آزمانک۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ مجیب ولی

آئی ءَ ھر وھد ءَ وتی دل ءَ جیڑ اِت کہ آئی ئے مات ءَ آ ھچبر مھر نہ داتگ۔ اے گپ ھما وھد ءَ آئی ءَ جیڑ اِت کہ آ نوکیں دنیا ئی ءَ شتگ اَت کہ اودا آئی ءَ مھرے یک دریائے رستگ اَت،۔ وھدے آئی ءَ اے مھر دیستاں گڑا آئی ءَ ماراِت کہ اینچو مھر منا بھ نرستگ۔ پدا آئی ءَ جیڑ اِت کہ منی مات ءَ منا پرچا اینچو مھر نداتگ من پرچا چہ مھر ءَ زبھر بیتگاں۔ 

آئی ئے عمر 12 سال اَت کہ آئی ئے پت چہ دنیا ءَ شت۔ پت ئے عمر 100 سال اَت کہ وفات بیت۔ پت ئے مرگ ءَ پد آ ھر وھد ءَ پریشان اَت ھر وھد ملوراَت بس دنیائے ندارگاں چارگا اَت، دگے چکاں چارگا اَت کہ وتی پت ءُ ماتانی گور ءَ گلاں، وش ءُ شادان انت، بلئے آ ھر وھد ءَ یک کنڈی ءَ اوشتات ءُ اے ندارگی چارتاں ءُ دل ءَ جیڑاِت ئے کہ من دنیا یے ھما انساناں کہ بس زندے گوازینگ ءَ اتکگاں بلئے بے مکسدیں زندے گوازینگ ءَ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

‘‘منی زند ءَ پرچا مھرءِ نام ءُ نشان نیست منی گناہ چی اِنت منی میار چی اِنت‘‘

آئی ءَ گوں وتا گپ کُت،

آ مرچی 16 سال ئے میان ءَ رستگ اَت آ مات ءَ ھر روچ جت کہ وانگ ءَ برو بیکاریں بچکانی ھمراہ مبو،  آئی ءَ ھر وھد ءَ وتی دل ءَ جیڑاِت کہ مات ءَ من ءَ دوست نہ بیت۔ من مات ئے مھران بے مھراں۔

مرچی کہ آ اے دنیا ءَ اتکگ اَت گڑا ھمے جیڑگا اَت کہ من مھرے دنیا ءَ اتکگاں چاریں نیمگاں مھرءِ  گُلباگیں۔ آئی ءَ مرچی مات ءِ جاہ ءَ ماتے رستگ اَت پت ئے جاہ ءَ پتے۔ آئی ءَ احمد وتی پت گشت ءُ آئی جنین وتی مات۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

احمد آئی ئے ناکو اَت بلئے چہ پت ءَ ھم ھما دیم اَت پرچا کہ  احمد ءَ آ باز دوست بیت ءُ احمد ئے جنین ءَ ھم آ وتی چک گشت ءُ آ انچو دوست داشت ئے کہ یک ماتے وتی چک ءَ دوست بِداریت۔ آئی ءَ ھر وھد ءَ جیڑ اِت کہ منا کسانی ءَ مات ءَ مھر نداتگ بلئے منی ناکو ئے جنین منی مات ءَ چہ ھم ھما دیم منا مھر دیگیں۔ ناکو ئے جنین ءَ آئی ئے دل ءَ ماتے یے جاگہ گپتگ اَت۔ آ اے زند ءَ سک وش اَت، ھر وھد ءَ گشتے کہ من دنیائے وش نسیب تریں انساناں کہ منا چشیں مات ءُ پت ھدا ءَ نسیب کتگ۔ آئی ءَ وتی ھما مات ھر وھد ءَ ڈوبار اِت کہ آئی ءَ 9 ماہ ءَ لاپ ءَ کتگ اَت ءُ آس ءُ آپ ءَ رکھینتگ اِتے۔ ھر وھد ءَ ڈوبارت ءُ گشتے کہ منی مات ءَ منا ھچبر مھر نداتگ۔ منا چہ زندے وشیاں زبھر کتگے۔

بلئے چوش نہ اَت آ مات ءَ سک دوست بیتگ، آئی ئے ماتے دل ءَ ھقیگیں مھر بیتگ، پہ آئی ءَ۔ ھر وھد ءَ سر ءُ سوجی کتگ ، ھر وھد ءَ چہ ھرابیں گپاں ءُ کاراں دیر دارگ ءِ جُھدی کتگ۔ مات ءَ نلوٹ اِتگ کہ منی چک ءَ یکے بد بگوشیت، پمیشکہ ھر ردی ئے سرا آ مات ءَ سزا داتگ ءُ مات  ءِ سزایاں آ نادوستی سرپد بوتگ، ءُ وتی دل ءَ جیڑتگے کہ مات ءَ منا دوست نہ بیت۔

وھد گوں وتی ترندیں گاماں گوزان اَت ھما مات ءُ پت کہ آئی ءَ مات ءُ پت گشتگاں آھاں چہ گسر بیتگ اَت، بلئے گسر بیئگ ءَ پد ھم آ انچو نزیک اِتاں انچو سما بیت کہ آھانی رشتہ چہ مات ءُ پت ءُ چکی رشتہ ءَ  ھما دیم اِنت۔ آھانی دل ءَ ھدا ءَ یک انچیں مھرے پہ آئی ءَ ودی کتگ اَت کہ اینچو دیری ءَ پد ھم آئی ءَ وتی مات ءُ پت وتی کرا محسوس کتاں۔

بلئے آئی ءَ نزانت کہ اے مھر دو روچی مھر اَنت اگاں آ یک ردی ئے بکنت اے سرجمیں مھر گار بنت۔ پرچی کہ آئی ءَ مارتگ اَت اے زند ھلاس بیت بلئے آئی ئے مات ءُ پت ئے مھر ھچبر ھلاس نہ بنت۔ آئی ءَ نزانت کہ ھقیگیں مات ئے مھر دلی مھر اَنت ءُ آ تری سرجمیں زند ءَ ردی بکنت بلئے مات پدا کئیت گشیت کہ منی چک ترا چونیں تو چو ملوریے۔ منی چُک تو ورگ وارتگ یا ناں۔ منی چک تئی طبیحت وشیں، ناں؟ ماتوی مھر بس دپے مھر اَنت۔ مرچی چار ماہ سرجمیں کہ آئی ءَ ھما مات ءُ پت ئے ھچ مھر رسگ ءَ نہ اَت کہ آ آھاں وتی مات ءُ پِت سرپد بوتگ۔ آئی ءِ  دنیا پدا تھار اَت آ ھما مات ءِ کرا وتی زند ءَ گوازینگ ءَ اَت کہ 9 ماہ ءَ آئی لاپ ءَ بیتگ۔

مرچی آ یک کُنڈی ءَ نشتگ اَت، آئی ءِ چاریں نیمگاں ھمے گپ نبشتہ اَت

                                                  ”ماتءِ بدل ماتو نہ بیت‘‘