بلوچ ءِ نفسیات اِنت کہ باز جاہ ءَ مثبت عمل ءَ منفی شکل ءَ زوریت ءُ وت ءَ تاوان دنت ، وتی برات ءِ سرا دنتان دُرشیت۔ تاریخ ءِ تھا انچیں عملاں بلوچ تاوان داتگ۔ پدا بلوچ ھما راج اِنت کہ اگاں کسے آئی ءَ شگان بہ جَنت ، تہ بلوچ ھما کار ءَ کنت کہ پہ راج ءَ تاوان بار بہ بیت۔ گوستگیں تاریخ ءَ بلوچ ءَ غدارے ءِ شگان کدی جَنگ نہ بوتگ۔ بے دلے ءِ شگان جنگ بوتگ۔ اے ردا بلوچ راجدپتر ءَ میران رند پدریں مثالے کہ میران بلوچانی تھا یک نامئیں کماندارے ءَ ابئید یک سوھو ءُ سرپدیں سیاسی زانوگرے ھم زانگ بیت۔ میران ھم ھما عھد ءِ لِٹکاں شگان جت، بلے میران ءِ جواب ھمے اَتک کہ
گِند یے بے نکاحی چُکاں
ڈوبار اَنت ، منی بالاد ءَ
ھمراہ نہ باں ایشانی
کہ موٹ یے کُت منی پیشانی
میران ماں سرے سواران اِنت
بشے ترونگل ءَ گواران اِنت
ارساں پہ دْردے ریچان اِنت
گواریت ءُ نہ بُریت ھچ بر
لاشار ءِ کلات ءِ دیم ءَ
میران رندانی ھمراہ نہ بوت، زھر زُرتے ءُ تھنائی ءَ شُت ءُ وت ءَ کوشارینت ئے۔۔۔ کسے بیت کنت اے گپانی سرا تپاک مہ کنت ءُ داناگری ءِ شوپچ ءَ بہ کپیت۔ فرانز فینن ءُ روسو ءُ دگہ بازینانی وانگ ءَ پد ، ھمیشانی لیکہانی ردا بلوچ تب ءُ نفسیات ءِ تگ ءُ گیچن ءَ بہ کنت۔ بلے زمین جاھنند ءِ تب ءُ نفسیات گوں وتی گوست ءُ روایتاں بندوک اِنت۔ امریکی قبضہ گیرانی تب ءَ چہ کولمبس عھد ءِ قبضہ گیرانی تب ءِ ردا ردوم زُرتگ۔ ھنگرین ، چائنیز ءُ رشین پمیشا گرم مزاج ءُ ترند تبیں راج اَنت کہ آ زمیناں ھن، ماگاری ءُ منگولانی عھد دیستگ۔ جاپانی ءُ ملیشینانی تب ءَ بدھ مت ءُ شنتو لیکہانی ردا ردوم زرتگ، پمیشا بازیں وھداں جنگانی تھا گوزگ ءَ ابئید ھم آ راج تہہ ءُ توک ءَ ایمن ءُ نرم تب اَنت۔ مھر آشنا اَنت۔ اسلام ءَ عرب متحد کُتاں، بلے پیغمبر ءَ رند عرباں ھما کُت کہ چدو پیش آھاں کُتگ اَت۔
راجانی مرچیگیں تب وڑی ناں وڑی گوں وتی گوست ءَ ھمگرنچ اِنت۔ بلوچ ءِ تب ھم گوں وتی گوست ءَ ھمگرنچ اِنت۔ میرانی تب تاں روچ ء مروچی بلوچ ءِ نفسیات ءِ تھا گندگ کئیت کہ
گندیے بے نکاھی چُکاں
ڈوبار اَنت منی بالاد ءَ
ھمراہ نباں ایشانی
کہ موٹ یے کُت منی پیشانی
