مھر ءُ کینگ ازل تہ ابد بنی آدم ءِ ھمراہ اَنت۔ انسانی ابرم ءِ بھر اَنت۔ انسان ھمینکہ وت ءَ بہ ساڑائیت ءُ وت ءَ مھروانی ءِ پنام ءَ بِدنت ، بلے نفرت چرآئی ءَ چہ نہ ھَزیت۔ تاریخ ءِ تھا انسان کدی کدی مھروان بوتگ، عیسیٰ ءِ دروشم ءَ ، محمد ﴿ص﴾ ءِ دروشم ءَ، مہاویر ءِ دروشم ءَ، کرشن ءِ دروشم ءَ گوتم بدھ ﴿سدھارتھ﴾ ءِ دروشم ءَ، بلے انچو گُشئے کہ بنی آدم ءِ گیشتریں بھر ءَ چہ مھر ءَ تُرس اِتگ۔ کینگ داشتگ، کُشت ءُ کوش کُتگ۔ وت ءَ کوشارینتگ ءُ دومی کُشتگ اَنت۔ کدی مُلک ءُ قومانی نام ءِ سرا ءُ کدی خدا ءُ مذھب ءِ نام ءِ سرا۔۔۔۔ چیاکہ بنی آدم زند ءَ بے آسر سرپد بیتگ، پمیشا آئی ءَ چہ زند ءَ مدام نفرت داشتگ، آئٰی ءَ مدام زند ھتم کنگ لوٹ اِتگ۔ بنی آدم ءَ کدی رہبانیت ءِ آسرا زند ھتم کنگ لوٹ اِتگ۔ سور ءُ سانگ ءُ زالبولانی گُما وپت ءُ واب ءِ سرا پابندی جتگ ءُ سیکس ءَ نفرت کنگ ءِ درس داتگ۔ رہبانیت ، زالبول ءِ گُما نفرت ھم اگاں بچاریے ، تہ بنی آدم ءِ چہ زند ءَ نفرت ءُ زند ءَ ھتم کنگ ءِ درچ ءَ کئیت۔ مرچیگیں نوکیں دور ءِ "اسقاط حمل'' ءِ فلسفہ ﴿ زالبول ءِ چُک دانی ءِ تھا زھگ ءَ ودی بوئگ ءَ پیسر کُشگ ءُ دور دیگ ، آپریشن، میڈیکل ءِ زبان ءَ (suction-aspiration) یا (dilation evacuation D&E) ﴾ ھم ھمے بنی آدم ءِ چہ زند ءَ بیزاری اِنت، نفرت اِنت،زند ءَ ھتم کنگ ءِ ابرم ءِ درنگازی ءَ کَنت۔ انسان ءَ چہ وت تُرسیت۔ گیشیں آبادی ءِ تُرس ءَ انسان دلتپرکہ کُتگ۔
دومی زند ءَ ھتم کنگ ءِ ابرم بنی آدم ءَ کُشت ءُ کوش ءِ شکل ءَ درنگاز اِتگ۔ کُشت ءُ کوش ءِ عمل ءَ انسان مذھب ءِ نام دنت۔ قومی نام دنت۔ بلے راستی ایش اِنت کہ انسان زند ءَ بے آسر سرپد بیت ءُ ھتم کنگ لوٹیت۔ اے ردا حیات بعد الموت ءِ لیکہ ھم ھمے زند ءِ بے آسری ءِ تُرس ءِ ایرجیگ کنگ ءَ انسان ءِ ذھن ءِ پیداوار اِنت۔۔
زند ءِ بے آسری ءِ تُرس ءَ انسان ءَ ھما کار کُتگ کہ کنگی نہ اِنت۔ بلے انسان دگہ چی بہ کنت؟۔۔۔۔۔۔۔۔۔۔۔۔ تموچن کہ تاریخ ءِ تھا چنگیز خان ءِ نام ءَ زانگ بیت۔ دوازدھمی صدی ءَ چنگیز خان میان اشیا ءِ بازیں ملکاں کُشت ءُ کوش کنت ءُ واتر اوغانستان ءَ سر بیت۔ ماں اوغانستان ءَ بامیان ءِ دمگ ءَ چنگیز خان ءِ دو نماسگ پٹھانانی گُما جنگ ءَ کُشگ بنت۔ چنگیز خان وتی لشکر ءَ حکم کنت کہ بامیان ءَ ھچ زندگیں سھدار پشت مہ کپیت۔ چنگیز خان ءِ حکم ءِ پدا اے شھر ءِ سرجمیں سھدار کُشگ بنت۔ مال ءُ دلوت ھم بکشگ نہ بنت۔ لاپ پُریں زالبولانی لاپ تَل کنگ بیت ءُ آھانی لاپ ءَ چہ زھگ کَشگ بنت ءُ جنگلی رسترانی دیم ءَ چگل دیگ بنت۔ اے عمل ءَ چنگیز خان وتی دوئیں نماسگانی کوش ءِ پُژدر ءَ کَنت۔ چیاکہ چنگیز ءَ گوں وتی نماسگاں مھر بیت۔ ھمے مھر ءِ پژگرد ءَ نفرت ردوم زوریت۔۔۔۔چیاکہ پہ چنگیز خان ءَ گوں نماسگاں مھر، آھانی کوش ءِ پُژگرد ءَ کُشت ءُ کوش ءُ نفرت ءِ درانگازگ ءِ نام اِنت۔ بلے چنگیز خان اے گپ ءَ نہ ماریت کہ ترکستان ءَ بگر تاں چائنا ءَ لکھانی ھساب ءَ بنی آدم آئی ءِ لشکریاں کُشتگ اَنت۔ اے ھم ماتانی بچ بیتگ اَنت۔ چیاکہ چنگیز خان ءِ سنچ ءَ زند ءَ چہ نفرت ءِ انسانی اجتماعی ابرم ءِ پژدر ءَ ردوم زُرتگ۔ چنگیز خان ءِ مھر ھمیش اِنت کہ آ بے آسریں زند ءِ سنچ ءَ ایرجیگ کنگ لوٹیت۔ نماسگانی کوش ءِ آسرا، ﴿یا چدو پیش کہ آئی ءِ پت ءُ برات ءُ زھگ منگولی قبائلیانی دست ءَ کُشگ بوتگ اَنت﴾ آ زند ءَ بے آسر سرپد بیت ءُ آ چہ زند ءَ نفرت کنت ءُ کُشت ءُ کوش کنت ءُ ھزارانی ھساب ءَ انساناں کُشیت ءُ بے آسریں زند ءِ ھتم کنگ ءِ جُھد ءَ کنت۔۔۔۔۔۔۔۔۔۔
بلے انسان باز رند ءَ مھروان ھم بوتگ۔ آئی ءَ زند ءَ ساٹگ ءُ پلگارگ ءِ جُھد کُتگ، برے عیسیٰ ، برے محمد ﴿ص﴾، برے کرشن، برے لاوتزے، برے کنفیوشس ءُ برے گوتم بدھ جوڑ بیتگ۔ بلے انسان کجام زند ءَ بہ ساٹیت ءُ بہ پلگاریت؟ ھما کہ بے آسر اِنت؟ پمیشا انسانی راجدپتر ءَ مدام مھر ءِ پژگرد ءَ کینگ ءَ ردوم زُرتگ۔ افغانی مُلاھانی مھر ءِ گُڈی نشانی، مھر ءُ محبت ءِ پیغمبر حضرت گوتم بدھ ءِ بے ساھیں بتانی پروشگ ءُ بیگواہ کنگ ءِ پُشت ءَ ھمے سنچ اِنت کہ بنی آدم مھر ءَ پہ مدامی گار ءُ بیگواہ کنگ لوٹیت۔ بے آسریں زند ءَ پہ مدامی ھتم کنگ لوٹیت۔۔۔ پمیشا ماں اے جھان ءَ امن ءُ ایمنی ءِ ھاترا جاک ءُ کوکار کنوکانی واب کدی ھم راست بیت نہ کنت۔ ناکہ انسان نکوکار ءُ شرپ مند ءُ مھروان جوڑ بیت کنت۔ پمیشا بے آسر ءُ پناہ بیوکیں زند ءِ درد ءُ اندوھاں عطا شاد ءِ وڑیں کواس ءُ زانتکاریں شاعرے ھم لاچار کُتگ کہ بہ گُشیت۔
مھرانی زھیرانی باھوٹ ءَ نہ داریت کَس
دریگت کہ بہ بُرتیں تو گوں وت منی ساہ ءَ را
مھرانی زھیرانی باھوٹ ءَ نہ داریت کَس
دریگت کہ بہ بُرتیں تو گوں وت منی ساہ ءَ را
