تُپنگ چہ دست ءَ دؤر دیگی نہ اِنت، چیاکہ دُژمن ءَ ھم تُپنگ دست ءَ اِنت، آ مُدام تُپنگ ءِ زبان ءَ گَپ جَنت، یک سنگتے ءِ شھیدی یا ٹپی بیئگ ءَ پَد ، دومی سَنگت تُپنگ ءَ چِست بہ کنت، ھمے تُپنگ اِنت کہ دُژمن ءَ تورینیت۔
کماش نواب خیر بخش مری
اگاں پہ راستی چارگ بہ بیت تہ کماش نواب خیر بخش مری ءِ اے گُشتن بلوچ ءِ تچکیں راہ ءِ نشان ءَ دینت۔ بلوچ ءَ شست ءُ پنچ سال اِنت کہ پاکستان ءِ پارلیمنٹ ءِ نام ءَ رَد ورگ اِنت۔ بلوچ بنکی سِنچ یا راجی جَنز ءَ تاوانے رَستگ، ھمے پاکستان ءِ وتگڑیں پارلیمنٹ ءَ داتگ۔ لاپ گار ءُ نپ دوستیں رھشون ءَ راجدوستی ءِ نام ءِ سرا بلوچ رِد داتگ ءُ تنیگہ ھم ھمے لٹک ءُ دُز ءُ ڈنگ بلوچ ءِ سرا چٹی اَنت۔ شعوری سیاست ءِ نام ءِ سرا بلوچ ءِ بنکی بلوچی سنچ ھتم کنگ بوتگ۔ بلوچ ءِ غلامی ءِ ودینگ ءِ ھاترا لاپ گاراں پندل ساز اِتگ ءُ گوستگیں پنجاہ سالاں بلوچ ءَ ریپینگ ءَ اَنت۔پارلیمانی سیاست ءِ نام ءِ سرا بلوچ ءِ تُپنگ چہ دست ءَ ایرگیجگ بوتگ ءُ بلوچ وت ماں وتی گپچلانی تھا دؤر دیگ بوتگ ءُ بلوچ ءِ شان ءُ مڑاہ ایشاں درمیانہ طبقہ ءِ سیاست ءُ نام گیپتیں شعوری سیاست ءِ ھرجان جتگ۔ وھدیکہ بلوچ سنچ ءُ شعور ھمیش اِنت کہ آ وت ءَ بلوچی سرپد بہ بیت ءُ بلوچ ءِ ننگ ءُ غیرت ءُ شان ءُ مڑاہ ءِ برجاہ دارگ ءِ ھاترا وتی گھگیریں سراں ندر بہ کنت۔
مرچی ھمے تُپنگ ءِ توار ءَ بلوچ ءِ توار ماں میان استمانی تکاں بُرتگ ءُ سَر کُتگ۔ ناکہ دوتل ءُ دو پوستیں ءُ نام گیپتیں راجدوست ءِ پارلیمانی سیاست ءَ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ پمیشا کسے ءَ کہ کمے عقل ءُ ھوش بہ بیت آ نواب خیر بخش مری ءِ اے لیکہ ءَ صد درصد راست من ایت۔۔۔۔
بلے ابکہ کنوکیں گَپ اِش اِنت کہ بلوچ ءَ ناں تاریخ ءُ وتی پیشی رَدیاں سبق زُرتگ ءُ ناں بلوچ ءَ شھید ءِ رِتکگیں ھون ءُ کپتگیں لاشاں چہ شعوری پُختگی، زانت ءُ بنکی نیشنلزم ءِ سبق دَر بُرتگ۔ بلوچ ءِ یک بھرے تہ انگت پہ ذاتی نپ ءُ فائدگ ءُ نوکری ءُ مراعات ءِ ھاترا ھمے پارلیمانی گلانی رندا تچگ ءَ اَنت۔ پرچا؟؟؟ راجی غیرت ءُ ننگ ءِ قیمت زاناں لھتے ذاتی مراعات ءُ نپ بیت کن اَنت۔ بلوچ ءَ گُشتگ۔
ملکموت ساھے نہ بخشیت
کَس وتی ننگ ءَ نہ کَشیت