بلے نوکیں دور ءِ بلوچ سیاست کار ءَ مدام ڈنی لیکہانی بنیاد ءَ وتی زھگ ءِ تب ساچی کُتگ۔ آھاں میرانی تب ءُ بلوچ ءِ نفسیات ءِ زانگ ءِ جھد نہ کُتگ۔ چیاکہ بلوچ راجکار چہ وتی لٹریچر ءُ چہ وتی گوست ءَ ناآشنا اِنت۔ بلوچ راجکار چہ وتی چاگردی ءُ راجی تب ءَ گِستا اِنت۔ پمیشا نا زیک آ سوب مند بوتگ ءُ ناں مرچی بلوچ ءَ را یک راجی ئے درچ ءَ آرگ ءَ آ سوب مند گندگ ءَ آیگ اِنت۔۔۔۔۔۔۔۔۔۔ھر کس وت سر ءُ پہ دیم اِنت۔ کمیں اختلافانی بنیاد ءَ وتی سنگت ءَ چنگ ءُ نَزآرگ ءَ ابئید بلکیں چہ وت سندگ اِنت ءُ ھمے عملاں تنقید ءُ ایراد ءِ نام ءَ دنت۔ ایشی ءَ چہ زانگ بیت کہ بلوچ ءَ چہ وتی چاگرد ءِ تب ءُ نفسیات ءِ وانگ ءَ زانگ ءَ چہ در ڈنی کتاب ونتگ اَنت۔ آ ھما لیکہانی ردا راجی زند ءُ تب ءِ تگ ءُ گیچن ءِ جھد ءَ کنگ اِنت، ءُ مدام بے سوب اِنت۔۔۔ اکبر خان بگٹی ءِ گوست ھرکسے دیم اِنت کہ بلوچ ءَ ھمے نعرہ جَت کہ
غداروں کی تین نشان
بھٹو، بگٹی ، ٹکا خان
کسانیں اختلافانی بنیاد ءَ بلوچ ءَ اکبر خان بگٹی چہ وت سِست۔ بلے رندا تاریخ ءَ وتی فیصلہ دات کہ اکبر خان بگٹی کئے اِنت ءُ رازق ، کھور خان ءُ مالک کئے اَنت۔ مرچی بلوچ رھشون براھمدگ بگٹی ءِ ھلاپ ءَ لھتے درباری ، لِٹکیں ، بلوچ تب ءُ نفسیات ءَ ناپوھیں قلمکار ، تنقید ءُ ایراد ءِ نام ءِ سرا ھما عملاں کہ کنگ ءَ اَنت۔ پہ لاشعوری ءُ ذاتی کینگ ءُ کستانی بنیاد ءَ بلوچ ءَ سندگ ءِ جھد ءَ اَنت۔ اے پہ بلوچ ءَ جوانیں عملے نہ اِنت۔ بلے تاریخ وتی فیصلہ ءَ دنت کہ براھمدگ کئے اِنت ءُ درباریانی کرد چی اِنت۔۔
اگاں ما بی۔این۔پی مینگل ءِ سروک اختر مینگل ءِ گوست ءِ گپ ءُ گالاں بِچاریں تہ آئی ءِ راجی آجوئی ءِ درچ ءَ نہ آیگ ءِ مستریں سوب ھمے میرانی سنچ ءِ درنگازی اِنت۔ دومی نیمگ ءَ اختر مینگل گل ءِ باسک ھم شھید بیئگ ءَ اَنت۔ او من براھمدگ بگٹی ءِ ھلاپ ءَ آرٹیکلانی وانگ ءَ پد ھمے آسرا سر بوتگ اَنت کہ اے ھما مردم اَنت کہ چدو پیش اختر مینگل بد ءُ رد ءِ کُتگ۔۔۔ اسلم بلوچ ءِ آرٹیکل ءِ وانگ ءَ چہ واجہ ءِ ھمے نفسیاتی نشون رسیت کہ واجہ بابا ئے بلوچ ءِ ھلاپ ءَ ھم کینگانی درنگازگ ءَ چَک ءُ پد نہ بوتگ۔
