اے جھان ءَ وڑ وڑیں انسان پیدا بوتگ۔ نیک ، بد ، سلکار، شر کار، شر صورت، بد صورت۔ بلے بنی آدم ءِ اے نیکی ءُ بدی، سلکاری ءُ شر کاری ءِ گواچن ءِ زانگ سر زاھری رنگ ءَ بیت نہ کنت۔ اے گوں بنی آدم ءِ باطنی رنگ ءُ دروشم ءَ کار داریت۔ سِل، شر یا نیک ءُ بد ءِ تپاسگ گوں انسان ءِ اندری دروشم ءَ کار داریت، زاھری ناں، بزاں زاھری سیاھی دگرے ءُ باطن ءِ سیاھی دگرے، سر زاھر ءَ انسان ھمینکہ بد دروشم بہ بیت، بلے وھدیکہ آئی ءِ باطن ساپ ءُ پلگار بہ بیت، تہ آئی ءِ اندر پہ بنی آدم ءَ روکیں چراگے ءِ بستار ءَ داریت۔ ناکہ بنی آدم ءِ باطنی پلگاری گوں رنگ ءُ نسل ءُ مذھب ءَ کار داریت۔

امریکا ءِ نامئیں سیاہ پوستیں عیسائی رھشون ‘‘لوتھر مارٹن کنگ‘‘ بہ بیت یا سیاھیں ‘‘واجہ فرانز فینن‘‘ ۔۔۔ ایشانی علم ءُ زانت ءِ بالینتگیں چراگ مدام پہ ایردستیں انسان ءَ روکیں چراگے۔۔۔۔۔۔۔ ‘‘لوتھر ءُ فینن‘‘ زانت ءِ چراگ ءُ شرنگیں فکر ءُ لیکہانی حُدابند بیتگ اَنت۔ پمیشا آ مدام چو پُل ءَ وشبو ءُ چو چراگ ءَ آھانی رُژن گیدی ءِ ھمک کُنڈ ءَ تالان اِنت۔ فینن ءُ لوتھر زاھر ءَ سیاہ ءُ باطن ءَ پیغمبرانہ صفتے ءِ خدا بند اَنت۔ فرانس ءِ بد دروشم ءُ کانڈا چمیں واجہ سارتر ءِ مثال ھم ھمیش اِنت۔۔۔۔۔ اے پہ بنی آدم ءَ رُژن ءُ آگہی ءِ چراگ اَنت۔ پمیشا انسانی صفت رنگ ءُ نسل ءُ مذھب ءُ قوم ءُ قبیلہانی بندوک نہ اِنت۔۔

بلے یوگنڈا ءِ بژناک دیم ءُ مَم دروشمیں مسلمانیں حاکم ‘‘عیدی امین‘‘ ءِ کِسہ دگہ وڑ اِنت۔ اے مرد ءَ تاں بازیں سالاں برطانیہ ءِ فوج ءَ کار کُت۔ بلے نوزدہ صد ءُ ھپتاد یک ءَ یوگنڈا ءِ حاکمی ئے وتی دست ءَ زُرت۔ تاں ھشت سالاں اے بدشکلیں جناور ءَ یوگنڈا ءِ مھلوک ءِ سرا حاکمی کُت۔ اے ھشتیں سالاں ایشی ءَ چی کُت؟ اے گپ چہ ھچ کس ءَ چیر نہ اِنت۔

حاکمی ءِ اولسرا ایشی ءَ مغربی سامراج ءُ برطانیہ ءِ سرا پمیشا ایراد گیپت ، تانکہ مھلوک ءِ سِتک ءُ بھیسہ ءَ برجم بِداریت۔ بلے رندا ایشی ءَ گوں بزگیں مھلوک ءَ ھما کُت کہ انسانی تاریخ ءَ چوشیں مثال کم اِنت۔

راستی اِش اِنت کہ بدشکلیں عیدی امین پنچ لکھ انسانانی کُشندہ زانگ بیت کہ ایشانی تھا زھگ، زالبول ءُ ورناہ ءُ کماش ھوار اَنت۔ آخر اے مرد ءَ ھما کار کُت کہ چہ دُنیا ءِ سگ ءُ اوپار ءَ ڈن بیت اَنت۔ نوزدہ صد ءُ ھپتاد ءُ نوہ ءَ اے مرد ‘‘تنزانیہ‘‘ ءِ فوج ءَ چہ واک ءُ اگدہ ءَ در کَش اِت ءُ پہ رُسوائی لیبیا ءَ سر بوت۔ شھیدیں انسانانی حوناں اے مرد شر گیپت تاں زندگ اَت رسوا اَت ءُ پہ وسوائی مُرت۔ لیبیا ءَ رند آئی ءَ سعودی عرب ءَ پناہ زُرت کہ سعودی عرب ھر وھد ءَ چوشیں بدماشاں پناہ دنت۔۔۔۔۔ رندا آ مرت ءُ ‘‘جدہ‘‘ ءِ قبرستان ءَ کَل اِنت۔

گُشنت کہ اے تگار لاپیں دیھ ءَ اینکہ بزگیں انسانانی قتل عام کنگ ءِ ھاترا سعودی عرب ءُ دگہ مسلمانیں حاکمانی پلہ مرزی گون بوتگ۔ آ وت مسلمانی بیتگ۔

بلے اے سرجمیں گپاں چہ ابیید ایشی ءَ انسانی گوشت ھم گراستگ ءُ وارتگ۔ ایشی ءِ فریج ءُ سرد خانہ مدام انسانی گوشت ءَ پُر بیتگ اَنت۔ نو خدا بزانت کہ ایشی ءَ اے انسان چہ کجا گیپتگ ءُ کُشتگ ءُ وارتگ اَنت۔ ایشی ءَ زالبول ءِ گوشت گیشتر پسند بیتگ یا مردین آدم ءِ۔۔۔ بلے آئی ءِ چہ اگدہ ءَ تچگ ءَ پد اے راستی دیم ءَ اَتکگ کہ اے مرد ءَ انسانی گوشت ءِ سرا شام ءُ سبارگ ءُ سھر ءُ دبوج کُتگ۔۔