وھدیکہ ما چاگرد ءِ گپ ءَ بہ جنیں تہ کساس پنچ درصد باز بیمناک اِنت۔ اگاں انگلستان ءِ سرا چماں شانک بِدیں تہ 1980 ءِ دھک ءَ پنچ درصد ءِ کچ ءِ تھا واجھی ئے واھگ دارانی کساس سی لکھ بوتگ۔ بلے چاگرد ءِ تھا سی لکھ لیڈر چون جاہ کُت کَنت؟ اینکہ جاہ بیت نہ کَنت۔ ایشی ءَ چہ ھمے گپ دیم ءَ کئیت کہ پنچ درصد واجھی یے واھگ دارانی تھا گیشرینانی واھگ پیلہ نہ بنت ءُ اھانی واب گوں ھاکاں ھوار بنت۔ ایشاں وتی زند ھر وڑا ھمایانی تھا گوازینگی اِنت کہ آھانی جیڑہ واجھی یے واھگ نہ اِنت۔یک چاگردے کہ دھکان کار ءُ واجہ، غریب ءُ امیرانی بنیاد ءَ ٹھینگ بوتگ کہ آئی ءِ ”کلاس اسٹرکچر“ مھکم اِنت۔ چوشیں چاگرد ءَ ایشاں بستار نیست۔ دھکان کار پوریاگر جوڑ بیئگ ءِ واھگ ءَ داریت۔ بلے اے امیت ءَ نہ داریت کہ آ جاگیردار بہ بیت ءُ مال ءُ ماڑیانی خدا بند بہ بیت۔ آ اے سنچ ءَ ھم نہ داریت کہ مال ءُ مڈیانی خدا بند چیا چرآئی ءَ چہ مستریں بستارے ءِ خدا بند اِنت۔ بلے مئے چاگرد ءَ کہ ادا دھکان کار ءِ زھگ ”فلمی ہیرو“ جوڑ بیئگ ءِ واھگ ءَ داریت۔ ادا ہر روچ ما وتی لیڈراں ٹی۔وی ءِ تھا گِندیں، ادا جاورھال باز تپاوت دارَنت۔ پنچ درصد مردم ھمے واھشت ءِ سرا زندگ اَنت کہ ما پرچا مشھور ءُ مال ءُ مڈیانی خدابند جوڑ نہ بئیں۔ آ وتی جاورانی سرا درد بنت، دلپروش بنت۔ پمیشا آ دومی ءَ پادلپاش کنان ءُ دیم ءَ درآیگ ءِ جھد ءَ کن اَنت۔ ھمے سِنچ اِنت کہ چاگردی سلکاری ءُ تسدد ءِ بنیاد اِنت۔
ما اگاں زانگ ءِ جھد ءَ بہ کنیں تہ اے واجھی یے واھگ داراں چنکہ درصد مردم جوانیں مردم جوڑ بیت کنت؟ اسکول ءِ پنچ صد نودرنرانی تھا بیست ءُ پنچ انچیں ھست کہ ”ٹاپ لیول“ ءَ آیگ ءِ جھد ءَ کن اَنت۔ ایشانی تھا لھتے انچین بنت کہ آھانی تھا قدرتی جوانی بنت۔ آ جوانیں لئیبی اَنت، جوانیں نودربراں، جوانیں ڈبیٹر آں۔ (لھتے انچین بنت کہ آ اینکہ جوان نیاں بلے داد گِرنت)۔۔۔۔۔۔باز انچین بنت کہ آھانی تھا جوانیں جوھر ءُ صلاحیت نیست، وتی احمقی ءَ دیم ءَ آیگ ءِ جھد ءَ کن اَنت۔ چوشیں بچک دیم ءَ آیگ ءِ واھگ ءَ چون پیلہ کُت کن اَنت؟ ابرمی صورت ءَ آ دیم ءَ آیگ ءِ ھاترا ھر وڑیں رھبند ءُ طریقہاں چکاس اَنت۔ اگاں آھانی شکل ءُ صورت جوان اِنت تہ جنکانی گُما نند ءُ نیاد ءَ وتی داشتگیں واھگاں پیلہ کن اَنت۔ اگاں آھانی تھا جوانیں (فنی) ٹیلنٹ بنت چوشکہ موسیقی ءِ سنچ، چار ءُ بچار کنگ ءِ صلاحیت، انچیں جوانیں ٹیلنٹ کہ آھانی استاد اے بابت ءَ دلگوش مہ دَنت، تہ آ وتی چاگرد ءِ تھا تھنا بنت، جتائیں دُنیا ءِ تھا رونت ءُ زندگ بیئگ ءِ جھد ءَ کن اَنت۔ چوشیں نودربر بیت کنت شوپرٹ، ڈاروین ءُ بلزاک جوڑ بہ بنت، بلے دومی صورت ءَ اے ھم بیت کنت کہ آ غنڈہ، قاتل ءُ شبرہ ءُ دُز جوڑ بہ بنت۔
چوشیں مردمانی مستریں جنجال ھمیش اِنت کہ آ ھمے سرپد بنت کہ چاگرد ءَ مئے گُما انساف نہ کُتگ۔ بے انصافیانی ھلاپ ءَ ”نارمل“ انسان ءِ ”رد عمل“ وتی جند ءِ سرا ”رحم آیگ“ اِنت۔ ھمے بے انصافی ءُ ”خود رحمی“ آیان ءَ کم مارشتی ءِ شکار کنت۔ چوشیں مردم وتی جند ءِ مستریں دُژمن جوڑ بنت۔ جیڑگ ءَ آھانی تب ءِ تھا زوت دلرنجی ودی بیت ءُ آ ”جارحیت پسند“ بنت۔ چر ایشی ءَ مردم چرآھاں چہ وت ءَ گِستا دارَنت۔
قابلیں ناکامیں انسان چہ دومیاں گیشتر بے صبر بنت، چیاکہ آھانی تھا گیشتر قوت ءُ تونائی بیت۔ بے صبری ءِ سوب اِنت کہ آ ”شارٹ کَٹ“ رھبندی ءِ درگیجگ ءِ جھد ءَ کن اَنت۔ ( ءُ شارٹ کَٹ رھبندے گچین کن اِنت ءُ قاتل ءُ غنڈہ جوڑ بنت، نو ھمے سوب اِنت کہ انسانی چاگرد ءَ گیشتر بودناکیں زھگ قاتل، دُز ءُ ڈنگ ، نشہی ءُ منشیات فروش جوڑ بنت، نابود ناں)۔۔۔۔۔۔۔۔۔۔۔۔
