بانک حوران بلوچ ”بلوچ ری پبلیکن پارٹی” زالبولانی ”ونگ” ءِ رھشون اِنت۔ مرچی آ یک زالبول (گھارے) ءِ بستار ءَ بلوچ سیاست ءِ تھا جوانیں کردے ءِ واھُند اِنت۔آئی ءِ اے  ھالتران ھالتاک ”قدرت” ءَ چاپ ءُ شنگ بیتگ۔ ھالتران ءِ وانگ ءَ پد دل ءَ لوٹ اِت کہ بلوچی ءَ ھم ترینگ بہ بیت۔ (چیاکہ بلوچی مئے وتی شھدیں زبان اِنت، بلوچی ءَ کجام وڑں ساچستے نویسگ بیت تہ آ گوں مئے راج زھگ ءِ تب ءَ ھمگرنچ بیت ءُ ماتی زبان ءِ لبز اینکہ راج زھگ ءِ تب ءِ سرا اثر کن اَنت ، دومی زبان ءِ نہ کن اَنت۔ من لوٹ اِتگ کہ ”بانکیں گوھار حوران بلوچ ءِ اے گرانبھائیں دانک بلوچی سیاسی لٹریچر ءِ ھم بھر جوڑ بہ بنت۔ ھالتران ءِ متن (context) ءَ باز جاہ ءَ بلوچی ءِ تب ءَ ایر گیجگ ءِ ھاترا لبزانی گیشی ءُ کمی کنگ بیتگ۔ دانکہ مئے شھدیں زبان ءِ ھیال ھم گور کنگ بہ بیت) پدا ھالتران ءَ  بلوچستان ءِ بابت ءَ ھما تاریخی حوالہ کہ دیگ بیتگ اَنت ءُ دگہ باریں گواچن اَنت کہ بانک ءِ زانتکاری ءُ سوھو ئے ءِ نشون ءَ کن اَنت۔ ما ھمے سرپد بئیں کہ ماں بلوچ سیاست ءِ تھا چوشیں گُھار گنج ءُ گوھر قیمتی اَنت۔ اگاں بلوچ زالبولے پہ ڈیھ ءَ دردے داریت تہ آ چہ انچیں راجدوست ءُ سوھو ءُ سرپدیں جنکاں سبق بہ زوریت کہ آھانی تھا بانک حوران بلوچ، بانک کریمہ بلوچ ءُ دگہ سوھو ءُ سرپدیں گھار ھوار اَنت۔ راج تاں ھما وھد ءَ زندگ اِنت کہ تاں راج ءِ تھا چوشیں گُھار است اَنت۔ من مجبوراں کہ ادا نیپولین ءِ گُشتنے کہ باز رنداں گُشگ بیتگ پدا بہ گُشاں کہ نیپولین گُشیت

”تو من ءَ زانتکاریں ماتے بِدیے، من ترا زانتکاریں راجے دیاں”

مرچی اے علم ، زانت ءُ زانگ ءِ برکت اِنت کہ مئے تھا بونک حوران ءِ وڑیں گھار پیدا بیتگ (شپچراگ بلوچ)
.....................................................................................

