چوناھا ھرکس ، ھمک ادبی تخلیق ءَ گوں وتی چماں چاریت ءُ معنیٰ دنت۔ ما گُشتگ کہ تخلیق کار ءِ جوانتریں صفت ھمیش اِنت کہ تخلیق ابہام ودی بہ کنت ءُ پہ ھرکس ءَ جُتائیں بزانتے ءِ واھُند بہ بیت۔ ابہامی سنچ تخلیق ءِ ارواہ اِنت ءُ تخلیق ءَ ابدمان کنت۔
ڈاکٹر ءِ فلم ءِ سرا گپ جنگ گرانیں کارے۔ بلے ھمینچو کہ من دیستگ، من مارتگ تہ من ھمے گُشاں کہ بنی آدم ھما زند ءِ غم ءُ گڑتیاں گوں دُچار بہ بیت کہ مرچی بلوچ دُچار اِنت۔ ھما رنگاں قبول کنان ءُ وتی تب ساچی ءَ کنت۔ ڈاکٹر ھمے چاگرد ءُ ھمے تب ءُ نفسیات ءِ درنگازگ ءَ سوب مند بیتگ۔
اگاں ما نفسیات ءِ ردا اے گپ ءَ بزوریں تہ راستی ایش اِنت کہ بنی آدم ءِ سرجمیں کار ءُ کردانی ذمہ وار ھما چاگرد اِنت کہ انسان ھمودا ردوم زوریت۔ بزگی، بے وسی، دلپروشی ءُ دگہ بازیں جنجال بنی آدم ءَ ھما راہ ءَ پِریننت کہ بقول کسہ کار '' جنگ ءَ مقصد مہ بیت تہ مردم مریت'' ۔ غلامیں چاگرد ءَ ردوم زُرتگیں ھمے غم ءُ سکی ءُ سوریاں کہ انسان ءَ بے سریں راھاں پریننت۔ انسان داشتگیں واھگانی بے سوبی ءَ پد ھما شارٹ کٹیں راہ ءَ گچین کنت کہ اے راہ ءَ ھچ وڑیں مقصد نہ بیت۔
بلے فلم ءِ آسر ھمے انسانی صفت ءِ درنگازی اِنت کہ انسان ھمینکہ کرپٹ ءُ سِلکار بہ بیت، بلے آئی ءِ تھا ھمے صفت پشت کپیت۔ انچو کہ سعادت حسن منٹو وتی آزمانک ''ٹھنڈا گوشت'' ءِ تھا ھمے صفت ءُ انسانی نفسیات ءِ درنگازی ءَ کنت۔ چوشیں رنگ ءُ چاگرد ءِ ھمے نفسیاتی پہلو ءِ نیمگ ءَ چدو پیش بلوچی فلمانی تھا باز کم دلگوش دیگ بوتگ یا نہ بیتگ
