(ھما بلوچیں مات ءُ گُھارانی نام ءَ کہ آھاں وتی بالاچیں بچان ءَ ”جگردی آپ داتگیں سِنگانی“ سکین ءَ رودینتگ)

                         مَن گُشتگ اَت کہ زھگ ءَ را نیشنلزم ءِ مارشت درستاں چہ پیسر ھما وھد ءَ گور جَنت کہ آ مات ءِ کُٹ ءَ ھمے راستی ءَ سرپد بیت ءُ فھم اِیت کہ ‘‘پمیشا من یک راجیاں کہ من ءَ یک زبانے ھست کہ آ زبان کَش ءُ گور ءِ راجانی زبان ءَ چہ جتا اِنت“۔۔۔۔۔ ماتی زبان اِنت کہ آ زھگ ءَ گوانزگ ءِ تھا وتی راجی ھستی ءُ ”نیشنلزم“ ءِ ابدمانیں مارشتاں بَخشائیت۔ راج ءِ زبان راج ءِ بنکی قدر، کیلو ءُ دود ءُ ربیتاں ٹھینیت۔ راج ءِ پجار، ربیت، راجدپتر ءُ راجی زند ءَ گوں بندوکیں کُل شئے، ماتی زبان ءِ لبز ءُ گالبندانی منت ءَ زندگ اَنت۔ پمیشا زبان ”نیشنلزم“ ءِ مستریں پجار اِنت۔ 

                              نیشنلزم ءِ پجار اگاں جُتائیں جغرافیائی بستار، ڈیھ ءُ کلچر ءِ بنیاد ءَ کنگ بہ بیت۔ پدا لبز (زبان) اِنت کہ راجی زند ءَ گوں ھمگرنچیں ھمک کیلو ءُ رھبنداں زندگیں ارواھی بخشائیت۔ لبز مہ بنت، راجی زند ءَ گوں بندوکیں کیلو ءُ رھبندانی بستار نہ مانیت۔ لبز راجی زند ءِ ارواہ اِنت۔ زبان راجی زند ءَ گوں بندوکیں تب ءُ رھبنداں زندگیں معنیٰ ئے بخشائیت۔ پمیشا گُشنت کہ درستاں چہ پیش لبز جوڑ بوتگ۔ سید گُشیت

                                       گال نام منی ، نام تئی  ، نام  خدا  ئَے

                                       بے گال ءَ من ءُ تو ، خداوند مجاں گار

                                                                                   

                                                               (حضرت سید ظھورشاہ ھاشمی " رحمة الله عليه")

                          ”بلوچی پمیشا بلوچی نہ اِنت کہ بلوچ ءِ زبان اِنت۔ بلکیں بلوچ پمیشا بلوچ اِنت کہ آ بلوچی ءَ گپ جنت، براھوئی (بُرز کوھی) ءَ گپ جَنت‘‘۔۔۔۔۔۔۔۔۔۔۔۔۔۔۔۔۔  بلوچ زھگ ءَ را نیشنلزم ءِ مارشت ھما وھد ءَ بیت کہ بلوچی ءِ لبزانی ھیل گرگ ءَ بندات کنت۔ دومی پہ راج ءَ زبان ءِ بستار ھمیش اِنت کہ پہ زِندگ بیئگ ءَ ساہ ءِ کَشگ۔۔۔۔۔۔۔۔۔۔۔۔۔۔۔۔۔۔۔ انسان ابئید آکسیجن ءَ ساہ کَش اِت نہ کنت۔ ماتی زبان ءِ لبز ءُ گالبندانی بِستار ھم پہ راجی زِند ءِ ٹھینگ ءَ ھمیش اِنت۔۔۔

                              ھمے لبز اَنت کہ بلوچ زھگ ءَ ماں گوانزگ ءَ راجی ھستی ءُ نیشنلزم ءِ نشونداری ءَ کَن اَنت۔ بلوچ زھگ ماتی زبان ءِ لبزانی مِنت ءَ وتی راجی سِنچ ءُ نیشنلزم ءِ فکر ءُ مارشتانی ماڑی ءِ بُن ھِشت ءَ ایر کنت ءُ وت ءَ زانت، وتی بلوچی پجار ءَ زانت ءُ وتی راجی ربیتانی سبق ءَ یات گیپت۔

                             من گُشتگ اَت کہ ماتی زبان ءِ ھمک لبز، پہ زھگ ءَ زندگیں راجدپترے ءِ بستار ءَ دارَنت۔ پہ راج زھگ ءِ سِنچ ءِ ساچگ ءَ ماتی زبان ءِ لبز ءُ گالبند چو ”تریاک“ ءَ اثر مند بیت کن اَنت۔ ماتی زبان ءِ ھمک لبز ،گالبند، ھما گُلزمین ءِ ابرم ءِ سرچمگانی زیمرانی تواراں گوں ھمگرنچ اَنت۔ ماتی زبان ءِ ھمک لبز مات گُلزمین ءَ گوں سیادی داروکیں ابرم، درچک ءُ دار ءُ کوہ ءُ اگاراں زندگیں توارے بخشاینت ءُ ھمے توار اِنت کہ زھگ ءِ دل ءُ ضمیرانی تھا زیمراں مان گیجیت ءُ زھگ ءَ را راجی پجار ءِ نشون ءَ دَنت۔ اگاں لبزانی سرچمگ ھُشک بہ بنت تہ راج زھگ ءِ فکر ءُ ضمیر ءِ سرچمگ ھم ھُشک بنت۔۔

                            لبز مُردگ نیاں، زندگ اَنت۔ انچو کہ سھدار زندگ اِنت، لبز ھم زندگ اَنت۔ ھمک راج ءِ یک ماتی زبانے بیت۔ زبان ءِ ھمک لبز ءِ پُشت ءَ یک شاھگانیں راجدپترے بندوک اِنت۔ آ راجدپتر ھما راج ءِ تاریخ اِنت۔ ھمے تاریخ راج زھگ ءِ تب ءُ ابرم ءَ گوں ھمگرنچ اِنت ءُ راجی ھستی یے پجار۔۔۔۔۔۔ پمیشا ھمے لبزانی مِنت ءَ راج زھگ وتی راجی بستار ءَ زانت ءُ مات ءِ کُٹ ءَ نیشنلزم ءِ سبق ءَ دربارت۔۔۔۔

                             حضرت علی ءِ اے گُشتن راجی زبان ءِ ھمے بستار ءَ گیشّینَنت کہ

                                                     ”زھگ ءِ اولی دربرجاہ مات(گُلزمین) ءِ کُٹ اِنت“

                            چیاکہ راج زھگ وتی زبان ءِ اولی لبزاں چہ مات ءِ کُٹ ءَ ھیل گیپت۔