رجانک: شپچراگ بلوچ

سوال: راجمانی کارانی تھا بھر زورگ ءِ سوب چی بوتگ؟

پسہ: وتی راج ، وطن ءُ دیھ ءِ آجوئی ءِ ھاترا راجمانی رھبند گچین کُتگ۔ چیاکہ یک غلامیں راجے ءَ ھِچ بستار نیست، تاسپیں براتانی ٹپ ءُ ٹوریں لاش چگل دیگ بوئگ ءَ اَنت۔ ھر نیمگ ءَ زُلم ءُ زوراکی اِنت۔ انسانی حقانی ھلاپ ورزی بوئگ اِنت۔ مرچیگیں غلامی ءِ بد تریں دروشم کہ منی سگ ءُ اوپار ءَ ڈن بوتگ۔ پمیشا من سیاست ءِ ھوناکیں پِڑا وتی قدم ایر کُتگ اَنت، دانکہ ما ھم گوں وتی براتانی ھمکوپگی ءَ آجوئی ءِ جنگ ءَ ھوار بہ بئیں۔ چیاکہ ما تہ انگت وتی فرض ءَ چہ شموشکار بہ بئیں ءُ براتانی ٹپ ءُ ٹوریں لاشاں گِندیں ءُ پدا بے توار بہ بئیں، وتی فرض ءَ پیلہ مہ کنیں تہ راجدپتر مارا معاف نہ کنت۔ من گمان کناں کہ مئے تنگھیں براتانی ٹپ ءُ ٹوریں لاش مارا رسگ ءَ اَنت کہ پجار ھم نہ بنت، ما گِس ءَ گوں بے تواری ءَ بہ نندیں، اے مئے سگ ءُ اوپار ءَ چہ ڈن بوتگ۔ چیاکہ ما وتی براتاں چہ شرتر نہ اِنت کہ آھانی لاشاں بِچاریں ءُ وتی سرانی ندر کنگ ءَ ساڑی مہ بئیں۔ اے سرجمیں (جاور) منی سگ ءُ اوپار ءَ چہ ڈن بوتگ اَنت کہ من سیاست ءِ تھا وتی قدم ایر کُتگ اَنت۔

جست: سیاست ءِ پارلیمانی رھبند ھم است اَنت تو آجوئی ءِ رھبند چیا گچین کُتگ؟

پَسّہ: ما ھچ وڑیں پارلیمانی (نظام) ءِ بھر جوڑ بیت نہ کنیں ءُ ناکہ (پارلیمنٹ مئے دردانی دوا بیت کنت)ءُ مئے ضرورت اِنت۔ مئے لوٹ بس (راجی) آجوئی اِنت ءُ براھمدگ مئے رھشون اِنت ءُ ما براھمدگ ءِ سروکے ءَ (راجی) آجوئی ءِ جد ءُ جُھد ءَ کنیں۔ ما وتی راج ءُ وتی زالبولانی رھشونی ءَ کنیں۔ آھاں آجوئی ءِ سِنچ ءُ زانت ءَ دئیں۔ لھتے پارلیمانی (وتگڑیں) لیڈر اَنت۔ مئے گوں آھاں دزبندی اِنت کہ چوڑیگاں دست ءَ بہ کن اَنت ءُ گِساں بہ نند اَنت کہ پرآھاں زیب دنت۔ آزادی ءِ جنگ ءَ ما زالبول وت مِڑیں۔ ما وتی سِنچدار ءُ زانوگریں مات ءُ گھاراں چہ دزبندی کنیں کہ آ (راجی) آجوئی ءِ جھد ءَ ھوار بہ بنت۔ چیاکہ وھد گوں تیزی ءَ (مئے دست) ءَ درآیگ اِنت۔ ما تہ انگت پاد میائیں ءُ غلامی ءِ لوپ ءَ مہ سندیں ءُ تہ غلامی ءِ سانکل پہ مدامی مئے گُٹ ءَ لوپ بیت۔ پمیشا مارا پاد آیگ لوٹیت ءُ گوں وتی براتانی ھمکوپگی ءَ راجی جنگ ءَ ھوار بیئگ لٹیت۔

جُست: بلوچستان ءَ ”خوتین پینل” ءِ نام ءَ زالبول گوں جھد ءَ ھوار اِتاں بلے اَنچو گندگ آیگ اِنت کہ خواتین پینل نزور تراِتگ، سوب چی اِنت۔

