زُلم ءِ بازیں تھر بنت۔ پاکیں قرآن ھمک چاگردی سلکاری ءُ ابرم ءِ ھلاپ ءَ کار کنگ ءَ زُلم ھساب کنت۔ خدا ءِ داتگیں طبعی علم ءِ نہ مَنگ ءَ بگر تاں راجانی کُشت ءُ کوش، عام چاگردی سلکاری شپکی، دُزی، جوا ءُ ھر ھما کار کہ چرآئی ءَ دومی انسان ءِ حق جنی ءِ گمان ھست ، آ ابرم ءِ ھلاپ ءُ زلم اِنت۔ جھان ءِ کُلیں مذھبانی ردا رنڈی گری، ہم جنس پرستی، بچک ءِ گوں بچگ ءَ سوار بیئگ ءُ وتی نفسی واھگاں پیلہ کنگ ھم ابرم ءِ ھلاپ اِنت ءُ زُلم ھساب بیت۔ خدا ءِ داتگیں طبعی علم 

ألا تطغوا في الميزان وأقيموا الوزن بالقسط

گوں شاھگانیں بزانت ءَ انسانی ابرم ءَ گوں ھمگرنچیں ، بدیں ءُ نیکیں واھگانی تورگ ءُ گیشینگ ءِ ، بدیں نفسی واھگانی ایرموش کنگ ءُ نیکیں راہ ءِ سرا گام جنَگ ءُ انسانی چاگرد ءَ برابری ءِ چماں گوں چارگ ءِ ھما ابرمی رھبند اِنت کہ ھمک انسان اے رھبند ءِ سرا روگ ءِ واھگ ءَ داریت ، بلے ذاتی واھگ، کینگ ءُ دُنیاٰئی لَب ءُ لالچ ، من ءِ بادشاھی ءُ زوراکی بنی آدم ءَ چہ ابرمی راہ ءَ گِسر کَنت۔

دُنیا ءِ تاریخ ءِ تھا بازیں زوراکیں راج گوستگ اَنت کہ آ ابرمی علم ءِ ھلاپ ءَ شُتگ اَنت ۔ آ چہ تباھی ءَ نہ رک اِتگ اَنت۔ غیر فطری عمل، یا ابرم ءِ ھلاپ ءَ کار کنگ ءِ آسرا کہ راج تباہ ءُ برباد بوتگ اَنت۔ گار ءُ بیگواہ بیتگ اَنت تہ ایشانی تاریخ دو شکلاں مئے دیما اِنت۔ یکے دومی راجانی حق جنی ، کُشت ءُ کوش، لگتمالی ءُ دومی راجی اندری تکاں زلم، شپکی، دُزی ، قحبگی، دروگ بندی ءُ گوچلی ءُ دگہ بازیں چاگردی سلکاری اَنت کہ راجانی بربادی ءُ تباھی ءِ آسر جوڑ بنت۔

زُلم ءُ چاگردی سلکاریانی چاگردی ءُ نفسیاتی تپاس؛

اے ردا اگاں ما انسانی چاگرد ءِ سرا چماں شانک بدئیں، تہ مارا ھمے نشون رسیت کہ زلم، زوراکی ، شپکی ءُ دزی ، شبرھی کُشت ءُ کوش اگاں یک راجی ئے یا چاگردی ئے تھا ردوم بزور اَنت۔ یک حدے انچیں کئیت کہ پدا ایشانی دارگ نہ بیتگیں گپے جوڑ بیت۔ آخر ھما راج ءُ چاگرد ءِ تباھی ءِ سوب جوڑ بنت۔ چوشیں کردانی اگاں دارگ ءِ جُھد مہ بیت تہ ھما راج ءُ چاگرد ءِ تب ءِ بھر جوڑ بنت۔ چوشیں کردانی آسر ھمیش اِنت کہ آ راج تاریخ ءِ دنزانی تھا بیگواہ بیت۔ نفسیات دان ١۲ صد پیش مسیح تاں ۳ صد پنجاہ عیسوی ءَ رومی راج ءِ بربادی ءِ سوب ءَ دومی راجانی سرا زلم ءُ چاگردی سلکاریانی سوب گُشنت۔ رومی دری راجانی سرا زلم کنگ ءَ گیش اندری چاگردی سلکاریانی آماچ بیتگ اَنت۔ دُزی، شپکی ، ھم جنس پرستی، افیون ءُ شراب ءِ نوش کنگ ھما ابرم ءِ ھلاپ ءَ کار کرد بیتگ اَنت کہ تاریخ زانت ، ایشاں رومی راج ءِ یا رومی تہذیب ءِ پُرشت ءُ پروش ءِ سوب سرپد بنت۔ تانکہ رومیانی آخری بادشاھاں وتی شرم ءُ ننگ بُراِتگ اَنت ءُ گوں بچکاں سانگ کُتگ، ﴿ روم ءِ بازیں سیزر ءُ حاکماں وتی ماتانی گُما وپت ءُ واب کُتگ،روم ءِ تاریخ ءِ انچیں بادشاہ گوستگ اَنت کہ آھاں وتی جند ءِ جنیں زھگانی گُما سانگ ءُ وپت ءُ واب کُتگ، جولیس سیزر ءِ نماسگ، آگسٹس ءِ زھگ کلاڈيیٹس ءَ وتی گھار جولیا ءِ گما سانگ کُتگ، رندا اے کار دودی جوڑ بیتگ ءُ رومی قانون ءِ بھرے﴾ ءُ شراب ءُ افیون نوشی رومی راج ءِ عادت جوڑ بیتگ ءُ ھمے سلکاری رومیانی بربادی ءِ سوب جوڑ بیتگ اَنت۔ دومی رومیاں حضرت عیسیٰ ءِ منوگر ھزارانی ھساب ءَ بستگ ءُ زندھاتی مانداشتگ اَنت۔ تاریخ گواہ اِنت حضرت عیسیٰ ءِ منوگر روچ ء مروچی کروڑانی ھساب ءَ ھست اَنت ءُ رومیانی ھما حاکمیت تاریخ ءِ تھا بیگواہ اِنت۔ چیاکہ رومیاں ابرم ءِ ھلاپ ءِ کار کُتگ۔

