(بلوچ ھما مات ءُ گُھارانی نام ءَ آھاں وتی بچان ءَ بالاچی گھگیری ءِ سکین داتگ)
زانتکارے ءِ گُشتن اِنت کہ ‘‘زھگ ءِ اولی دربرجاہ مات ءِ کُٹ اِنت‘‘
زھگ ءِ بنکی دربرگ ءِ سالاں یا ‘‘پیریڈ‘‘ ءَ ما دوازدہ سال گُشت کنیں۔ او اگاں ما انسانی تب ءَ بچاریں، آ تاں دوازدہ سال ءَ ھما علم ءُ زانگ ءَ دربارت تہ عمر ءَ آئی ءِ تب ءُ زانش ھما ھساب ءَ ودان کنت۔
نوکیں سائنسی علم ءَ ھم اے گپ گیشینتگ کہ درکسانی ءَ زھگ ھما ذھنی ءُ بدنی جنجالاں گوں دُچار بیت۔ ھمے گَڑ ءُ منج تاں سرجمیں زند ءَ آئی ءِ سرا چٹی بنت۔ آ کس ھما رنگاں گوں وت ءَ رجان کنت۔
دگہ لیکہے ھم چوش اِنت کہ انسان ءِ ذھنی ردوم تاں دوازدہ سالاں برجم مانیت۔ دوازدہ سالاں ھما علم ءُ زانت زھگ ءِ ذھن ءَ نادینگ بیت۔ تاں عمر ءَ آ مزن بیان بیت ءُ ھما اثراتاں قبول کنان کنت۔
اے سرجمیں گپانی ردا ما اگاں بہ جیڑیں ، بچاریں تہ زھگ ءِ علمی ءُ سِنچی دیمروئی ءِ مستریں وسیلت ماتی زبان اِنت۔ بلوچ کہ پیداک بیت آ بلوچ اِنت۔ آ مات ءِ کُٹ ءَ چہ بلوچی دربارت۔ پمیشا ما اگاں اے گپ ءَ ھم بہ گُشیں کہ یک راجی ءِ مستریں پجار آئی ءِ زبان اِنت۔ زھگ وتی راجی قدر ءُ کیلوآں تاں دوازدہ سال ءَ ماتی زبان ءَ دربارت ءُ وتی راجی قدر ءُ کیلوآں زانت ءُ ٹھینیت۔ راجی زند ءُ کیلوآنی ٹھینگ ءَ ماتی زبان ءِ لبز ءُ گالبندانی مزنیں ارزشت ءُ بستارے، بلوچ زھگ کہ ودی بیت تہ درستاں چہ پیش آئی ءَ ‘‘آستینک سُھیل دیمپان کُتگ‘‘ ءِ نمیرانیں سبق دیگ بیت۔ بلوچ زھگ ءَ را مات ءِ کُٹ ءَ چہ قمبرے مات ءِ مارشتانی سکین دیگ بوتگ کہ
‘‘شیروں پھل اِنت اگاں تو بُرتگیں آواراں دوبر بہ ترین یے، اگاں ناں تہ تئی رودینگ ءَ بزاں من زھریں کرگ آپ داتگ اَنت‘‘
ھمے علم ءُ سکین اِنت کہ بلوچ زھگ ءَ اولی دربرجاہ مات ءِ کُٹ ءَ رستگ۔ پمیشا ماتی زبان ءِ مزنیں بستارے منگ بیتگ۔