پَسّہ:بی۔آر۔پی ءَ زالبولانی ”ونگ” نہ بیتگ۔ اے اولی رند اِنت کہ بی۔آر۔پی ءَ زالبولانی ”ونگ” جوڑ کنگ بیتگ۔ما رھشون براھدگ بگٹی ءِ سروکے ءَ دیم پہ منزل ءَ گام جنان اِنت ءُ پُشت ءَ نہ کِنزیں۔ ما کہ زالبولابی ”ونگ” جوڑ کُتگ ایشی ءِ تھا زالبول بازیں چار ءُ بچارے ءَ پد ھوار بیتگ اَنت۔ آ باز سرپد ءُ سوھو ءُ پُر عزم اَنت۔ دگہ بازیں زالبول بی۔آر۔پی ءَ ھوار بیئگ ءَ اَنت۔ چیاکہ نو مئے زالبولانی تھا سنچ ءُ زانت اَتکگ ءُ مئے مات ءُ گھار زانتکار اَنت۔اے کدی ھم پُشت ءَ نہ کِنز اَنت۔ بلکیں وتی براتانی ءُ رھشون براھمدگ ءَ گوں ھمکوپگی ءَ راجی جُھد ءَ ھوار بنت۔

جُست: ماں بلوچستان ءَ قبائلی چاگردی، ادا راجمانی، چاگردی ءُ معاشی تکانی سرا مردینانی دزمانجنی گیش اِنت۔ زالبولانی جھگیری آرت ءِ تھا واد ءِ برابر اِنت، تہ اے جاوراں۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پَسہ: اے راہ باز گرانیں، قبائلی رھبند ھم است اِنت۔ (وتگڑیں) سرکار ھم جنجال پیدا کنگ اِنت۔ بلے ما اے گپ ءَ مان نیاریں کہ راہ چنکہ مشکل ءُ جنجال آماچ اِنت۔وھدیکہ الجزائر ءِ ورناھیں زالبولانی تحریک ءِ سروک بی بی ”جمیلہ” ءِ رھشونی ءَ گوں جُنز ءَ ھوار بنت ءُ وتی ڈیھ ءِ آجوئی ءَ چِست بنت تہ آ ھم پہ وتی آجوئی ءِ ھاترا برقعہ ءُ نقاباں دؤر دینت ءُ جھد ءِ پِڑا ایر کپ اَنت ءُ آجوئی ءِ جنگ ءَ ھوار بنت۔ آ ھم بازیں مشکلانی آماچ بنت۔ آھاں گُشگ بیت کہ شما زالبول ءِ چیا گِساں در کپ ئے تہ آ پسہ دینت کہ انسان ءِ ننگ ءُ شرپ وتی دست ءَ اِنت ما تما وھد ءَ آجوئی ءَ نہ گِریں ،گساں نہ نندیں۔ نہ کہ برقعہ کنیں۔۔۔۔۔۔۔۔آھاں ہر وڑیں سَکّی ءُ سوریانی دیمپانی کُتگ۔ چیاکہ آ عرب بیتگ اَنت بلوچانی دود ءُ ربیدگ ، تہذیب ءُ ثقافت گوں آھاں ھمگرنچ اَنت۔ وھدیکہ یک صد ءُ سی ءُ دو سالاں پد فرانس ءَ پروش وارت ءُ الجرائر آجو بوت تہ آھاں برقعہ ءِ پوشگ بندات کُت ءُ پہ دلجمی گِساں نشت اَنت۔ ھمے وڑا فلسطین وتی آجوئی ءِ جنگ ءَ کنگ اِنت۔ اودا ھم یک زالبولے لیلیٰ خالد آجوئی ءِ جنگ ءَ ھوار بیتگ ءُ راجی جُھد ءِ تھا آئی ءِ بازیں قربانی است اَنت۔ کردستان ءَ ثمرین کُرد ءَ راجی آجوئی ءِ ھاترا قربانی داتگ، بلوچستان ءَ نصیر خان نوری ءِ مات بی بی مریم سیاسی کرداری ءِ واھند بیتگ۔ سرجمیں دُنیا ءِ (تاریخ ءَ بازیں زالبول) آجوئی ءِ جنگاں ھوار بیتگ اَنت ءُ گوں وتی براتاں ھمکوپگ بیتگ اَنت۔ آجوئی ءِ ھاترا جنگ ءِ کُتگ ءُ آجو بیتگ اَنت۔ بنگلہ دیش ھم اے (ناپاکیں) پاکستان ءِ بھر بوتگ۔ بلے پاکستان ءَ آ غلام جوڑ کُتگ اَنت۔ آھاں پاکی غلامی قبول نہ کُتگ۔ جد وجھد کُتگ ءُ آجو بوتگ اَنت۔ بلوچستان یک آجوئیں استانے بیتگ، ما تاں کدین ءَ اے ایردستی ءَ سَگّیں؟ کدی چہ گساں در کپیں، جنجالانی آماچ بئیں، قربانی دئیں، بلے غلامی ءَ برداشت نہ کنیں۔ انو ھم بلوچ راج ءِ دو صد ءَ چہ گیش زالبول( پہ راجی آجوئی) ءِ ھاترا ”ٹارچرسیلانی” تھا بازیں جنجالانی آماچ اَنت۔زرینہ مری شش سال اِنت (بیگواہ اِنت)۔ حنیفہ بگٹی ءَ بازیں سالے بیت کہ بیگواہ اِنت۔ بازیں زالبول شھید بیتگ اَنت۔ ما پوہ اِنت کہ سیاست ءِ راہ باز مشکل اِنت۔ بلکیں سگ ءُ اوپار ءَ چہ ڈن اِنت۔

