُ گوچلیں راج اَنت کہ ناں ایشاں زبان ھَست ءُ ناکہ وتی زبان ءِ سرا اوشتاتگ اَنت۔ 

پرنس کریم بلوچ گپ ءُ تران ﴿مذاکرات﴾ ءِ زبان دیگ بوت۔ پدا جیل ءُ زندان کنگ بوت ءُ ٹارچر سیلانی تھا بند کنگ بوت۔ نواب نوروز خان ءَ قرآن ءِ نام ءَ زبان دیگ بوت ءُ کوھاں ایرگیجگ بوت۔ بلے پنجابی وتی زبان ءِ سرا نہ اوشتات اَنت۔ ایشاں گوں نواب ءُ آئی ءِ ھمبلاں ھما کُت کہ تاریخ ءَ چوشیں زُلم ءُ زوراکی ءِ مثال کم اِنت۔ روکپتی بلوچستان ءِ بلوچیں جنگول دادشاہ کمال ھم زبان ءِ سرا کوہ ءَ ایرگیجگ بوت۔ بلے دادشاہ سوھوئیں جنگولے اَت۔ آئی ءَ گُڈ ءَ گجر ءِ نیت زانت ءُ پندلانی دام ءَ نہ کپت، بلے نو وھد چہ آئی ءِ دست ءَ دراَتکگ اَت۔ آ جند ءِ کمک کار لاشاریانی سردار مہیم خان ءِ دست ءَ جنگ ءُ کوشارینگ بوت۔

بلے مرچیگیں بلوچ چو پیشیگیں بلوچ ءَ نہ اِنت۔ یکے مرچیگیں بلوچ ءَ زبان وروکیں دژمن ءِ پندل فہم اَتگ ءُ اے سبق چہ دژمن ءَ دربرتگ ءُ دومی مرچیگیں بلوچ وتی کش ءِ اوشتاتگیں بلوچ گونگیں دژمن ءَ ھم زانت۔

چیاکہ پیش ءَ بلوچ مدام بلوچیں برات ءِ وسیلت ءَ رد دیگ ءُ کوشارینگ بوتگ۔ یکے بلوچ ءَ زبان نہ وارتگ ءُ دومی ءِ زبان ءِ سرا ھم ستک داشتگ۔ دومی آئی ءَ بلوچ گونگیں دژمن زبان شناسی ءِ ردا ھما وڑا چاراِتگ کہ وت ءَ چاریت۔ بلے دلار ءَ اگاں وتی مات ءُ گھار ءُ گُلزمین ءِ سُد مہ بیت تہ آئی ءَ زبان ءِ سُد ھم نہ بیت۔ آ زبان ءَ وارت ءُ وتی برات ءِ کوشارینگ ءَ ھم چَک ءُ پَد نہ بیت۔ 

تاریخ ءَ اے مثال ھَست اِنت کہ دژمن ءَ بلوچ ءِ وسیلت ءَ بلوچ ءَ را زبان داتگ ءُ دزگیر کُتگ یا کُشتگ۔ بابا نوروز خان زبان دیگ بوت ءُ قرآن ءِ نام ءَ چہ کوہ ءَ ایرگیجگ بوت ءُ گوں زھگاں کُشگ بوت۔ اے کار ءَ دژمن ءِ کمک کار بلوچ گونگیں دژمن دودا خان اَت کہ اے مرد نوابی ءُ سرداری ءِ لالچ ءَ اَنچو کور کُتگ اَت کہ جند ءِ برات دری دژمن ءِ دست ءِ کوشارینتَنت ءُ داں زندگ اَت ، پاکستانی نوابے اَت ءُ چرآئی ءَ رند آئی ءِ زھگ ھم دژمن ءِ ھمکار اَنت ءُ بلوچ ءِ دژمن۔۔۔۔۔۔۔۔۔۔۔۔۔۔۔۔۔۔۔۔۔۔۔۔ روکپتی بلوچستان ءِ بلوچ جنگول دادشاہ کمال ھم جند ءِ ھمکار ءُ بلوچ گونگیں دژمن مہیم خان ءِ وسیلت ءَ زبان دیگ بوت۔ اے مرد بازیں سالاں دادشاہ ءِ ھمکار اَت۔ بلے رندا تُرس ءُ لالچ ءَ دلار بوت ءُ داشاھے کوشارینت۔ 

مرچیگیں بلوچ باشعور اِنت۔ دژمن ءِ زبان شناسی ءِ ھال ءَ ھم سرپد اِنت ءُ وتی کش ءَ نشتگیں بلوچ گونگیں دلار ءَ ھم شَر زانت۔ پمیشا مرچیگیں بلوچ ءِ نوکری ءُ لالچ ءِ سرا رد دیگ دژمن ءِ پدنبودیں ھیالے ءُ مردم ءَ کندگ ھم کئیت۔