بلے اگاں ما بلوچ زھگ ءِ بابت ءَ گپ بہ جنیں تہ چُش نہ اِنت۔ ادا چوش نہ اِنت۔ بلوچ غلام کنگ بوتگ۔ بلوچی زبان ھم غلام کنگ بوتگ۔ ڈنی ءُ دری زبان ءُ لیکہ بلوچ زھگ ءِ سرا چٹی کنگ بوتگ اَنت۔ بلوچ زھگ کہ وتی اولی دربرجاہ ءِ چارمی ءُ پنچمی سال ءُ سیماں سر بیت تہ آئی ءَ بلوچی ماتی شھدیں زبان ”بلوچی“ ءَ ابئید دُژمن ءِ زبان ءَ تعلیم دیگ بُنگیج بیت ءُ ڈنی لیکہ ءُ ھیال پہ زور مئے زھگ ءِ سرا مُشگ بنت۔ ادا چہ زھگ ذھنی غلام جوڑ کنگ بیت ءُ تاں زندگ اِنت ھما دُژمن ءِ علم کہ آئی ءَ ‘‘غلامانہ نظام تعلیم‘‘ گُشنت زھگ ءِ ذھن ءِ تھا چھر وارت( ادا من ھمے گالبند ‘‘غلامانہ نظام تعلیم‘‘ کہ کارمرز کُتگ اے اردو گالبندے، ایشی ءَ پدر اِنت کہ اردو ءِ اثرات منی ذھن ءُ ھیالانی تھا ھست اَنت، چیاکہ من ءَ بنگیجی تعلیم دُژمن ءِ زبان ءَ دیگ بوتگ، ھمے سنچ اِنت کہ منی لاشعور ءِ تھا چھر وارت)
نو ما چاریں کہ اے ڈنی نظام تعلیم ءِ اثرات چی بنت؟ اے ہرکسے دیم ءَ زاھر ءُ پدر اِنت۔ ھما بلوچ کہ وت ءَ آجوئی پسند گُشنت ، ھمے اثرات ھم آھانی ذھن ءُ لاشعور ءِ تھا چھر وراَنت۔ پمیشا گپ ءُ ھبر ءِ وھد ءَ دُژمن زبان ءِ ھیال ءُ لیکہ مئے ذھنانی تھا چھر ورنت۔ مئے ادبی تنقید بہ بیت یا سیاسی، وڑی ناں وڑی ھمے اثرات گندگ آیگ ءَ اَنت۔ بلوچ نبشتہ کار ءِ تنقید ءُ نبشتانکانی تھا مرچی اردو ءِ بے سِلکیں رنگ وڑی ناں وڑی گندگ آیگ اِنت۔
بنکی دربرجاہ ءَ رند وھدی بلوچ زھگ عملی زند ءِ تھا کئیت، تہ آ پدا ھما اثراتاں قبول کنان ءُ روان کنت۔ چیاکہ ھما زبان ءَ کہ آئی ءَ تعلیم دیگ بیتگ، آ دُنیا ءِ کُجام سرھالانی سرا ھما زبان ءِ ٹھینتگیں لبزانک ءَ وانیت۔ وت ءَ گار کنت۔
مرچی کسے منیت یا نہ منیت۔ ما ذھنی نادراھی ءِ آماچ بیتگ ایں، مئے سیاسی لبزانک اردو زبان ءَ ٹھینگ بئیگ اِنت۔ مئے سیاسی لبز ءُ گالبند ڈنی زبان ءِ گالبند اَنت۔ ھمے گالبندانی سکین ءَ مئے راجی سِنچ ءَ را ٹھینگ بیئگ اِنت۔
چرے نادراھی ءِ رکگ ءِ ھاترا بلوچ ءَ ڈنی ونتگیں سرجمیں لیکہ ءُ ھیال شموشگ لوٹنت ءُ بس بلوچیت ءُ بلوچی زبان یات کنگ کپ اَنت۔ سید ءُ فاضل گیرآرگ لوٹ اَنت۔ بلوچ ءَ وتی زھگ ءِ سنچ بالاچی گھگیری ءِ ”جگردی آپ داتگیں سنگانی‘‘ مارشت ءِ سکین ءَ سینگارگ ءُ پلگارگ لوٹیت، ناکہ دگہ ازم ءُ بلاہ ءُ پترانی نام ءَ۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(اے چاریں دانک دوشی یک سنگتے ءِ سوج ءُ سرانی سکین ءَ نبشتہ کنگ بوتگ اَنت)