جُست: دومی راجدوست گلانی بابت ءَ تئی لیکہ چی اِنت؟

پسہ: ھما غیر پارلیمانی گل اَنت، ما دُرست یکدست اِنت۔ وھدیکہ رھبند جُتا اَنت۔ بلے منزل یک اِنت۔ بلے پارلیمانی گلاں مئے ھچ وڑیں سیادی نیست، چیاکہ آ راج ءُ ڈیھ ءِ ھاترا ھچ کنگ ءَ نہ اَنت۔ آ بس وتی نپانی غلام اَنت۔ ھرچی کنگ ءَ اَنت وتی نپانی ھاترا کنگ ءَ اَنت۔ ما نہ الیکشن ءَ منیں ءُ نہ کہ مارا گوں الیکشناں واھگے اَست ۔ ما آ لاپ دوست ءُ نپ دوستاں بس ھمے گُشگ لوٹیں کہ نوں بلوچ ءِ ریپینگ ءِ کارا دزکش بہ باں۔ او وتی الیکشن دوستیں کرداں چہ دزکش بہ باں۔ چیاکہ اے وھد ءَ بلوچستان جنگی جاوراں گوں دوچار اِنت۔ پنچ صد ورناھانی لاش دزکپتگ اَنت۔ مئے ھزاراں برات بیگواہ اَنت۔ (بلے) اے لاپ دوست ءُ نپ دوست اے لاش ءُ بیگواھیں ورناھاں مئیم نہ کن اَنت۔ ما کس ءَ اے موہ ءَ نہ دئیں کہ آ بلوچ ورناھانی لاشاں پہ وتی ذاتی نپانی ھاترا بھا بہ کن اَنت۔

جست: شما آجوئی گپ ءَ جن یے، بلے نوابانی پلہ مرز یے، بلے راجدپتر گُشیت کہ نواب ءُ میر ھر وھد ءَ وتی نپانی غلام بیتگ اَنت، شما چون اے مقصد ءَ سر بیت کن یے؟