تاں کدین ءَ ما رَد کپیں؟ دوتل ءُ دوپوستیں این۔پی ءُ دُزیں میر محمد علی ءُ اسد ءُ احسان گونگیں ڈُنگانی رندا کپوکیں بلوچ ءَ بائد اے گپ بِزانتیں کہ شھیدیں راج پُل ءِ ھونانی بدل، بلوچ ءِ راجی غیرت ءُ ننگ ءِ بدل لھتے ذاتی مراعات ءُ نَپ بیت نہ کن اَنت۔ راجی کاملیں سِنچ (Collective consciousness) نیشنلزم ءِ راستیں بنیاد ءَ ایر کنت ءُ ھمے رھبند ءِ سرا راج وتی ڈس اتگیں منزل ءَ سَر بیت۔ قومیت ءِ درچ ءَ آیگ ءَ اجتماعی راجی شعور ءِ آیگ ھژدری اِنت۔ راجی زند ءَ اے ھما مرحلہ اِنت کہ بقول ء کماش نواب خیر بخش مری اجتماعی راجی سِنچ تاں ھمدا آسر ایت کہ
”بلوچ وتی قوت ءُ توان ءَ دُژمن ءِ دست ءَ بہ گیپت ءُ بہ گُشیت کہ منی سرزمین ءَ در کَپ“
بلے ما تہ انگت اجتماعی شعور ءُ کاملیں راجی یے درچ ءَ وت ءَ آؤرت کُت نہ کُتگ۔ مئے تھا آ شعوری صورت ءَ آ وڑیں شعوری پُختگی نیاتکگ۔ گوستگیں دہ سالاں ھزارانی ھساب ءَ بلوچ ورناہ ءُ کماش شھید بوتگ اَنت۔ مئے تھا لھتے بلوچ برات تہ انگت پہ ذاتی نپ ءُ فائدگانی ھاترا ھمے بلوچ دُژمن پارلیمانی پارٹیانی رندا تچگ ءَ اَنت۔ پرچا؟ ما پرچا گوں تپاکی ءَ نواب خیر بخش مری ءِ داتگیں فکر ءُ لیکہ ءِ سرا یک مُشت نہ بئیں۔ مئے یک بھرے تہ انگت پارلیمانی دُز ءُ ڈنگانی رندا تچگ اِنت۔ مارا چیا شھید ءِ رِتکگیں ھون دیم ءَ نیاینت۔ شھید ءِ مات ءُ گُھارانی چیھال پرچا مئے گوشاں نہ کپ اَنت؟ مئے لھتے بلوچاں نواب خیر بخش ءِ داتگیں لیکہ شُمشتگ۔ شھید ءِ رتکگیں ھون بیھال کُتگ اَنت۔ ٹپ ءُ ٹوریں لاش مئے دیما نیاینت۔ ما تہ انگت چیا پہ لھتے نپ ءُ فائدگانی ھاترا دُزیں محمد علی ءُ غفور رُپت ءُ روپ ءِ رندا کپتگیں۔ لھتے بلوچ این۔پی ءَ بلوچ ءِ راجی حقانی پاسدار سرپد بیت۔ وھدیکہ ما سرپدیں کہ بی۔این۔پی (عوامی) دُزانی ٹولی ئے ءُ این۔پی ءِ تھا امام بھیل ءِ وڑیں کُشندہ ءُ راج کُش ءُ منشیات فروش ھوار اَنت۔۔۔۔ ما پرچا تہ انگت شھید ءِ رِتکگیں ھونانی گُما دغا کنگ ءَ اِنت؟ ما تاں کدین ءَ وتی ردیانی آس ءَ وت ءَ سوچین ءُ مانداریں۔۔۔۔۔۔۔۔۔۔۔۔۔۔۔۔۔۔۔
بلوچ ءَ نو اے گپ زانگی اِنت کہ مئے دوست پارلیمانی دُزیں لیڈراں یا نواب خیر بخش ءُ آئی ءِ زھگ ( خیر بیار، براھمدگ ءُ اللہ نظر ءُ واحد قمبر ءُ سرمچار)۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلوچ ءَ نو اے گپ زانگی اِنت کہ مئے دوست پارلیمانی دُزیں لیڈراں یا نواب خیر بخش ءُ آئی ءِ زھگ ( خیر بیار، براھمدگ ءُ اللہ نظر ءُ واحد قمبر ءُ سرمچار)۔۔۔۔۔۔۔۔۔۔۔۔۔۔۔۔۔۔۔۔۔۔۔۔
