ما وتی سیاست ءِ تھا ”لیکہ” (Theory) ءِ لبز ءَ کارمرز کنیں، بزاں ما وتی ھمک سیاسی کرد ءَ گوں لیکہ (Theoty) ءَ ھمگرنچ کنیں۔ بزاں نظریاتی سنگت یا نظریاتی گَل ءُ دگہ بازیں۔۔ بلے اگاں پہ راستی بچاریے ما رد کپگ ءَ اِنت ءُ اے غیر سائنسی لبزے۔ لیکہ ءِ سیادی گوں عقیدہ ءَ اِنت ءُ عقیدہ بدل بیت کنت۔ بلکین بنکی لبز بھیسہ (Trust) اِنت۔ لیکہ تصورے، تصور بدل بیت کنت۔ بلے بھیسہ ابدی چیزی ءُ گوں انسان ءِ دل ءُ بنداں ھمگرنچ اِنت۔اوشو گشیت ”تھیوری وتگڑ ءُ دماغ ءِ پیداوار اِنت ءُ بھیسہ (Trust) گوں انسان ءِ وجود ءَ کار داریت”
اے گپ صد در صد راست اِنت۔ نطریاتی مردم بدل بیت کنت۔ رازق بگٹی Theoretical مردمی بیتگ۔ آ بدل بوت۔ غدار جوڑ بوت۔ مالک ءِ نظریہ بدل بوت۔ بلے بالاچ ءَ بلوچ جُھد ءِ سرا بھیسہ داشت، آ شھید بوت۔ مئے تحریک ءِ تھا بدل بیوکیں مردم نظریاتی بیتگ اَنت۔ بی۔ایس۔او ءِ گیشتریں چئیرمین بدل بیتگ اَنت۔ چیاکہ آھانی فکری بُن ھِشت نظریات ءِ سرا ایر بیتگ۔ تصوراتی مردم بدل بنت۔ بلے بھیسہ کنوک بدل نہ بنت۔ چیاکہ نظریہ انسان ءِ مصنوعی جوڑ کُتگیں لبزے ءُ ایشی ءَ گوں انسان ءِ وجود ءَ کار نیست۔ بلے بھیسہ ءِ سیادی گوں انسان ءِ وجود اِنت۔ بھیسہ گوں راج، گوں وطن ءَ وفا داری ءِ نام اِنت۔
سیاست ءَ چہ ابئید مذھب ءِ ھم دو پہلو بنت۔ عقیدہ(Theoretical) ءُ بھیسہ۔ نظریاتی مذھبی بدل بیت کنت۔ مسلمان عیسائی بیت ءُ ھندو مسلمان۔ بلے آئی ءَ کہ وتی فکری ماڑی بھیسہ ءِ سرا بستگ، آ بدل بیت نہ کنت۔ ھمے وڑا نظریہ بدل بیت کنت، بلے بھیسہ تاں مرگ انسان ءِ دل ءُ بنداں گوں ھوار اِنت۔ پمیشا مارا نظریاتی یا تصوراتی بیئگ نہ لوٹیت۔ بلے وتی جُھد ءِ سرا، سنگتانی سرا بھیسہ(Trust) دارگی اِنت، ناکہ اعتقاد۔۔۔۔۔۔۔۔۔۔۔۔۔مارا Theoretical بیئگ نہ لوٹیت۔
