گُشنت دروگانی بازیں تَھر بنت۔ سائنسی دروگ، سیاسی دروگ، مذھبی (ملائی) دروگ ءُ دگہ بازیں۔ بلوچاں گُشتگ دروگ ءِ بُن ٹُنگ اِنت۔ یکے ستر وش ءُ شیرکنیں دروگ بہ بندیت۔ بلے وھدیکہ راستی دیم ءَ کئیت ، دروگ پدر بیت۔ پاکستان ھما مُلک اِنت کہ اے استان ءِ بنیاد ھم مذھبی دروگانی بنیاد ءَ ایر کنگ بوتگ۔ بزاں دو راجی لیکہ، ھندو ءُ مسلمان دو جُتائیں راج اَنت۔ ھمے دروگ ءِ راست کنگ ءَ ملا ءُ پاکستانی وتگڑیں رھشون روچی ھزار دروگ بند اَنت۔ دروگ ھما سِلیں بیماری اِنت کہ ھمے نادراھی ءِ پژگرد ءَ دگہ بازیں نادراھی ردوم گِر اَنت۔ پمیشا پہ پاکستانی ملایاں قحبگی، گوچلی، منافقت ءُ زنا بالجبر ءُ ھچ وڑیں سلکاری عیب نہ اِنت۔ بلے دروگ الم دروگ بیت ءُ راستی دیم ءَ کئیت ، پمیشا پاکستان ءِ وتگڑیں استان کہ دروگانی بنیاد ءَ جوڑ کنگ بوتگ۔ نو وتی مرگ ءِ گُڈی سیمسران اِنت۔
بلے زانوگر گُشنت کہ تاں راستی سر بہ کشیت، دروگ جھانے سوچیت۔ بلے سائنسی دروگ چُش نہ اِنت۔ اے زوت پدر بیت۔ چیاکہ سائنسی راستیانی بنیاد تجربگانی سرا ایر کنگ بیت ءُ دیم ءَ آرگ بیت۔ پمیشا مرچی باندا ڈاروین ءِ وڑیں سائنٹسٹے ءِ انسانی ارتقا ءِ وڑیں لیکہے ءِ ھُنڈالاں جُنزگے زُرتگ ءُ آئن اسٹائن ءِ لیکہ راست ثابت بوتگ اَنت۔ چیاکہ آئن اسٹائن ءِ لیکہ تجربگانی سرا ایر کنگ بوتگ اَنت ءُ آئی ءِ ”اضافیت“ ءِ وڑیں لیکہ ءَ نوکیں عھد ءِ سائنس ھم دروگ بند کُت نہ کنت۔
من گُشاں سائنسی دروگ ءِ بُن وتی جاہ ءَ ایشی ءِ دپ ءَ ھم بلاھیں ٹُنگے پِر۔۔۔۔۔۔ پمیشا سائنسی دروگ ءِ پاشک بیئگ ءَ بازیں وھد درکار نہ اِنت۔ اے کرن ءِ مستریں سائنسی دروگ بند پاکستان ءِ آغا وقار احمد اِنت کہ اے مرد بازیں دُزی ءُ ڈنگی ءِ کیساں ھم ھوار اِنت۔ بلے گوستگیں روچاں اے مرد ءَ جار جتگ اَت کہ ”من آپ ءِ سرا سفر جنوکیں گاڑی جوڑ کُتگ“۔۔۔۔۔۔۔۔۔ اے مرد ءِ اے گپ رندا دروگ مَنگ بوت، بلے پاکستانی ملا وتی دروگیں گپانی سرا روچ ء مروچی اوشتاتگ اَنت۔
