کدی کدی دِل گُشیت نبشتہ مہ کن۔چے نبشتہ کن یَے؟ پہ کیا کَن ئے؟ دور دَر مُلک ءَ ڈیھ ءِ جاوراں چہ ھِچ وڑیں سرپدی نہ رسیت۔ بس ھالتاکاں ھال شِنگ اَنت۔ ڈیھ ءِ دیناں رپتگیں بچانی تیراں سُپتگیں لاشانی عکس دیم ءَ کاینت۔ ھالتاکاں ھال شنگ بنت کہ مات تہ انگت غلام اِنت ءُ بَچ بھر ءُ بانگ اَنت۔ رھبند یکیں بلے کِشک باز، مات یکین اِنت کہ چہ دُژمن ءِ چنگلاں رکینگی اِنت، بلے ہر کس ءَ مرچاں پہ وت جُتائیں رھبندے ٹھینتگ۔ رھبندانی سرا نوکیں رھبند گچین کنگ بوئگ اِنت۔ یکیں باگ (نظریہ) ءِ دامن ءَ نوکیں باگ ٹھینگ بوتگ اَنت ۔ ما گپ ءَ درست آجوئی ءِ جنیں۔ گُڑا پرچا بازیں ٹکانی تھا بھر ءُ بانگ اِنت۔ پرچا یکمُشت نہ بئیں۔ ھالتاکاں گپ شِنگ بنت۔ ما بس یکے دومی ءَ ڈوباریں، دُژمن مئے یکیں پنجاب ءُ آئی ءِ زر خریدیں میر ءُ سردار اَنت(رئیسانی، ثنا اللہ زھری، عوامی ءُ درمیانہ طبقہ ءِ رھشون ءُ دگہ بازیں بلاہ ءُ بتر)۔۔۔ زاناں بچاں دَمبُرتگ؟
وھد ءِ سَبک گامیں قلم، چی چی نبیس یَے پہ کیا؟
دَمبُرتگیں مرد ءِ کمان ، بیھال کنت تیراں وتی
بلے عکس گوں من ھمتران بنت۔ نبشتہ کنگ ءِ سکین ءَ دینت۔ اے ھما راج شھیدانی عکس اَنت کہ آھاں پہ اے مات ءِ شرپ ءُ عزت ءِ پھریز ءَ۔۔ پہ بلوچی زبان ءُ بلوچ گُلزمین ءِ پھریز ءَ درکسانی ءَ وتی سر ندر کُتگ اَنت ءُ گوں بالاچی شان ءَ نمیران بوتگ اَنت۔ ما عکسانی بولیاں سرپد بیئگ ءَ اِنت۔ ما چہ وت ھمے جُست ءَ بہ گریں کہ ما ھما قول ءُ کرارانی پاسداری ءَ کنگ ءَ اِنت کہ آ سوگند ما گوں عکسانی واجھاں ھور نِشتگ ءُ وارتگ۔ یا ما بس گُشتن ءُ لبزانی سرا وت ءَ زندگ داشتگ ءُ بس گپ جنیں ءُ دل ءَ سھڑینیں، ما عمل ءَ پوچ اِنت۔ آ کُجام سوگند اِنت؟ ما دل ءَ بہ جیڑیں ، ما آ سوگند ءِ سرا اوشتاتگ اِنت؟۔ ہر بلوچ ءَ جیڑگ لوٹیت۔
پہ راج ءِ ھاتر ءُ آزاتی ءِ پھریزگ ءِ دیم ءَ
انارکانی سرا ایر رِتکگیں ارسانی سوگند اِنت
دگہ ھم شھد زبان ءُ دُربیان باز اِنت کناں کوتاہ
پہ مردی وارتگیں ٹَپانی ھونشنزانی سوگند اِنت
گریب ءُ چورہ ءُ بزکار ءُ بے مات ءُ پِتیں چُک ءِ
دگہ ھم شھد زبان ءُ دُربیان باز اِنت کناں کوتاہ
مسامانی سرا اوشتاں وتی گالانی سوگند اِنت
ما راج ءِ آزاتی ءُ چورھیں چُکانی انارکانی سرا شَل گیپتگیں ارسانی سوگند گوں شھیداں الم ھور وارتگ۔ نو مارا جیڑگ لوٹیت کہ ما گوں شھید ءَ ھور وارتگیں سوگند ءُ مسامانی پاسداری ءَ کنگ ءَ اِنت یا شھد زبان ءُ دُربیانانی لَڑا ھوار اِنت، ھُشکیں گپ جنیں ءُ دل ءَ وش کنیں۔ من کہ جیڑاں وت ءَ دُربیانانی لَڑ ءِ مسافرے سرپد باں، دگرا نہ زاناں۔ بلے سلام اِنت ھما بچ ءَ کہ تہ انگت وتی وارتگیں سوگند ءُ مسامانی سرا اوشتاتگ ءُ وتی مُچی برجم داشتگ ءُ دُژمن ءِ تیراں وتی بالاد ءَ زیرگ ءَ تیار اِنت (سرمچار ءُ بی۔ایس۔او)۔۔۔۔۔۔۔۔۔۔۔۔
مرچیگیں عکس ھما زھگ ءِ عکس اِنت کہ آ وتی بُرتگیں آوارانی پد جنگ ءَ پہ شانے اوشتاتگ۔ اے بلوچ ءِ پدریچ اِنت کہ وتی وشیں باندات ءِ دز گرگ ءَ ، وتی مات ءَ چہ غلامی ءَ رکینگ ءَ گوں کسانکیں بالاد ءَ میدان ءَ اوشتاتگ۔ مارا چہ سوال کنگ اِنت۔ ھما میر ءُ سرداراں چہ سوال کنگ کہ آھاں وتی ذاتی نپانی ھاترا گوں جناح ءَ سَٹ ءُ سودا کُت ءُ بلوچ ءِ گُلزمین بخشات ءُ بلوچ ءِ باندات تھاریانی تھا چگل دات۔ اے زھگ چہ مُرتگیں ءُ زندگیں راج غدار ءَ ھمے جُست ءَ کنگ اِنت کہ منی حق ءُ اگبالانی جُست ءَ ترا کئے کنت؟۔۔۔۔ اے زھگ چہ ما جُست گرگ اِنت کہ منی وار ءُ بزگی ءِ ذمہ وار کئے اِنت۔ اے سوال پہ مدامی مئے دَرمُلکانی دل ءُ ضمیرانی تھا چھر وارت۔۔ بس مئے یکیں جواب اِنت
من میاریگاں ءُ رَد واراں تئی ، پَھِلوں بہ کن بانُک کہ من
نابزانتی واھگ ءِ بے آسریں کارانی آسر لوٹ اِتگ
