ما مارگ ءَ ایں کہ مرچیگیں جاورھالاں کہ بلوچ راج تاریخ ءِ گرانتریں دور ءِ تھا گوزگ اِنت۔ اے یک انچیں وھدی پہ بلوچ ءَ اَتکگ کہ اجتماعی صورت ءَ بلوچ ھمے تُرس ءِ آماچ اِنت، ھمے بیم ءَ گور جتگ کہ بلوچ ءِ راجی پجار ءُ آئی ءِ زبان چر آئی ءَ چہ مہ ھز اَنت ءُ گار ءُ بیگواہ مہ بنت۔ اے ھما جاور ھال اَنت کہ تاریخ ءِ تھا بازیں راجانی سرا گوستگ اَنت۔ اے ھما راجانی اجتماعی سنچ ءُ زانت ءَ گوں کارداریت کہ آ چوشیں جاورھالاں، چوشیں وھداں پہ دژمن ءِ مکر ءُ پندلانی دیمگیری ءِ ھاترا، گوں یک دستی ءُ تپاکی ءَ راجی پجار ءُ وجود ءِ پھازگ ءَ وتی جنز ءَ دیم ءَ بُرت کنت یا عھد ءِ کھرمانیں وھشتانی میار بنت ءُ پہ مدامی بیگواہ بنت۔ بلے اے درگت ءَ اگاں ما بلوچ راجی جنز ءِ سرا گوستگیں دہ سالاں چماں شانک بِدئیں تہ ھمے گپ زانگ بیت کہ بلوچ ءَ تاں حدے ءَ سوب مندی رَستگ۔۔ دُژمن ءِ زلم ءُ زوراکی، ٹپ ءُ ٹوریں لاشانی چگل دیگ ءَ بلوچ ھچ وڑیں بیم ءُ ترس ءِ آماچ نہ کُتگ ءُ وتی راجی غیرت ءُ پجار ءِ پھازگ ءَ پہ تمردی گام جنان اِنت ءُ دیم ءَ جُنزان اِنت۔ اے سوب مندی بلوچ ءَ ھمے قربانیانی بدولت ءَ رَستگ کہ اے جھد ءِ تھا اکبر خان، بالاچ، غلام محمد، شیر محمد ءُ دگہ بازیں بلوچ کماش ءُ ورناھاں وتی گھگیریں سر ندر کُتگ اَنت ءُ گوں وتی ھونانی جلکش ءَ بلوچ راجی جنز ءِ درچک سیراپ کُتگ۔
بلوچ ءَ وتی راجی پجار ءُ غیرت ءِ پھازگ ءَ وتی سر داتگ اَنت۔ بازیں ماتانی تاسپیں بچ ءُ گھارانی شرپ مندیں برات ءُ زالانی سموئیں قولی بلوچ جھد آجوئی ءِ ڈیساں رپتگ اَنت۔ نو بلوچ ءَ وتی شھید ءِ ھونانی پاسداری کنگی اِنت۔ بلوچ ءِ کجام وڑیں عمل کہ چر آئی ءَ راجی جھد ءَ تاوان بہ رسیت، آ شھید ءِ رِتکگیں ھونانی گُما دغا بازی ئے بیت کنت۔ راجی جنز ءِ تھا ہرکس ءَ ذاتی نپ شموشگی اَنت ءُ راجی نپاں گوں وت ءَ بندوک کنگی اِنت۔ بلوچ ءَ چد ءُ گیش تپاکی ءُ یکوی ءِ درنگازی کنگی اِنت۔ گوں تپاک ءُ یکمشتی ءَ وتی جنز ءَ را دیم ءَ برگی اِنت۔۔ بلے راجی تپاکی چتور ءُ چون؟۔۔۔۔۔۔۔۔۔۔۔۔۔۔۔۔۔۔۔۔ وھدیکہ راجی تپاکی ءِ گپ اِنت، مارا اے ھم چارگ لوٹیت کہ راجی تپاکی گوں ھما گل ءُ راجدوستاں بیت کنت کہ آھانی رھبند بس ھما رھبند اِنت کہ ھمے رھبند ءِ سرا، پہ بلوچ راجی پجار ءِ پھازگ ءُ بلوچ ءِ وجود ءِ برجاہ دارگ ءِ ھاترا بازیں ماتانی بچاں، گھارانی براتاں، بلوچ ورناہ ءُ کماشاں وتی سر داتگ اَنت۔ اے ردا ھما گلانی گما تپاکی کہ آھانی لیکہ ءُ رھبند چر اے رھبند ءَ گِسر بہ بیت، تہ آھانی گما تپاکی بلوچ شھید ءِ ھونانی گما غداری ءِ ھساب ءَ کئیت۔۔۔۔ مارا مارگ لوٹیت، چارگ لوٹیت کہ ما دانکہ چنکہ وتی راج شھیدانی ھونانی پاسداری ءَ کنیں۔۔۔۔ مارا گپچلانی تھا کپگ نہ لوٹیت۔ قومی راہ بس آجوئی ءِ راہ اِنت، قومی وجود ءُ راجی غیرت ءِ پھازگ ءِ راہ اِنت۔۔۔۔۔
بلے اے سرجمیں گپاں چہ ابئید بنکی گپ من آئی ءَ درنگازگ لوٹاں۔ آ اِش اِنت کہ مرچی اے جاورھالانی تھا بلوچ سئے ٹکانی تھا بھر اِنت، بلوچ ءِ ھشتاد درصد آجوئی ءِ واھگ دار اِنت۔ دومی ھما بلوچ کہ آ لاپ ءَ لاچار کُتگ کہ آ سرکاری کارگس ءُ ادارھانی تھا کار بہ کنت(بلے اے وھد جتگیں بلوچ راجی جنز ءَ تاوان ھم دات کنت، آ فوج ءَ رؤت یا پولیس ءَ یا پہ لاپ ءَ کجام دندایا کنت، دلاری بہ بیت کہ منشیات فروشی)۔۔۔ بلے سیمی ٹک کئے اِنت؟ ما سیمی کردار ءِ بابت ءَ پکائی ءَ سہی ءُ سرپد نہ اِنت۔ ھمے سیمی کردار اِنت کہ آ راجی غلامی ءُ بلوچ ءِ بزگی ءِ سوب جوڑ بوتگ۔ غریبیں بلوچ فوج ءَ کار کنت یا پولیس ءَ یا کجام سرکاری ادارہ ءَ ۔۔۔۔۔۔ آئی ءِ کردارانی ذمہ وار ھمے سیمی ٹک اِنت کہ راجی غلامی ءِ سوب جوڑ بوتگ، ایشی ءَ بلوچ ءَ را نوکری ءُ زر ءِ لالچ داتگ ءُ بلوچ ریپینتگ۔ بلوچ ءِ حق جنی کُتگ ءُ بلوچ لاچار کُتگ ءُ دلاری ءُ سیاڈی گری فرماتگ۔ بقول کارل مارکس کسے دُزی کنت یا بگائی ۔۔۔ آئی ءِ ذمہ وار ھمے سیمی ٹک اِنت۔۔ ھمیش اِنت بلوچ ءَ را ووٹ ءُ الیکشن ءِ نام ءَ ریپینگ اِنت۔ گوستگیں چِل سال ءَ بلوچ ءِ سرا چٹی اِنت۔ چاگرد ءِ سرجمیں سلکاریانی بُن ھمے ٹک اِنت کہ ایشی ءَ پیش ءَ ھم دُژمن ءِ گما بلوچ ءِ سودا جتگ ءُ وتی غیرت ءُ ننگ بھا کُتگ ءُ مرچی ھم وتی ننگ ءَ بھا کنگ اِنت۔ ھمیش اِنت بلوچ ءَ را منشیات دیگ اِنت۔۔۔۔ بلوچ ءَ ھمے کُشگ ءُ گار کنگ لوٹیت کہ سرجمیں سلکاریانی بنیاد ھمیش اِنت