چاگردی سلکاری ءُ زلم راج ءُ چاگردانی تب ءِ بھر چون جوڑ بنت؟

ھما چاگرد یا راج ءِ تھا یک نسلے ردوم زورگ ءَ اِنت۔ ھما زھگ یا نسل ءِ تب ءُ سنچ ، ھما کردارانی دیستگیں عملانی بنیاد ءِ سرا وتی تب ساچی ءَ کَنت۔ ھما فلم ءِ کردارانی ھمک عمل ءَ وتی ذھن ءِ تھا نقش کنان کنت ءُ ردوم گیپت، بدیں چاگرد ءِ زھگ بدیں کردانی سرا وتی سنچ ءَ ساچان کنت ءُ جوانیں چاگرد ءِ زھگ نیکیں کردانی سرا اثر زوران کنت۔ زھگ ءِ ذھنی عمر دوازدہ سالاں سرجم بیت۔ دوازدہ سالانی تھا زھگ ھما چاگرد ءِ ھما کرداں گوں دوچار کپیت ، ھما کردار آئی ءِ دل ءُ ذھن ءِ سرا نقش کِلنت۔ اگاں بدیں کرد زھگ ءِ ذھن ءِ سرا نقش بہ بنت تہ پدا آ زھگ ءِ ساٹگ ءُ پلگارگ دروگیں ھیالے۔۔ دومی ھمک کرد راج یا چاگرد ءِ موروثی سوغاتی جوڑ بنت۔ اوشو ﴿گرورجنیش﴾ گُشیت

"جَن ءُ مرد وپت ءُ واب ءِ وھد ءَ بدنی کمیونیکیشن ءَ ھوار ذھنی ءُ روحانی کمیونیکیشنے ءَ گوں دُچار بنت، اے ردا مرد ءِ تب ءُ ھیلانی اثرات پیدا بیوکیں زھگ ءِ سرا ھم کَپ اَنت"

نفسیات ءِ ردا اگاں ما بچاریں اے منی چکاس اِتگیں راستی ئے، چاگرد ءَ مردم کہ ھما کارانی واھند اِنت۔ کُشت ءُ کوش ءِ وھد ءَ ، دُزی ءُ شپکی ءِ وھد ءَ، ھمک چاگردی سلکاریانی کنگ ءِ وھد ءَ انسان ھما نفسی تناؤ ءُ ذھنی گپچلانی آماچ بیت۔ اے گپچل انسان ءِ موروثی CELL آنی سرا اثر انداز بنت۔ ھما CELL آں ھمے ھیل ءُ عادتانی قالب ءَ گوں رجان کنَنت، چیاکہ انسان یک مھلوکے ءَ ھوار یک میکانکی مشینے ھم ھست اِنت۔ سائنس ءِ ردا ھمے ھیل ءُ عادت D.N.A ءِ موروثی بھرانی وسیلت ءَ جن ءُ مرد ءِ وپت ءُ واب ءِ وھد ءَ پیدا بیوکیں زھگ ءَ منتقل بنت ءُ ھما ھیل ءُ عادتانی ردا زھگ ءِ تب ساچی بیت۔ پمیشا من پیشی بلوچانی اے بتل ءَ سائنسی راستی ئے سرپد باں کہ

"اصل ءَ کار کَنت آدم ذات"

اے گُشتگیں گپانی آسرا من ھمے گُشاں کہ ھما راج دومی راجانی سرا زُلم ءُ زوراکی بہ کَنت۔ یا ھما راج کہ تہہ ءُ توکی تکاں چاگردی سلکاری، کُشت ءُ کوش، نشہ، دروگ بندی ءُ گوچلی ءُ دگہ شومیں نادراھیانی آماچ بہ بیت۔ اے ھیل ءُ عادت نسل در نسل ھما راج یا چاگرد ءِ تھا ردوم گران کن اَنت۔ دانکہ اے ھیل ءُ عادت ھما راج ءُ چاگرد ءِ تب ءُ سنچ ءِ بھر جوڑ بنت ءُ آ راج یا چاگرد انچیں حدے ءَ سر بیت کہ پدا آئی ءِ شر بئیگ دروگے ءُ ھمے ھیل ءُ عادت ھما راج یا چاگرد ءِ تباھی ءُ بربادی ءِ آسرا سرجم بنت ءُ آ راج تاریخ ءِ دنزانی تھا بیگواہ بیت کہ انچو جھان ءِ بازیں راج بیگواہ بیتگ اَنت ءُ آھانی نام ءُ نشان نیست اِنت.