من نبشتہ کناں ، ھماکہ منی دل ءَ کئیت من نبشتہ کناں، چیاکہ اے منی ذات ءِ آجوئی اِنت۔ ھماکہ من ماراں پدا نبشتہ کناں۔منی ھمُک نبشتگیں گپ منی ذات ءِ آجوئی ءَ گوں بندوک اِنت۔ پمیشا منی ذات ءِ مارشتانی درنگازی ءَ کس دزمانجی کُت نہ کنت۔ من پہ اے ھاترا نبشتہ نہ کناں کہ تو من ءَ وانئے ءُ منی ستاہ ءُ توصیف ءَ کن یے۔۔۔۔اِنّاں اگاں منی نبشتہ کنگ ءِ مول ءُ مراد اے بہ بیت تہ منی ذات ءِ آجوئی گُٹگیر بیت۔ گُڑا من ھمائی ءَ نبشتہ کناں کہ تئی لوٹ ءُ تب ءَ بہ بیت۔ اگاں من وتی ھمک ھیال ءَ تئی واھشتانی پدا نبشتہ بہ کناں تہ بِزاں کہ من تئی غلامی ءَ قبول کنگ ءَ آں۔۔۔اے منی دست ءَ نہ بیت ءُ من ءَ وتی ذات ءِ آجوئی گُٹگیر کنگی نہ اِنت۔ چیاکہ منی نبشتہ کنگ ءِ مول ءُ مراد اے نہ اِنت کہ تو منی توصیف ءُ ستاہ ءَ بہ کنئے۔ بلے اگاں تو ابئید ء نگد ءُ چار ءُ بچار ءَ منی ھمک سیاھگ ءُ نبشتانک ءِ ستاہ ءُ توصیف ءَ بہ کنئے تہ بزاں تو وتی ذات منی غلام کُتگ۔ تو وتی آجوئی گُٹگیر کُتگ۔ تو علم ءُ زانت ءُ چار ءُ بچار ءَ چہ گِسر کپتگ یے۔۔۔۔۔۔۔ پمیشا تئی سرا من ءَ بزگ کنت۔۔۔ من ناں ترا غلام کنگ لوٹ آں ءُ ناں تئی غلام جوڑ باں۔ دل ءَ جزم بو، من ناں تئی لوٹ ءُ واھگانی پدا نبشتہ کناں ءُ ناں تئی ستاہ ءِ منت ءَ زراں ۔۔۔۔۔

بلے تو گُشئے کہ منی ھمک نبشتگیں سیاھگ تئی لوٹ ءُ تب ءَ بہ بیت۔ تو گُشئے من ھما بہ گُشاں کہ تئی واھگ اِنت۔ منی ھما ھیال کہ تئی لوٹانی پدا بہ بیت تو وت ءَ منی غلام کنئے ءُ منی ستاہ ءَ کنئے۔ بلے ھما کہ تئی واھگانی پدا مہ بیت ءُ منی ذات ءِ آجوئی ءِ درنگازی بہ بیت تہ تو نِندیے ءُ من ءَ زاہ ءُ بد کنئے۔ ایشی ءَ زانگ بیت کہ تو آجوئی ءِ ھاترا بلاھیں ٹوک کنئے، بلے ناں وتی آجوئی ءَ لوٹ یے ءُ ناں دِگریے۔ ذھنی صورت ءَ وت غلام یے ءُ دگراں غلام دارگ لوٹ یے۔ آجوئی ءِ گپ جنگ ءَ پیسر وتی ذات ءَ آجو کن۔ اگاں تئی ذات آجو مہ بیت۔ گوشدارگ ءُ اِش کنگ ءِ سِکّت ءَ مہ داریت، تہ دُنیا ءِ ھچ وڑیں طاقت ترا آجو کُت نہ کنت۔۔ پمیشا منی ستاہ ءُ توصیف ءَ ھم مہ کن، چیاکہ من ھم نہ لوٹاں کہ تو غلام بہ بئے۔۔۔۔