Facebook
RSS

نظریہ ءُ شخصیت

-
شپچراگ

شعوری ءُ نظریاتی سیاست ءِ نام ءِ سرا شخصی کردارانی نہ مَنگ ءُ ایرجنگ مارکسی فلسفہ ءِ دادے کہ بلوچ چاگرد ءِ تھا ردومے زُرتگ۔ بلوچ سیاست ءِ تھا اے وتگڑیں ایرادی لیکہ ءَ ھما وھد ءَ ردوم زُرت کہ بازیں گلاں ماں بلوچستان ءَ بُرزیں طبقہ ءُ جھلی طبقہ ءِ نام ءِ سرا اینٹی سردار ءِ نعرہ جَت۔ بلوچ ءَ بھر ءُ بانگ کُت۔ ھمے سنچ پہ لاشعوری تاں روچ ء مروچی بلوچ ءِ تب ءِ بھر اِنت۔ بازیں مردم ذاتی ءُ شخصی کست ءُ کینگ ءَ نظریاتی تنقید ءُ ایراد ءِ نام ءَ دینت ءُ بازیں شخصی کردارانی سرا پہ بے ریائی  بلاجواز ایراد گِرنت۔ ھمے عمل اِنت کہ ایشی ءِ رواج گرگ ءَ بلوچ ءِ تھا مستری ءُ کستری ءِ زانت پشت نہ کپتگ۔ بلے کسی کہ ایشانی چوشیں کینگاں ایر بہ جَنت تہ آ شخصیت پرست ءُ غیر نظریاتی گُشگ بیت۔ من یک گپے مناں کہ تنقید راجی زند ءِ ارواہ اِنت۔ انسانی سما ءَ پلگاریت۔ بلے ھمک تنقید ءُ ایراد راجی زند ءِ اقدار ءُ کیلوانی ردا کنگ بہ بیت۔ زمین جاھنند ءِ روایت، ربیتاں گوں ھمگرنچ بہ بیت۔ مستری ءُ کستری ءِ ھیال ھم گور کنگی اِنت۔ شخصی کردار ءِ شخصیت ءِ منفی ءُ مثبت پہلو تور کنگی اَنت۔ شاھیم ءِ توازن چارگی اِنت۔ ذاتی کینگانی بنیاد ءَ عمل ءَ ابئید شخص ءَ ٹارگٹ کنگ تنقیدے نہ اِنت، بد اخلاقی ئے۔

دومی مئے گورا نظریاتی سیاست ءِ نام ءِ سرا شخصی کردارانی ایرجیگ کنگ ءِ جُھد بیئگ اِنت۔ من پیش ءَ ھمے گپ جتگ کہ نظریہ پوچ اِنت۔ جوانتریں صفت سِتک ایں۔ نظریہ وتساچیں جوڑینتگیں ٹرمے۔ گوں انسان ءِ زاھر ءَ بندوک اِنت۔ مذھبی اِنت ۔نظریاتی بدل بیت کنت۔ مرچیگیں آزادی پسندیں نظریات ءِ منوگر ، باندا پارلیمانی نظریہ ءِ منوک بیت۔ چوشکہ عیسائی مسلمان جوڑ بیت۔ نظریہ زاھری گچینی، زیکیں کھور خان ءُ رازق نظریاتی بوتگ اَنت۔ ۔۔۔ بلے سِتک ابدمان اِنت۔ دائمی اِنت۔ مرگ ءُ زند ءِ ھمراہ اِنت۔ بدل بیت نہ کنت۔ انسان ءِ وتی جند ءِ سرا ستک۔ وتی جنز ءُ جھد ءِ سرا ستک ، آئی ءَ سوب مند کنت۔ بلے گپ کہ نظریہ ءُ شخصیت ءِ کئیت تہ جھان ءِ تاریخ ءَ بازیں مثال ھست اَنت کہ ادا شخصیت ءُ نظریہ یکے گوں دومی ءَ ھمگرنچ اَنت۔ اے گپ ءَ اگاں ما مذھب ءِ حوالہ ءَ بہ زیریں یا سیاست ءِ ۔۔۔۔۔۔۔۔۔۔۔۔ درستیں مذھب ءُ درستیں انقلابی نظریہ درستاں چہ پیش یک ذھنی ءِ پیداوار اَنت۔ او بازیں صفت تھنا یک مردمی ئے تھا بنت، ھرکسے ناں۔۔۔۔۔۔۔۔ پمیشا نظریہ ءَ ھوار شخصیت پرستی ھم المی اِنت۔ 

اگاں ناں بازیں راجی تحریک سیاسی للی پوتینانی نہ زانتکاریانی دیناں رو اَنت۔ تاریخ ءِ تھا بازیں درور ھست اَنت کہ شخصانی روگ ءَ پد نظریات ھچ کار ءَ نیاتکگ، یا تحریک پُرشتگ ءُ کمزور بوتگ اَنت۔ کئے گُشیت فلسطینی گل حماس ءِ باسک غیر نظریاتی اَنت۔ کئے گُشیت کہ تاملاں علم ءُ شعور نیست۔ فلسطینی ءُ تامل قبائلی ھم نہ بوتگ اَنت۔ علم ءُ زانگ ءَ فلسطینی سرجمیں عرباں دیما تر اَنت۔ تامل ھمے وڑ۔۔۔۔۔۔۔ بلے چماں کور ءُ پاداں لنگیں شیخ یاسین ءِ شھادت ءَ پد حماس پنجاہ درصد نزور تر اِت۔ پربھاکرن ءِ بیرانی '' لبریشن ٹائیگرز آف تامل ایلام'' ءِ پروش ورگ ءِ سوب جوڑ بوت۔ 

