استون شَم ءُ رِد بیتگ اَنت
مُرواردیں تَرَمپ رِتکگ اَ نت
کؤراں لُڑیں آپ آرتگ اَنت
مُچ بیتگ اَنت شھر ءِ جِنک
شھرئیگ ءُ بازار ءِ جِنک
گَنج ءُ گیابیں سیبی یے
سازین ءُ دابانی شَلی
گَٹور چمیں بانڑی
گیپت یے ماں لال ءِ پنجو ءَ
پاد ءِ کُتگ چہ مَنجو ءَ
لال جامگے دات یے گورا
شاری ماں ھیناریں سرا
کہ ما ملپداں سئیل ءَ رویں
ھانی جواب داتگ ایشاں
تَریے جناں ، تَریے جناں
من سئیلیگ ءُ سیلواھی نیاں
گیپتگ من ءَ شومیں تَپاں
سر درد ءُ نکسیں کُلگاں
دُراھیں جنکاں رُمب کُتگ
دست ھانل ءِ جان ءَ کُتگ
ھانی تپے ناں کُلگے
زاناں تو مرید مارشت کُتگ
تئی درداں دْرد ءَ گوارشت کُتگ
شالا مرید آس ءَ کَپات
کہ ھانی ترا آس ءِ کُتگ
ھانی جواب گردینتگ اَت
کہ ”شئے لائق ءِ دُعا ءَ نہ اِنت
دعایانی لائق چاکر اِنت
من دعایاں گونداں چاکر ءَ
رِند ءِ کبیھیں لشکر ءَ
