ماں بامیان ءَ حضرت گوتم بدھ ءِ دراجیں بُت کہ گوستگیں ملایانی حاکماں جنت ءِ کَٹگ ءِ ھاترا پروشت اَنت۔ تاریخی راستی ھمیش اِنت کہ اے ٹوھیں بُت کہ یکے 53 گز دومی 35 گز ءُ دگہ کوشانی حاکمانی عھد ءَ جوڑ کنگ بیتگ اَنت۔ کوشانیانی بابت ءَ ھمے راستی تاریخ ءِ تھا است اِنت، آھاں اولی ءُ دومی صدی عیسوی ءَ میان ایشیا ءُ شمالی ھند ءِ بازیں ھند ءُ دمگانی سرا حاکمی کُتگ کہ ایشاں گوں سیادی داروکیں دگہ ٹکے ءِ نام ”آشکانی” بیتگ۔ کوشانیانی حاکمی ءِ وھد ءَ ماں اوغانستان، ایشیا ءِ تیابی دمگ ءَ بُدھ لیکہ ءَ دیمروئی کُتگ۔
کوشاں چہ آریائی نسل ءَ سیادی داشتگ۔ کوچیانی نام ءَ ھم زانگ بنت۔ عرب تاریخ نویس ”طبری” نبشتہ کنت کہ کوشانی کہ ھندوستانی بازیں دمگانی سرا حاکم بیتگ اَنت ،ساسانی عھد ءِ بھرام گور ءَ آھانی حاکمی ھتم کُتگ ءُ ایران ءِ ایردست کُتگ اَنت۔
تاریخ ءَ است اِنت کہ کوشیانی حاکمی پنجاب ، گندھارا، ٹیکسلا (شمال ءُ مغربی پاکستان) دگہ بازیں ھندانی سرا بیتگ۔۔ایشانی زبان پہلوی بیتگ۔
دومی صدی ءَ پنجاب بگر تاں قابل، کویتہ ءَ بگر تاں مکوران(مکران) ءَ کوشیانی حاکمی بیتگ۔اردشیر بابکان ءِ دور ءَ تاں اے ھندانی سرا کوشانی حاکمی بیتگ۔
کوشیانی دگہ ٹکے کہ آشکانی آنی نام ءَ زانگ بیتگ۔ آشکانیاں دوصد ءُ پنجاہ پیش مسیح ءَ میان ایشیائی ھند ءُ دمگانی سرا حاکمیت ءِ بنیاد ایر کُتگ ۔ ایشانی حاکمیت ءَ شمال مغربی ھند ءُ ایران ءِ بازیں ھند ھوار بیتگ اَنت۔ آشکانیاں وت ءَ ھخامنشی بادشاھانی پُشپد گُشتگ ءُ آتش پرست بوتگ اَنت ءُ ایشانی زبان پہلوی بیتگ ۔ رومیاں اے دمگاں وتی قبضہ گیریت ءِ مستریں دیمپان آشکانی زانتگ اَنت ءُ آھاں اے دمگاں اُرش کنگ ءِ ھیمات ھم نہ بوتگ۔ چیاکہ آشکانی فوجی حوالہ ءَ باز مھکم بوتگ اَنت۔227ء ءَ آشکانیانی سلطنت ساسانیاں ھتم کُتگ ءُ وتی ایردست کُتگ۔
سید گُشیت کوش بلوچ بیتگ اَنت ءُ آشکانی ٹک ھم بیت کنت بلوچانی ھمے ٹک اِنت کہ ”آسکانی” ءِ نام ءَ زانگ بیت۔ او ماں بامیان ءَ گوتم بدھ ءِ بتانی بابت ءَ ھم اے تاریخی راستی چیر بیت نہ کنت کہ کوشانی حاکمی ءِ دور ءَ جوڑ بیتگ اَنت۔ اے ھم بیت کنت کہ اے بتانی آئی۔ایس۔آئی ءِ ملایانی دست ءَ پروشگ ءِ مستریں مقصد ھمیش بوتگ کہ آ اے ھنداں بلوچ تاریخ ءِ نشانیاں گار ءُ بیگواہ بہ کن اَنت۔۔ اگاں کسے ءَ باور نہ کنت تہ ھمے بُتانی تاریخ ءَ بُوانیت کہ کجام عھد ءَ جوڑ بیتگ اَنت ءُ اے کوش حاکم کئے بیتگ اَنت۔
