اگاں ما کواسے ءِ گپ ءَ بہ جنیں تہ کواس ءُ راجی کواس ءِ میان ءَ فرق اِنت۔لس بزانت ءَ راجی کواس ما ھمائی ءَ گُشت کنیں کہ آ وتی لیکہانی سرا پہ مدامی برجم بہ بیت۔ زیک ھما لیکہ یے نشونے داتگ ، مرچی ھم ھما رھبند ءِ سرا اوشتوک بہ بیت۔ گُڑا آ راج ءَ یک عاقبت اوستیں منزلے ءِ نشون ءَ دات کنت۔آ راج کواسے گُشگ بیت۔ راج کواس ءِ پجار ءِ زانگ ءَ مارا خلیل جبران، سعید ایڈورڈ، ٹیگور ءُ ژاں پال سارتر الم وانگ لوٹ اَنت کہ آھاں ھما رھبند ءِ نشون داتگ۔ تاں وتی مرگ ءِ گُڈی ساھت ءَ آ ھما رھبند ءِ سرا اوشتوک بیتگ اَنت ءُ آھاں ھما راجاں ءَ ھما رھبند ءِ سرا رؤگ ءِ سکین داتگ، تُری آ رھبند سوشل رھبندانی سرا بیتگ یا راجی وتواکی ءُ راجی آجوئی یے، بلے آ ھما رھبند ءِ سرا اوشتوک بیتگ اَنت ءُ عمر ءِ اول سرا بگر تاں قبر ءَ آھانی لیکہ بدل نہ بوتگ اَنت۔ ھمیش اِنت راج کواس ءِ پجار۔۔۔۔۔۔۔۔

اگاں کسے راج کواسے ءِ نام ءَ کارمرز کنت۔ بلے زیک ”حق خود ارادیت” ءِ منوک بیتگ ءُ مرچی مسلم لیگیانی رند ءَ تچیت ءُ باندا آجوئی ءِ گپ ءَ جنت تہ بزاں آ مستقل مزاج نہ اِنت ءُ ذاتی کینگ ءُ واھشتانی رندا تچیت۔ گُڑا آئی ءِ سرا بھیسہ دارگ ھم پد نبودیں حیالے ءُ آئی ءِ مثال چو احمر مستی خان ءَ بیت کہ زیک سرمچارانی پلہ مرزی ءَ نویستگے ءُ ذاتی کینگانی بنیاد ءَ عطاءاللہ مینگل زاہ ءُ بد کُتگے ءُ مرچی کہ آئی ءِ ذاتی لوٹ بدل بیتگ اَنت تہ ”سرمچارانی” ھلاپ ءَ زبانے پچ اِنت۔ اے واجہ اے گپ ءَ ھم نہ زانت کہ مرچی بلوچ جُہد ءَ ماں میان استمانی تکاں سوب مندی ئے رستگ تہ ھمے سرمچارانی سوب ءَ۔۔۔۔ بلے مرچی کہ آئی ءِ لوٹ ءُ ذاتی واھشت بدل بیتگ اَنت تہ ڈاکٹر اللہ نظر ءِ ھراب گُشگ ءَ ھم چک ءُ پد نہ بیت ءُ واجہ خیر بیار ءَ ھم بد ءُ رد کنت۔ پمیشا مارا بُرز ءِ گوستگیں گپانی پُشگرد ءَ وتی راج کواس ءِ پجار کنگی اِنت ، چوش مہ بیت کہ باندا دگہ مستی خانے جاہ بہ جنت ءُ راج کواسے ءِ نام ءِ سرا مئے گُٹ ءَ لوپ بہ بیت۔ من نہ گُشاں جُھدانی تھا ھِچ وڑیں ردی نہ بیت، ردی الم بنت، بلے پہ ردی ءَ راجی جُھد پولنگ نہ بنت۔ بلکیں زندگیں جُھد چہ وتی پیشی ردیاں نپ چِست کن اَنت ءُ وتی منزل ءَ سر بنت۔ بلے بدل بیوکیں راج کواسے ءِ دعوا دار جُھداں تاوان بار کن اَنت۔ دوست ءُ دُشمن ءِ پجارگ ءِ سِنچ ءَ ھم تباہ کن اَنت۔

اگاں ما بُرز ءِ ڈس اِتگیں گپانی شاھیم ءَ بلوچ کواساں تور بہ کنیں تہ بلوچی زبان ءِ ابدالیں شاعر مبارک قاضی راج کواسے ءِ درچ ءَ اَتک کنت۔ قاضی ءِ راجی زانت ءُ لیکہ زیک ھم ھمیش بیتگ، مرچی ھم ھمیش اِنت ءُ کسے من ایت یا نہ من اِیت من ءَ اے گپ ءِ سرا بھیسہ ءُ سِتک اِنت کہ باندا ھم قاضی ھمیش بیت۔

                     ما  راز  داریں    چول  چول  ءِ    زِندگی
                     چہ جُھد ءِ جُھل ءُ جلگھیں زرا چہ  اَتگیں

                     ھما کہ چم ءُ زاھر ءَ بہ گندیے محرم اَنت
                     درآمدانی  مردم  اَنت ،  تھا  چہ   اَتکگیں

                     ما قاضی قول ءُ گُشتناں پدی نہ بئیں  وتی
                     حبر پدا ورگ  نہ بیت  دپ ءَ  چہ اَتکگیں