باز وھد ءَ شخصی کردار تاریخ ءَ ھوار جھان ءِ جغرافیہ ءِ بدل کنگ ءِ سوب جوڑ بنت۔ تاریخ زانت گُشنت کہ اگاں ایڈولف ھٹلر دگہ شش ماہ ءَ زندگ بہ بیت ایں تہ مرچی جھان ءِ بازیں ملکانی سیمسر چہ انوگیں شکل ءَ دگر اِتنت۔ تیمور لنگ ءِ جاہ ءَ چنگیز خان بوتیں تہ مرچی بازیں بالادستیں راجانی جاہ ءَ دگہ نزوریں راج بالادست اِتنت۔ کارل مارکس اگاں مہ بوتیں رشین مرچی دگہ شکلے ءَ دُنیا ءِ دیما اَت۔۔۔۔۔۔ کولمبس مہ بوتیں مرچی امریکا ءَ عرب ءُ انگریز ءُ دگہ قومانی حاکمی اَت۔ نظریہ راج ءَ آگاھی دنت۔ بلے شخص راج ءَ ستک دنت۔ ڈائریکشن دنت۔ اگاں ما علم ءِ کمسٹری ءِ ردا بچاریں تہ ایٹم ءِ کنٹرول کنوک نیوکلیس اِنت۔ نیوکلیس ءِ کردار اگاں ھتم کنگ بہ بیت تہ ایٹم ھم پشت نہ کپیت۔ من ءُ الوک ءُ پَشک ھم لیڈری ءِ قابل نہ اِنت، پہ رھشونی ءَ مزنیں زانت، قوت ارادی ءُ شخصی کرداری ھم ھژدری اِنت۔ 

بلوچ راجی جُنز ءِ تھا مرچی اگاں نواب خیر بخش مری ءِ جاہ ءَ ڈاکٹر حئی بیتیں، ڈاکٹر اللہ نظر ءِ جاہ ءَ ڈاکٹر مالک بیتیں، براھمدگ بگٹی ءِ جاہ ءَ طلال بگٹی بیتیں، خیر بیار ءِ جاہ ءَ کچکول بیتیں تہ بلوچ جنز اے جاہ ءَ سر نہ بوتگ اَت۔ ناکہ واحد قمبر ءُ نبی بنگلزئی ءَ ابئید بلوچ سلاہ بندیں جھد اے جاہ ءَ سر بوتگ اَت۔۔۔۔۔۔۔ پمیشا شخصیت ءِ کرد جھدانی تھا من اِتگیں راستی ئے۔ نظریاتی ءَ ھوار شخصیت پرستی ھم لازمی اِنت۔ اگاں ناں گُڑا نظریہ ءِ مثال ھشتاد  ءِ دھک ءِ کھور خان ءُ رازق ءِ نظریہ ءِ مثال بیت۔ سیاست ءِ تھا علم ءُ اخلاص ءَ ھوار ، تجربہ، وھد ءُ جاورانی ردا فیصلہ کنگ ءِ قوت، شخصی کردار ءُ مھکمیں قوت ارادی ءُ بردبار ءُ برداشت ءِ تاگت ءِ بیئگ ھم ھژدری اِنت۔ اے ردا

سلام صابر ءَ او بابا خیربخش مری ءَ  زمین ءُ آزمان ءِ فرق اِنت۔
حفیظ حسن آبادی ءَ او سردار عطا اللہ مینگل ءَ ھم زمین ءُ آزمان ءِ فرق اِنت۔
ایراد ءِ نام ءِ سرا ٹوھیں راجی رھشونانی شان ءَ گُستاخی ءُ بداخلاقی جوانیں عملے نہ اِنت۔ بائد راج سرپد بہ بیت۔

One Response so far.

  1. یاسر بلوچ ۔تربت says:

    ما اینکرین مزنین زانتکار نیان بلے من واجہ حفیظ باز آڑیکل وتگ ما ہچ جاہ گستاخی ندیستگ۔۔ ھو راست گُشیت راست واچہ گستاخی سخت مردما توریت۔مئی خیالء واجہ شپچراگ راست گُشیت کہ واجہ حفیظ ءُ عطاءاللہ مینگل زمین آسمان ے فرق اِنت ما ہم گشان باز فرق اِنت ۔حفیظ ے دولت آئی قلم اِنت آ آئی ءَپہ راج ءَ استعمال کنگا اِنت سردار مینگل وتی مڈی کوہان گوں سنگاں کراچی ئے مہاجراں بہا کنت زمیناں آرمی بہا کنت۔من فکرکنین اگاں سردار عطااللہ ئے جاگہ حفیظ بلوچستان ئے سنگ بہا کرتین ءُ سردار مینگل ئے جاہ واجہ حفیظ ے ایف سی ءَ پہ چھاونی ءَ زمین بداتین ءُ روچ رامی ءَ زر ئے بگپتین گڈاایشان واجہ حفیظ ے چے حال کتت؟خدا ے نام ءَ حقیقت پسند ببیت

چمشانک بہ دئے