حضرت سلیمان یہودیانی چِل ءُ ھشت ٹوھیں پیغمبرانی تھا یک پیغمبرے بیتگ ءُ حضرت داؤد ءِ زھگ بیتگ۔ اسلام، عیسائی ءُ يهوديت ہر سئیں مذھب اے گپ ءِ منوگر اَنت کہ سلیمان خدا ءَ یک اَنچیں صفتے داتگ کہ آ اے جھان ءِ ہر زندگیں سھدار ءِ زبان ءُ بولی ءَ سرپد بیتگ۔ یہودی،عیسائی ءُ اسلامی تاریخ ءِ ردا فلسطین ءِ مرچیگیں پاکیں مسیت کہ است اِنت آ اے دروشم ءَ سلیمان ءَ مِک کُتگ ءُ چہ زِر ءَ گوھر ءُ موتی کَش اِتگ ءُ براھدار کُتگ۔ اے ہر سئیں مذھب اے گپ ءِ منوگر اَنت کہ سلیمان ءَ پہ ماڑی ءِ مِک کنگ ءَ جِن ءُ بلاہ کار گیپتگ اَنت۔ اے سئیں مذھب اے گپ ءِ ھم منوگر اَنت کہ سلیمان ءِ جَن ھم باز بیتگ اَنت۔ بائیبل ءِ ردا سلیمان ءَ 700 نکاحی ئیں جَن لوگ ءَ بیتگ ءُ 300 صد سریت۔۔۔۔مسلمانانی پاکیں کتاب صحیح بخاری ءِ تھا ابو ھریرہ بیان کنت کہ
” حضرت سلیمان ءَ یک روچی گوں فرشتہاں گُشتگ کہ من انشپی صد زالانی گورا وپت ءُ واب کناں ءُ صدیں زالاں چہ یکے ءَ یک زھگے پیدا بیت کہ آ خدا ءِ راہ ءَ کُشت ءُ کوش کنت۔ فرشتہاں گُشتگ کہ تو انشاءاللہ بگوش، تہ حضرت سلیمان ءَ گُشتگ من انشاءاللہ گُشگ ءَ بیھال بیتگ اَنت۔ تہ آ شپ ءَ حضرت سلیمان صدیں زالانی گورا شُتگ ءُ ہر زالے ءَ ھم چُک پیدا نہ بیتگ۔ او بس یکے ءَ نیم توامیں زھگے پیدا بیتگ۔ ابو ھریرہ گُشیت، پدا نبی صلی اللہ علیہ وسلم ءَ گُشتگ اگاں سلیمان ءَ انشاءاللہ بہ کَش اتیں تہ چو نہ بوتگ اَت ءُ آئی ءِ ضرورت پیلہ بیتگ اَت”
صحیح مسلم ءِ حدیث نمبر ( 1654 ) ءَ است اِنت کہ سلیمان ءَ نود جَن گیپتگ۔ فارسی اسلامی لٹریچر ءَ است اِنت حضرت سلیمان ءَ گوں یمن ءِ شاہ بانک بی بی بلقیس ءِ گما ھم سانگ کُتگ۔ اے چوش کہ حضرت سلیمان ءَ وتی فرمان برداریں جِن حکم کُتگ اَنت کہ آھاں شُتگ یمن ءِ شاہ بانک گوں تھت ءَ چِست کُتگ ءُ آؤرتگ۔
اے سئیں مذھب اے گپ ءِ ھم منوگر اَنت کہ سلیمان ہر زندگیں سھدار ءِ بولی ءُ زبان ءَ سرپد بیتگ۔ قُرآن شریف ءِ ردا حضرت سلیمان شام ءِ دمگ ”نمل’ ءَ گوں لشکر ءَ سفر جنگ ءَ بیت کہ یک مورے ءِ آواز ءَ اِش کنت کہ دومی موراں گوانک جنت ءُ گُشیت کہ بہ تچ اِت کہ سلیمان ءِ لشکر مارا لگت کنت، تہ سلیمان مور ءِ آواز ءَ اِش کنت(سورہ نمل 18) ۔۔ بنی اسرائیل ءِ روایتانی تھا ھم حضرت سلیمان ءُ مور ءِ داستان است اِنت۔ بنی اسرائیل ءِ روایتانی تھا سلیمان ءَ مور ءِ توار اِش کنگ ءَ پد پہ مڑاھے سر بُرز کُتگ ءُ پہ شانے گُشتگ کہ من تُرم خانیاں، پدا مور ءَ سلیمان ءِ دل ءِ خیال مارتگ ءُ گُشتگ کہ وت ءَ تُرم خانی سرپد مہ بو کہ من سرپداں کہ تئی حقیقت چی اِنت۔ تو یک پِٹے آپ ءَ چہ پیدا بیتگ یے۔پدا مور ءِ پسہ اِش كنگ ءَ گوں سليمان شرمنده بيتگ (جیوش انسائیکلوپیڈیا تاکبند 11 صفحہ 440)۔۔۔۔۔۔
تفسیر ابن کثیر ءِ تھا سورہ نمل ءِ تفسیر ءَ است اِنت کہ سلیمان ماں شام ءِ دمگ ءَ ھما مور ءَ کہ دوچار کپتگ آ میشے کَدّ ءَ مزن بوتگ۔ پدا ھمے آیت ءِ تفسیر ءَ عمادالدین حوالہ دیان ءَ گُشیت کہ یک رندی سلیمان ءِ لشکر ءَ یک ھندی ءَ اُرد کُتگ ، سلیمان کہ دست ء آنجگ ءِ نیمون ءَ در کپتگ تہ آئی ءَ دیستگ کہ یک مورے کہ آئی ءَ وتی دست بُرز ءَ کُتگ اَنت ءُ چہ رَبّ ءَ دعا لوٹگ اِنت کہ یا اللہ من تئی گُنہگاریں بندھاں، مئے گناھاں مہ چار، چہ وتی رحمتاں ھور بِدئے۔ پدا سلیمان وتی لشکر ءِ گورا اَتکگ ءُ گُشتگے کہ لَڈیے کہ آ ھور ءِ آپاں ما نہ وریں کہ آ ھور ءَ دگری ءِ دُعایانی برکت ءَ گورتگ۔ ھمے آیت ءِ تفسیر ءَ نبشتہ اِنت کہ یک رندی پیغمبرے مورے ءَ گَٹ پاتکگ۔ پدا ھما پیغمبر ءَ حکم کُتگ کہ مورانی ھوںڈاں آس مانداریے۔ پدا فرشتہی نازل بیتگ ءُ گُشتگ کہ اللہ تعالیٰ گُشیت تو پہ یک مورے ءِ ردی ءَ منی سرجمیں پرھیزگاریں بندہ کُشتگ اَنت۔۔
ھمے بیتگ حضرت سلیمان ءُ مذھبانی ردا ھمیش اَنت آئی ءِ صفت ءُ بودناکی۔۔۔۔۔۔۔۔
