کوشانی بادشاھانی بابت ءَ اگاں ما گپ بہ جنیں تہ بنکی گال ”کوش” اِنت۔ گیش ءَ چہ گیش بزانت بلدانی تھا ایشی ءِ بزانت ”بُرزیں توار("High grade marijuana) دیگ بیتگ۔ وھدیکہ ما ایشی ءَ کوچ ءَ دیم پہ دیم بہ کنیں تہ کوچ فردوسی ءَ کتاب شاھنامہ ءِ تھا گوں بلوچ ءَ ھمگرنچ کُتگ ءُ ”کوچ” ھم ھمے وڑیں بزانتی داریت، کوچ ءِ گوں بُرزیں توار ءَ سیادی سک کوھنیں۔

                          داں جرس آواز نہ کنت کوچی
                          مھری ماں راھاں نہ بنت کتار

نو کئے اِنت کہ کوش ءَ چہ کوچ ءَ جتا کنت۔ بلے ”اشکانی” کہ تاریخ ءِ تھا است اِنت کہ ایشانی سیادی گوں انڈو آرین نسل ءِ راج ”کوش” ءَ بیتگ۔ اشکانیاں 250 پیش چہ مسیح ءَ سںٹرل ایشیا ءَ وتی سلطنت ءِ بنیاد ایر کُتگ۔ اشکانیاں سیمی صدی َ ءَ یونانی حاکمانی ھلاپ ءَ بغاوت کُتگ ءُ وتی جتائیں بادشاھت ءِ بنیاد ایر کُتگ۔ تاریخ ءِ تھا است اِنت رندا اشکانیاں (آسکانی) عراق ءُ آرمینیا ءَ بگر تاں ایران ءُ گدروشیا ءُ شمال مغربی ھندوستان ءِ ھند ءُ دمگانی سرا قبضہ کُتگ۔ اشکانیانی سیمسرانی تھا سیستان ءُ تجابان ءِ ھندانی نام ھم است اِنت۔ آشکانیاں وت ءَ ھخامنشی شاہ ءُ بادشاھانی نماسگ گُشتگ۔ سید ظھور شاہ ھاشمی ءِ ردا ھخامنشی شاہ ءُ بادشاھانی عھد ءِ سنگ ءُ دمباں چہ ھمے نشون رسیت کہ آ بلوچ بیتگ اَنت۔ ھخامنشیانی دو ٹوھیں بادشاہ کہ کوروش ءُ داریوش ءِ نام ءَ زانگ بنت ، سید ھاشمی ءِ گُشگ اِنت کہ آ بلوچ بیتگ اَنت(بلوچی زبان اور ادب کی تاریخ، سید ھاشمی)۔۔۔۔۔۔۔۔۔

اشکانیانی زبان پھلوی بیتگ۔ پھلوی انڈو آرین نسلانی لہجہے کہ سید ھاشمی ءِ ردا بلوچی زبان ءِ بُن پیرک اِنت۔ اشکانیانی مذھبی کتاب ”اوستا” بیتگ، او آ آتش پرست ءُ ”اجداد پرست” ھم بیتگ اَنت۔ او اے ھم بیت کنت آھاں آس پرستی ءِ سوب ءَ ”آسکانی یا اشکانی ءِ پنام دیگ بیتگ۔