Facebook
RSS

اسلام ءِ ھلاپ ءَ تامُر، امریکا ءِ یا مسلمان حاکمانی پندلے؟

-
شپچراگ

مرچی سرجمیں اسلامی نام گیپتیں مُلکاں ماں امریکا ءَ اسلام ءُ پاکیں پیغمبر ءِ ھلاپ ءَ جوڑ بیتگیں تامُر ءِ ھلاپ ءَ ڈاہ ءُ شور اِنت۔  پہ راستی اے فلم ءِ شنگ بیئگ ءَ گیشتر تاوان امریکا ءَ رَستگ ءُ رسگ اِنت۔ ماں لیبیا ءَ امریکی سفارت ءِ سرا اُرش بیتگ ءُ چر ایشی ءَ چہ امریکی سیفر گوں سئے مردماں بیران بوتگ۔ تیونس ءَ امریکی سفارت ءَ آس ماندارگ بوتگ ءُ دگہ بازیں ھنداں امریکا ءِ ھلاپ ءَ زھرشانی ءُ مسلمانانی نفرت ءِ درنگازگ برجاہ اِنت۔


امریکی سرکار ءِ گُشگ اِنت  کہ من ءَ گوں ”ٹیری جونز گروپ“ ءَ ھچ وڑیں سیادی نیست۔  نو اے ھم جیڑگ لوٹیت کہ باریں اے تامر امریکا ءِ ھلاپ ءَ مسلمان حاکمانی پندلے نہ اِنت۔ اے تامر ءِ شنگ کنگ ءِ مول ءُ مراد اے ھم بیت کن اَنت کہ  مسلمان ھنداں امریکا ءِ ھلاپ ءَ اجتماعی کینگ ءُ نفرت ردوم بہ گیپت۔ چیاکہ اے ھند ءُ دمگانی مھلوک کہ کرناں مسلمان حاکماں غلام داشتگ اَنت۔ مرچی مھلوک ھمے زوراکیں حاکمانی ھلاپ ءَ چِست اِنت۔ بازیں قومی ءُ آشوبی جُنزاں یورپ ءُ امریکی انسان دوستیں مھلوک ءِ پلہ مرزی گون اِنت۔ پمیشا اے گُمان ھم رَد کنگ نہ بیت کہ اے تامُر مسلمان حاکمانی وتی نیم زندیں حاکمی ءَ برجاہ دارگ ءِ ھاترا یورپ ءُ امریکا ءِ ھلاپ ءَ مزنیں پندلے۔ ۔۔۔۔۔۔۔۔ چیاکہ مرچی مڈل ایسٹ بہ بیت یا ایشیا ، بازیں ھندانی مھلوک چہ زوراکیں حاکماں بیزار بوتگ اَنت۔  سعودی عرب ءَ ھمے السی آگاھی ءِ دیمگیری ءِ ھاترا بازیں بے سوتیں سیاسی ءُ آئینی بدلی ھم آرگ بوتگ اَنت۔


چوناھا کجام پیغمبر ءُ مزنیں مردم ءِ شرپ ءَ گُستاخی ، کجام مذھب ءِ شان ءِ ھلاپ ورزی جوانیں عملے نہ اِنت۔ انسانی قدر ءُ کیلوآنی ھلاپ اِنت۔ بلے مسلمان کجام اسلام ءِ گپ ءَ جَن اَنت؟ اسلام ءِ بنکی لوٹ ، آئی ءِ رھبند ءُ اصولانی پاسداری اِنت۔ اسلام برابری ءُ امن ءُ ایمنی ءِ دین اِنت۔ اسلام زوراک ءِ ھلاپ ءَ توار چِست کنگ ءِ نام اِنت۔  مسلمان حاکماں مرچی اے زیب نہ دَنت کہ آ یک سلکاریں گروپے ءِ کردانی سرا یورپ ءُ امریکا ءَ ایر بہ جناں۔ چیاکہ اسلامی بنکی رھبند ءُ اصولانی پاسداری چہ اسلامی مُلکاں یورپ ءُ امریکا ءَ گیشتر بیئیگ اِنت۔۔
 
دومی اے کجام اسلام اِنت؟ کہ مرچی لھتے مردمانی ردی ءَ سرجمیں اسلامی نام گیپتیں مُلکاں امریکا ءِ ھلاپ ءَ ڈاہ ءُ شور اِنت۔ زاناں مُلایاں اسلامی حاکمانی اے بزگیں مھلوک ءِ سرا زُلم ءُ زوراکی نظر ءَ نئیت؟ گوستگیں دو سالاں لکھانی مردم مسلمان حاکمانی جتگ ءُ کُشتگ اَنت۔ ملایاں چیا نہ گُشتگ کہ اے اسلام ءِ ھلاپ ءَ پندلے، چیاکہ مصر ءُ تیونس ءُ لیبیا ءَ مُرتگیں مردم مسلمان بوتگ اَنت۔ بلوچستان ءَ گوستگیں دہ سالاں پاکستان ءِ اسلامی نام گیپتیں لشکر ءَ ھزارانی ھساب ءَ بلوچ شھید کُتگ اَنت۔ مسلمانیں بلوچ زالبولانی شرپ ءُ عزت لگتمال کُتگ۔ یک روچے یک مسلمان مُلکے یا حاکمی پاکستان ءِ اے عملاں ایر نہ جَنت۔ انگت سعودی عرب ءِ وڑیں نام گیپتیں زوراکیں استان ءِ پہ بلوچ ءِ چُک چینی ءَ پاکستان ءَ ھر وڑیں کمک دیگ اِنت۔ وھدیکہ امریکا یا یورپ ءَ انسان دوستیں گلے زالمیں حاکمانی اے عملاں ایر جَنت ءُ ایردستیں مھلوک ءِ پلہ مرزی ءَ کنت تہ مُلا گُشنت کہ اے اسلام ءُ اسلامی مُلکانی ھلاپ ءَ پندلے۔۔۔امریکا ءَ یک دُزیں گروپے تامُرے جوڑ کنت، ملا گُشنت کہ اسلام ءِ ھلاپ ءَ سازشے ۔۔۔۔۔۔۔۔۔۔ کجام اسلامی مُلک؟ ھما کہ بزگ ءُ ایردستیں مھلوک ءِ شرپ ءَ لگتمال کنگ ءَ انت۔ کرنے بیت کہ اے بزگیں مھلوک ءِ سرا چَٹی اَنت۔


اے سرجمیں گپاں چہ ابئید، اے گُمان ھم رَد کنگ نہ بیت ماں امریکا ءَ جوڑ بیتگیں تامر مسلمانیں حاکمانی امریکا ءُ یورپ ءِ ھلاپ ءَ پندلے۔ چیاکہ اے لوٹ اَنت کہ ادا ایردستیں مھلوک اجتماعی صورت ءَ یورپ ءُ امریکا ءِ ھلاپ جوڑ بہ بیت ءُ چہ آھاں نفرت بہ کنت ءُ پہ مدامی غلامی ءِ ساد اے نزانتکاریں مسلمانانی گردن ءَ لوپ بہ بیت۔

منی گوں بلوچ برات ءُ گُھاراں دزبندی اِنت کہ خدا ءَ چاریے، شُما اے پندلاں ھوار مہ بئت ءُ  امریکا ءُ یورپ ءِ ھلاپ ءَ ھچ چُشیں ھال ءُ ھبر پوسٹ ءُ شئیر مہ کن یے کہ آ ھمے پندل ءِ بھر بہ بنت۔

چمشانک بہ دئے