پسہ: ما بس دو نوابانی پلہ مرز اِنت۔ نواب براھمدگ بگٹی ءُ نواب مری۔۔۔۔۔ایشاں چہ ابئید نہ دگہ سرداراں منیں ءُ نہ مرداراں۔۔۔ اے ناب نیاں بلکیں السی رھشون اَنت، بالاچ ھم ھمے راہ ءَ شھید بوتگ۔ دانکہ آ ھم نواب ءِ زھگ اَت۔ بلے آئی ءَ لس مردمے ءِ وڑا وتی جان ندر کُت۔ اکبر خان بلوچ ءِ رھشون اَت۔ آ گوں سی ءُ پنچ گھگیرانی ھمراھی ءَ شھید بوت۔ مرچی سرجمیں راج گوں دل ءِ جُھلانکیاں آئی ءِ شرپ ءَ کنت۔ راج ءِ زھگ ءُ کماش ءُ ورناہ آئی ءَگوں دل ءِ جھلانکیاں یات کن اَنت۔ ھر دل ءَ آئی ءِ شرپ است اِنت۔ ما نواب براھمدگ بگٹی ءُ نواب بابا مری ءَ وتی رھشون سرپد بئیں ءُ ھمایانی سروکے ءَ وتی جھد ءَ دیم ءَ بریں۔۔۔آدگہ درست اسلام آباد ءِ والینتگین اَنت۔ ءُ ما آھاں نہ منّیں۔۔۔۔۔۔

جست: تو نواب اکبر  خان ءِ منوگریے، نواب ءَ مدام پارلیمانی سیاست کُتگ؟

پسہ: نواب ءَ اے گپ وت من اِتگ کہ 1947 ءِ ریفرنڈم ءَ من اولی ردی کُتگ کہ پاکستان ءِ حق ءَ ووٹ داتگ۔ دریگتیں کہ ماں سرپد بوتینیں تہ ما پاکستان ءِ حق ءَ کدی ھم ووٹ نہ داتگ اَت۔چیاکہ آ وھد ءَ نواب ءَ زوت بیتگ کہ سیاست ءِ تھا گامے ایر کُتگ۔ بلے وھدیکہ آ پوہ بوتگ تہ پارلیمانی سیاست ءَ دز کش بوتگ۔

جست: تو گُشئے نواب صاحب چہ پارلیمانی سیاست ءَ دز کش بوتگ، دانکہ آئی ءَ گُڈی وھد ءَ ”جمہوری وطن پارٹی” ءِ فلیٹ فارم ءِ سرا پارلیمانی سیاست کُتگ؟

پسہ: شھیدی ءَ چہ پیسر آئی ءَ وت گُشتگ کہ دریگتیں کہ ما بزانتیں پاکستان مئے گُما چوش کنت، چر ایشی ءَ چہ منی لیکہ دگہ بوتگ اِتنت۔

جست: شُمئے جنز ءَ میان استمانی تکاں پلہ مرزی رستگ؟

پسہ: مئے جُنز ءَ میان استمانی تکاں باز پلہ مرزی رستگ، امریکی کانگریس ءَ ماں بلوچستان ءَ زلم ءُ زوراکیانی سرا گپ ءُ تران بیتگ۔ او پاکستان ءِ سرا زور دیگ بیتگ کہ ماں بلوچستان ءَ انسانی حقانی ھلاپ ورزی بند کنگ بہ بیت۔ ایمنسٹی انٹرنیشنل ءَ بلوچستان ءِ بابت ءَ بازیں رپورٹ دیم ءَ اتکگ اَنت۔ آئی ءَ گُشتگ ماں بلوچستان ءَ بلوچ راج ءِ سرا زلم ءُ زوراکی بیئگ اِنت۔ قبضہ گیر ءَ بلوچستان ءِ مڈی آوار جتگ اَنت۔ امریکی کانگریس ءِ انسانی حقانی کمیٹی ءَ اے وت گُشتگ کہ بلوچستان ءَ چاردہ ھزار مردم بیگواہ کنگ بیتگ اَنت۔ آ پاکستان ءِ بندی جاھاں وڑیں وڑیں ٹارچر سگگ ءَ اَنت، اے مئے سوب مندی اَنت کہ میان استمانی تکاں مارا رستگ اَنت، اے سرجمیں سوب مندی راجی جنز ءِ سوب ءَ رستگ اَنت کہ مرچی سویڈن، لندن ، ناروے ءُ جاپان ءَ بلوچانی حق ءَ زھرشانی بیئگ اِنت۔

