
مرچی ھمے گِندگ بیئگ اِنت کہ یک نیمگے اے استان تہ ءُ توکی مالی ءُ سیاسی جنجالانی دیمپان اِنت۔ دومی نیمگ ءَ بلوچ ءِ آجوئی ءِ جنگ ءَ اے استان تاں حدے ءَ سرین پروش کُتگ ءُ میان استمانی تکاں ھم اے دروگ بندانی امیج جوانیں نگاھاں گوں چارگ نہ بیت۔ جھان ءِ سلامتی ءِ ھاترا ھم اے استان درد سر جوڑ بوتگ ءُ عالمی terrorism ءِ سروکے ءَ ھم کنگ اِنت۔ بلے اے مُلک ءِ نیم زندیں تلام ءَ را چد ءُ گیش زندگی دیگ ءِ ھاترا ھما پندل کہ سازگ بیئگ اِنت ، آ پاکی وتگڑیں ”آمیدگس“ ءِ پندل اِنت۔ باز بلوچ رھشون ءِ سرا بزگیں راج ءَ مزنیں اوست ءُ اُمیتے داشتگ، مرچی گُمان بئیگ اِنت کہ آ پاکی ”آمیدگس“ ءِ دام ءَ کپگ ءَ اَنت۔ یا کہ اے پیش ءَ ھمے دِنگیں مرد بیتگ اَنت۔ ایشاں گوں بلوچ راج ءُ گُلزمین ءَ ھچ وڑیں مھر ءُ دوستی نہ بیتگ۔
کماش نواب اکبر خان بگٹی ءِ شھیدی ءَ پَد واجہ ءَ پہ مَڑاہ گُشتگ اَت کہ ”پاکستان ءِ گُما بلوچ ءِ سیادی ءِ بندیک پیش ءَ باز نزور بوتگ، بلے اکبر خان ءِ شھادت ءَ ھمے بندیک سِستگ“ بلے من ابکہ ءُ ھیراناں کہ مرچی اے کُجام بندیک اِنت کہ واجہ ءَ گوں اے وتگڑیں استان ءَ بندوک کنت کہ واجہ پدا پہ شان گُشیت کہ ” پاکی آمیدگس پما رُژن ءِ گُڈی اوتاگ اِنت“ نو زانگ بئیگ اِنت واجہ ءِ تضادیں گپانی بندیک ءِ اڈ دیوک ھمے قحبگیں مُلک ءِ آمیدگس اِنت۔ بلے بلوچ ءِ بندیک چہ اے استان ءَ سِستگ ءُ نو ایشی ءِ جوڑ دیگ ءَ ناں آمیدگس کارا کئیت ءُ ناں دوتل ءُ دو پوستی ءِ سیاست۔۔۔۔۔۔۔۔۔۔۔۔۔۔۔۔۔۔۔ آخر اے دروگ ءُ دوتل ءُ دوپوستی ءُ پردہ پوشی تاں کدین ءَ۔۔۔۔۔۔۔۔۔۔ کئے تاں کدین ءَ بلوچ ءِ نام ءِ سرا بلوچ ءَ ریپینیت ءُ رد دَنت؟ کئے تاں کدین ءَ شھید ءِ لاشانی سرا گوزیت ءُ ھوناں بھا کنت؟
خلیل جبران گُشیت،
”چکاس اِتگین ءَ دوبر چکاسگ مزنیں نادانی ئے“
بلوچ ءَ گُشتگ کہ
”مردم ءَ یکیں ھونڈ ءِ دپ ءَ دوبر سیاھمار نہ وارت“
