مَذھبی لیکہانی ردا دروگ دُشمن ء خدا اِنت ءُ اخلاقی حوالہ ءَ اگاں بچاریے تہ چاگردی سِلکاری ئے۔۔ بلے پہ راستی بچاریے مذھبی مُلا بہ بنت یا انسانی چاگرد ءِ کجام تکاں سیادی داروکیں بنی آدم، ایشاں پہ وتی ذات ءِ پھازگ ءُ وتی گپ ءِ راست ثابت کنگ ءُ دومی ءَ ایرموش کنگ ءَ پہ دروگ ءَ دِل نہ رنجینتگ۔ یشاں ھما کُتگ کہ اگاں پہ راستی چارگ بہ بیت انسان ءَ حیوانیت ءِ نام ھم زیب نہ دَنت۔ انسانیت ءُ ”اشرف المخلوق” ءِ پنام وتی جاہ ءَ۔۔۔۔۔۔۔۔۔ بلے انسان لاچار اِنت، بے وس اِنت، آ وتی ذات ءَ پھازگ ءُ وت ءَ راست ثابت کنگ ءِ شوپچ ءَ کپتگ۔۔۔ پمیشا انسان ءَ پہ وتی دروگ بندی، گوچلی ءُ ھرابکاریانی چیر دیگ ءِ ھاترا پہ وت ءَ عجبیں ءُ چم نہ دیستیں ارواہ جوڑ کُتگ کہ آ وتی ھمک کرداں قضا ءُ قدر ءُ شیطان ءُ خدا ءِ پاد ءَ مُشیت۔۔۔ اے درستیں راستی وتی جاہ ءَ بلے من گُشاں مرچیگیں انسان ءِ گوچلی، دروگ بندی ءُ دوتل ءُ دوپوستیانی دیم ءَ خدا ءُ شیطان ھم گوش گِر اَنت ءُ پشومان بنت۔ بلے انسان وتی بے سِلکیں کاراں ھچ وڑا پشومان نہ اِنت ءُ وت ءَ وتگڑیں ”اشرف المخلوق” ءِ نام ءَ پِر بندیت ءُ مدام سرے بُرز اِنت کہ منان ءُ من ۔۔۔۔۔۔
انسان بَزّگ چیا لاچار اِنت۔ چیا گوچلی کنت، انسان ءَ چیا وتی فکر ءُ زانت ءِ ماڑی وتگڑیں دروگانی سرا اڈ داتگ؟ گپ اِش اِنت کہ انسان ءِ انچیں تب ءُ نفسیاتی کہ آ وتی ذات ءَ پھازگ لوٹیت۔ آ وتی نپانی برجاہ دارگ ءُ وتی ذات ءِ پھازگ ءَ دروگ بندیت۔ آ نہ لوٹیت کہ منی راستیں دروشم آشکار بہ بیت۔ آ وتی راست ثابت کنگ ءَ پہ دروگ ءُ گوچلی دگرانی پشت ءَ دروگ بندیت۔ دُنیا ءِ دیم ءَ وتی لیکہ ءِ منارینگ ءُ راست ثابت کنگ ءَ دگرانی پُشت ءَ دروگ بندیت۔ مُلا ءَ وتی خدا ءِ راست ثابت کنگ ءُ دگرانی خدا ءِ دروگ بند کنگ ءَ وتی فکر ءُ زانت ءِ ماڑی دروگانی سرا بَستگ۔ سیاست دان یا ادیب وتی لیکہ ءِ راست گُشگ ءَ دروگانی سرا زندگ اَنت۔۔ چاگرد ءِ ہر زندگیں مردم وڑی ناں وڑی چرے دروگ بندی ءُ گوچلی ءَ نہ رک اِتگ اَنت۔ یکے دروگ بندیت ءُ وتی رھشون ءِ تعریف ءَ کنت کہ رھشون من ءَ وتی مردمے سرپد بہ بیت ءُ من ءَ آئی ءِ گورا شرپ ءُ عزتے بہ بیت۔ پمیشا آ وڑی ناں وڑی دروگ بندیت ءُ مخالف مردم ءَ ایر جنت ءُ آئی ءِ پاد ءَ ھما کرد ءَ دنت کہ آ بیچارگ ءِ سر ءُ گوش ھم سہی نہ اِنت۔
بلے انسان چو مہ کنت تہ چی بہ کنت؟ آئی ءِ ذاتی نپ گوں دروگاں بندوک اَنت۔ آئی ءَ وتی ذات پھازگ لوٹیت۔ اگاں چو مہ کنت تہ دومی ءِ سِتک ءَ وتی نیمگ ءَ ترینت نہ کنت ءُ وتی ذاتی نپاں پھاز اِت نہ کنت ءُ وتی خدایانی راستی ءَ ثابت کُت نہ کنت۔ من ءَ یاد اِنت کسانی ءَ ما کہ یکے گورا چیزی طلب کُتگ تہ ما دیستگ کہ آ مرد ءِ سِتک مئے سرا نیست تہ ما دومیانی نام کارمرز کُتگ ءُ وتی نپ پھازاِتگ اَنت۔۔ ما کہ ردی ئے کُتگ تہ کدی وتی نام ءَ نہ داتگ۔ چیاکہ ما دیستگ کہ مئے سِتک ءُ نپاں تاوان رس ایت، پمیشا ما دروگ بستگ ءُ وتی سرا دومیانی سِتک برجاہ کنگ ءِ جُہد کُتگ۔ ما شراب وارتگ یا تریاک کَشّتگ اِتگ، وھدیکہ مئے راز دومیاں سر بیتگ تہ ما دومیانی سِتک ءَ برجاہ کنگ ءُ وتی ذاتی شرپ ءِ پھازگ ءَ ھزار دروگ بستگ ءُ ھزار سوگند وارتگ۔ ھمیش اَنت انسان ءِ ذاتی لوٹ کہ انسان ھمیشانی باپُشت ءَ مدام دروگ بندی ءُ گوچلی کنت۔ آئی ءِ زانت ءِ ماڑی تاں پیدائش ءَ تاں مرگ ءَ ھمے دروگانی سرا بندگ بیتگ۔ پمیشا انسان ءَ ”اشرف المخلوقی” ءِ پنام کہ آئی ءَ اے لقب وت ءَ وت داتگ ، پرآئی ءَ اے پنام زیب نہ دنت۔۔۔