جست: یک ملکے ءِ دارگ ءَ فوجی، تیکنیکی ، ءُ ہر وڑیں مردمانی ضرورت اِنت، شما آجوئی ءَ پد ملک ءَ داشت کن یے؟

پسہ: بلوچاں وتی ڈیھ مدام وت داشتگ۔ محراب خان بہ بیت کہ نصیر خان نوری، آھاں ابئید ء دگرانی کمک ءَ وتی ملک وت داشتگ۔ مرچی ھم مئے تھا اے سِکّت است اِنت کہ ما وتی ملک ءَ بِداریں۔ چیاکہ بلوچ یک سِنچدار ءُ بھادریں راجے، او مئے گورا ھچ چیز ءِ کمے نہ اِنت۔ آ وھد ءَ بلوچ ءَ کس ءَ چہ مدت ءُ کمک نہ لوٹ اِتگ، نو چون آ وتی ملک ءَ داشت نہ کن اَنت۔ بلکیں دگہ راجاں چہ بلوچ ءَ کمک لوٹ اِتگ۔ او بلوچ ءَ کمک کُتگ اَنت۔ تاریخ ءَ بچاریے، بلوچ راجدپتر دلیری ءُ گھگیری ءِ نمیرانیں کسہاں چہ چکار اِنت۔ بلوچ ءَ درستانی کمک کُتگ، کس ءَ چہ کمک نہ لوٹ اِتگ۔ احمدشاہ ابدالی ءِ تاریخ ءَ بوان، زانئے کہ بلوچ چنکہ دلیر بیتگ۔ احمد شاہ ءَ چہ نصیر خان نوری ءَ پمیشا کمک لوٹ اِتگ کہ بلوچ بھادریں راجی ، جنگ ءِ پِڑا پُشت ءَ نہ کِنزیت، دیم ءَ جُنزیت۔میر نصیر ءَ احمدشاہ ابدالی ءِ کمک کُتگ۔ پانی پت ءِ میدان ءَ آئی ءَ گوں بھادری ءَ احمد شاہ ءِ دشمن پروش داتگ ءُ احمد شاہ ءَ اے مُزّ ءَ ا پشین بی بی مریم ءِ شال ءِ بستار ءَ آئی ءَ سوغات داتگ۔ بی بی مریم ھم اے جنگ ءَ ھوار بیتگ۔

جست: بلوچستان ءِ بھر ءُ بانگ ءِ گپ بیئگ اِنت، اے بابت ءَ تئی لیکہ چی اِنت؟

پسہ: بلوچ ءُ پشتون کرناں یکجاہ نِشتگ اَنت، اگاں انگت یکجاہ نندگ بہ لوٹاں تہ آھاں کس جتا کُت نہ کنت۔ اگاں بھر لوٹ اَنت تہ باکے نیست، بلوچ وتی سرزمین ءِ واھند اَنت ءُ پشتون وتی۔۔اگاں آ بلوچستان ءَ نندگ نہ لوٹ اَنت تہ جتا بہ بنت۔ ما پاکستان ءَ نندگ نہ لوٹیں۔ ما وتی گُلزمین ءَ چہ پاکستان ءَ آجو کنیں۔ او پشتوناں ھم ھمے گُشیں کہ آ جتا بنت تہ جتا بہ بنت۔ بلے وتی زمین ءِ لوٹ ءَ بہ کناں۔ ھما زمین کہ بلوچ ءِ نھر اِنت، یک انچے ھم دیگ نہ بیت۔ آ بولان ءُ چترال ءَ گپ ءَ جن اَنت تہ مارا ھچ وڑا قبول نہ اِنت۔ بلکیں آھاں لوٹیت کہ پشین ءَ چہ ھم دزکش بہ باں، چیاکہ پشین ھم بلوچ ءِ ھند اِنت۔ مارا آھانی برابری ءِ لوٹ ھم قبول نہ اِنت۔