مرچی بلوچ اے راستی ءَ سرپد ءُ پوہ اِنت۔ آ پاکی آمیدگس ءِ سرا ھِچ وڑیں سِتک ءُ بھیسہ نہ داریت۔ بلوچ ءَ وتی دوست ءُ دُژمن ءَ زانگ ءِ ھم مارِشت ھست اِنت۔ بلوچ پاکی آمیدگس ءُ اے استان ءِ ملا ءُ چودھریانی دروگ ءُ گوچلیاں شَر سرپد اِنت۔ بلے بلوچ ءِ جُست الم ھمیش بیت کہ اے کجام بندیک اِنت کہ بلوچ ءَ گوں اے وتگڑیں استان ءَ ڈَک دَنت۔ اے کُجام ”آمیدگس“ اِنت کہ پہ بلوچ ءَ رُژن ءِ گُڈی چراگ اِنت ، واجہ۔۔۔۔۔۔۔۔۔۔۔۔۔۔۔۔۔۔۔۔ پرنس آغا کریم ءُ نواب نوروز خان اللہ ءِ پاکیں کلام ءِ نام ءِ سرا آرگ ءُ زندان ءُ پاھو ءَ سر کنگ بوتاں۔۔۔ پہ بلوچ ءَ پاکی آمیدگس رُژن ناں بلکیں تھاریانی نام اِنت۔ چیاکہ بلوچ ”یکیں ھونڈ ءَ دوبر مار ءِ ڈنگ جنگ“ ءِ فلسفہ ءَ آشنا اِنت۔
کجام کسے ءِ پاکی ملایانی وتگڑیں آمیدگس ءِ سرا سِتک ءُ یقین دارگ بلوچ ءِ راجی پجار ءَ نہ منگ ءِ برابر اِنت۔ آمیدگس ءِ سرا سِتک ءُ بھیسہ دارگ ءِ مقصد ھمیش اِنت کہ بزاں تو دُنیا ءَ ھمے نشون ءَ دیگ لوٹ یے کہ بلوچ وتی راجی آجوئی ءِ جنگ ءَ کنگ ءَ نہ اِنت۔بلکیں پاکی فیدریشن ءِ تھا نندگ ءُ وتی حقاں گِرگ لوٹیت۔ پاکی ”آمیدگس“ ءِ سرا سِتک دارگ بلوچ راجی سِنچ ءُ بلوچ ”نیشنلزم“ ءِ نفی اِنت ءُ بلوچ راج ءِ گُما غداری ءُ شھید ءِ ھونانی گُما دغا اِنت۔ بائد چوشیں مردم وتی ذاتی نپانی ھاترا نیشنلزم ءِ مقدسیں گالبند ءَ کارمرز مہ کن اَنت۔ چیاکہ ”نیشنلزم“ پہ راجی وتواکی ءُ راجی پجار ءُ آجوئی ءِ ھاترا چہ زند ءَ سرگوزگ ءِ نام اِنت ناکہ پاکی آمیدگس ءِ سرا ستک ءُ بھیسہ ءِ نام اِنت۔ بلے اے واجہ تاں کدین ءَ اے بزگیں راج ءَ ریپیننت۔ واجہ تو وتی زبان ءَ گوں ھمے گپ ءَ جن یے کہ 1948 ءَ بلوچ ءِ سرزمین آوار جنگ بوتگ ءُ بلوچ ءِ تاریخی حیثیت ءُ آجوئی ھلاس کنگ بوتگ، پدا قبضہ گیر ءِ آمیدگس ءُ پارلیمان ءِ سرا سِتک دارگ کُجام منطق ءُ دلیل اِنت۔ اے تاریخی راستی اَنت۔ پاکی آمیدگس ءُ پارلیمان ءِ سرا بھیسہ دارگ تاریخ ءِ نفی کنگ اِنت۔ کسے کہ تاریخ ءَ نفی بہ کنت تہ تاریخ ھم آئی ءَ نفی کنت ءُ آ راج ءِ دیم ءَ رُسوا بیت۔ ھما بزاننت ءُ آھانی کار۔۔۔۔۔۔۔۔۔۔۔۔۔۔۔۔۔۔۔ بلے تاریخ ھما آدینک اِنت کہ مدام راستی ءَ پیشداریت۔ بلے نو بائد نیشنلزم ءِ راستیں رھبند ڈسگ ءُ پیشدارگ بہ بیت تاکہ نیشنلزم ءِ نام ءِ سرا دوتل ءُ دوپوستیں سیاسی کھلاڑی بلوچ ءَ مہ ریپیننت۔ من کَس ءَ نہ گُشاں، بلے راستیں آدینک ءِ تھا ہرکس وتی اصل دروشم ءَ گِندیت تہ من میاریگ نیاں۔۔۔۔
رِتکگیں ھون منی ماپ ترا صد رندا
پُرُشتگیں سِنگے ترا ماپ نہ بیت بولان ءِ