جست: پشتون کوئٹہ، سبی ءَ ھوار دوازدہ ضلع آں پشتون ھند ھساب کن اَنت۔ ایشانی لوٹ ءَ کنگ ءَ اَنت۔ شما چنکہ ضلع آنی دیگ ءَ تیاریے؟

پسہ: پشتون اگاں ھساب ءُ کتاب ءَ نزور اَنت تہ ”البیرونی ءِ کتاب ءَ بوان اَنت ءُ ھساب ءَ در بہ بر اَنت۔ پدا آ سرپد بنت کہ بیست ءُ دو گیشتر اِنت یا شش گیشتر اِنت۔ پدا آ برابری ءُ چترال ءُ بولان ءِ لوٹ ءَ بہ کن اَنت۔ بیست ءُ دو اضلاع بلوچ ئیگ اَنت ءُ شش پشتون ءِ۔۔۔۔گُشنت آ اے اضلاعاں جتا کن اَنت۔ یا بلوچستان ءَ نند اَنت ءُ اے اضلاعاں جتا کن اَنت۔ اے آھانی وتی مرضی اِنت۔ ما کدی نہ گُشتگ کہ آ جتا بہ بنت، اے آھانی وتی لوٹاں گوں ھمگرنچ اِنت۔ سبی ءُ کوئٹہ ءِ گپ ءَ جن اَنت تہ بیاراں چوشیں تاریخی ثبوتے کہ آ کدی سبی ءُ کوئٹہ ءِ واھند بیتگ اَںت۔ ما بیست ءُ دو اضلاع آنی واھند اِنت، شش اضلاع ءَ چہ گیچ یک انچے ھم آھاں دات نہ کنیں۔ نہ کہ آھانی بلوچ پشتو ءِ برابری ءِ گپ ءَ منیں۔۔

جست: تو گُشئے آ شش اضلاعانی واھند اَنت۔ کمے بگوش کجام ءُ کجام ۔۔۔۔۔۔۔۔۔۔۔۔۔۔۔۔

پسہ: ژوب، لورالائی، زیارت، قلعہ سیف اللہ موسیٰ خیل ءُ قلعہ عبداللہ آھانی میراث اَنت۔ ششیں اضلاعاں چہ یک انچے گیش ھم آھانی نہ اِنت۔ پشین پشتون ءِ نہ اِنت بلوچ ئیگ اِنت۔

جست: شما آجوئی ءِ گپ ءَ کن یے، کجام ءُ کجام ھند شمئے بھر اَنت کہ شما آھانی آجوئی ءِ گپ ءَ جن یے؟

پسہ: ما گریٹر بلوچستان ءِ گپ ءَ جنیں، ایشی ءِ تھا بلوچستان ءِ بیست ءُ دو اضلاع ءُ راجن پور، ڈیرہ غازی خان، جیکب آباد ، کراچی ءُ ایرانی بلوچستان ھوار اَنت۔ ایشاں ما آجو کنیں ءُ دلجمی ءَ نندیں۔

جست: پارلیمانی بلوچ راجدوست گلاں بِل، غیر پارلیمانی بلوچ راجدوست گل چیا یکمشت نہ بنت؟

پسہ: ما کُل یک دست اِنت۔ کئے گُشیت غیر پارلیمانی گل ءُ آجو دوست یکدست نیاں؟ ما درست بلوچ نیشنل فرنٹ ءِ فلیٹ فارم ءِ سرا یکدست اِنت۔ مئے مقصد، پروگرام ءُ رھبند یک اَنت۔ ما درست یک مشت اِنت۔ دشمن اے سرپد مہ بیت کہ ما جتا جتائیں۔ بلکیں ما درست نواب خیربخش مری، نواب براھمدگ بگٹی۔ خیر بیار مری ءُ مھران مری ءِ سروکے ءَ یک مشت اِنت۔ ما کدی جتا نہ بئیں، اگاں مئے دشمن مارا جتا سرپد بیت تہ رد کپگ اِنت۔

جُست:مزاحمتی تنظیم روچ پہ روچ گیش بوان اَنت ءُ آھانی مقابلہ  ءَ نوکیں مزاحمتی تنظیم جوڑ بوئگ اِنت۔ ایشی ءِ سوب چی اِنت؟

پَسّہ: بلوچ مزاحمتی تنظیم پہ راستی یک مُشت اَنت۔ آ وتی کارا کنگ ءَ اَنت۔ وھدیکہ آھانی ”مقابلہ” ءَ دگہ تنظیم جوڑ بیئگ اِنت۔ آ مزاحمتی تنظیم نہ اَنت۔ بلکیں سرکار ءِ والینتگیں تنظیماں کہ سرکار ءَ جوڑ کُتگ اَنت۔ چیاکہ سرکار ءَزوراکی ءِ ھمک سیمسر گواز کتگ ء نوں گپچلانی آماچ اِنت۔ آ بازیں مکر ، حیلہ ءُ وڑ ءُ پئیماں بلوچ ورناھاں اذیت دیگ ءَ پد شھید کنگ اِنت۔ اے تنظیم ایم۔آئی، آئی۔ایس۔آئی ءُ ایف ءِ جوڑینتگیناں۔ بلے بلوچ چرایشاں چہ نہ تُرسیت۔ ہرچا کہ بلوچانی دیم ءَ یک منزلے، آ منزل ءِ سر بوئگ ءِ ھاترا بلوچاں وتی جُھد گوں جوانیں توجیلاں جاری داشتگ۔ مرچی کہ اسپلنجی، دشت، کابو، مکران ء ھوا بازیں بلوچ ھنداں آپریشن بیئگ اِنت۔ اے (پاکی) سرکار ءِ پروش ورگ ءِ پدریں مثال اِنت۔ اے درستاں پارلیمنٹ ءِ نندوکیں (وتگڑیں) راجدست ھوار اَنت۔ ھمے بلوچ ورناھانی نشاناں ڈس اَنت ءُ آھانی آوار جنائینگ ءَ ھوار اَنت۔ ماآھاں گُشگ لوٹیں کہ سرکار ءِ کاسگ چٹی ءَ وئیل بہ کناں۔ اگاں ناں تاوان وریے۔ پرچا کہ (ما) درستاں زانیں کہ کئے مخبر اِنت ءُ کئے چی کنگ اِنت۔ ما وتی دوست ءَ ھم زانیں ءُ دشمن ءَ ھم پجار ءَ کنیں۔ آ نپ دوستیں پارلیمانی لیڈر اے سرپد مہ بنت کہ ما آھاں پجا نیاریں، مارا آھانی مکاریانی سرپدی نیست۔ بلکیں ما آھانی سرجمیں کار ءُ کرداں سرپدیں۔۔

جُست: تو بلوچ راج ءَ چی کلوہ دات کن یے؟

پَسہ: من بلوچ راج ءَ بس ھمے کلوہ ءَ دیاں کہ آ سرکار (دشمن) ءِ پندل ءُ مکاریانی ءَ دام ءَ چہ وت ءَ بہ پھریزاَنت۔ وتی جُھد ءَ برجم بِدار اَنت۔ سوبمندی آھانی نصیب ءَ بیت۔ کس آھاں چہ حق ءَ دز کش کت نہ کنت۔او ناکہ کسے آھاں سوبمندی ءَ چہ محروم کُت کنت۔ اے گچینکاری، اے سرکاری نوکری ھچ نیاں، راج ءِ ورناہ جنک، بچک درست پاد بیائے ءُ گوں رھشون براھمدگ بگٹی ءَ ھمکوپگ بئے۔ آئی ءِ دست ءَ مھکم کن اِت۔ دانکہ آجوئی ء جنز گیشتر گوں تیزی ء دیم ءَ جنزان بہ کنت۔