سُتکگیں اے گُلزمین سبزیت مُنیر
اندر ءِ آس ءِ گِر ءُ دارے کنیں
۔۔۔۔۔۔۔۔۔۔۔۔۔۔۔۔
مرچی سنگتی ءَ باز وشیں گپے جَت کہ ”انسان نَزانتکار نہ اِنت، بلے آ وت چار ءُ تپاس نہ کنت”۔ من تاں حدے ءَ اے گپ ءِ سرا تپاک کناں۔ بلے ما اگاں انسان ءِ تب ءِ گپ ءَ بہ جنیں تہ یک راستی ئے مئے دیم ءَ کئیت کہ انسان ءَ چہ دگرانی تب ءُ آتب ءِ زانگ ءِ ھاترا درستاں چہ پیسر وت ءَ زانگ لوٹیت کہ من کئے آں۔ اگاں انسان ءَ وتی اندر ءَ سَرُک دات ءُ وتی زانگ ءِ جُھدے کُت تہ انسان زانت ءِ یک آپسری ءَ سر بیت ءُ دومی ءِ زانگ ءَ ھم آئی ءَ آسانی بیت۔ انسان ءَ اگاں دومی زانت گُڑا ھمائی ءِ تب ءُ مئیل ءِ مطابق ءَ وتی گپ ءَ آئی ءَ سر کُت کنت ءُ گوں دلیلاں آئی ءَ وتی نیمگ ءَ تَرینت کنت۔ بلے پہ انسان ءَ مستریں مُشکل اِش اِنت کہ آ مدام زانتکاری ءِ شوپچ ءَ کپتگ ءُ دومی ءِ گپانی گوشدارگ ءَ ھچ وڑا تیار نہ اِنت۔ انسان ءَ نہ وت ءَ زانتگ ءُ نہ دومی ءِ زانگ ءِ جُھدے کُتگ۔ پمیشا وت ستر ھراب بہ بیت، بلے دومی کہ آئی ءِ ردیاں زاھر کنت تہ برانز گیپت ءُ ھمدا چہ کینگ ءُ کست ردوم گِر اَنت۔ نفسیاتی زانوگرانی ردا بنی آدم ہر کرد ءَ کہ کنت تہ آ گرد ءِ پُشت ءَ مزنیں کینگی بندوک اِنت..........
اگاں انسان ھمے ذاتی کینگ ءِ گِر ءُ دار ءَ بہ کنت تہ آ وت ءَ ھم زانت کنت ءُ دومی ءِ زانگ ءَ ھم سوب مند بیت کنت۔ پہ درور من وا زاناں کہ پلانی ھراب نہ اِنت، بلے من گُشاں ”پمیشا ھراب اِنت کہ آ من ءَ ھراب گُشیت”۔۔۔ آ گُشیت شپچراگ شر اِنت، بلے پمیشا ھراب اِنت کہ آ من ءَ ھراب گُشیت۔ بزاں مئے ھمک کینگ ءُ کست ءِ پُشت ءَ یک ذاتی ضدے بندوک اِنت۔ ھمیشی ءَ انسان چہ کَٹ ءُ رُج ءَ بُرتگ ءُ انسان ءِ تھا رواداری ءُ برداشت ھتم کُتگ ءُ وت گلائی ءُ وت ستائی ءِ آماچی کُتگ، انسان اگاں وتی اندر ءَ سَرُک مہ دنت ءُ وت ءَ مہ زانت تہ دومی ءَ ھم زانت نه کنت................
مرچی کسانیں مڑاھداریں سنگتے ءَ AN Rind Mandi ءِ نام ءِ سرا من ءَ باز زاہ ءُ بد کُت۔ بلے من وا آ سنگت ءِ بیک گراؤنڈ ءَ سرپداں کہ آ ھراب نہ اِنت۔ بلکیں کسانے ءِ بھارانی تہیں، آئی ءِ عمر بہ بیت ھم 18 سال۔۔۔۔۔ پدا اے عمر ءِ تقاضا ھم ھمیش اِنت۔ پدا آئی ءِ ھما گپ کہ دل ءَ اَتکگ اَنت، پرچا مہ جنتے۔۔ من پرچا ذاتی ضد ءَ کینگانی رنگے بہ دیاں ءُ بلوچ ءَ ھراب بہ گُشاں۔ دو براتانی میان ءَ الم گپے بیت۔۔۔ بلے اگاں کسے بہ گُشیت کہ پلانی پمیشا ھراب اِنت کہ آئی ءَ من ءَ ھراب گُشتگ۔ اے گپ ءَ ھچ وڑیں دلیل نیست ءُ گیشیں تاوان پیدا کنت..................
بلے اگاں ما بلوچ ءِ تب ءُ آ تب ءِ گپ ءَ بہ جنیں تہ آ مدام منفی مڑاھداری ءِ شوپچ ءَ کپتگ۔ بلوچ ءَ نہ وتی اندر ءِ زانگ ءُ آئی ءَ پلگار کنگ ءِ جُھد کُتگ ءُ ناں دومی ءِ زانگ ءُ آئی ءَ ھمائی ءِ تب ءُ مئیلانی مطابق ءَ سرپدی دیگ ءِ جُھد کُتگ۔ بلوچ ءِ سیاست بہ بیت کہ ادب آ مدام چاکری کینگانی عھد ءَ زر اِتگ۔ بیبگری مھر گواہ نہ کنت۔ بلوچ وت ءَ پُرمڑاہ ءُ بھادُر گُشیت۔ بلے بلوچ ءَ اے مڑاھداری ءِ ماڑی مدام منفی کردانی سرا بستگ، اگاں پہ راستی بچارے تہ بلوچ ءِ اے پُرشانی ءُ مڑاھداری ءِ سںچ داں ادا کئیت ءُ سر بیت کہ ”آدینگ” گُشیت کہ
”من بُرّاِتاں میر ءِ اھتیار جوانیں”
ھمے منفی سِنچ اِنت کہ بلوچ ءِ مڑاھداری ءِ جوڑا مدام بالا داریت۔ بلے من وا ھیراناں بلوچ ءَ نہ وتی گوست ءَ سبق زُرتگ ءُ نہ وتی زانگ ءُ وتی راجمان ءَ پلگارگ ءِ جُھدے کُتگ۔ بیست ءُ یکمی کرن ءَ ھم غلام اِنت۔ بلے وتی گوست ءِ سرا پھر بندیت۔ دگرانی غلامی ءَ تاں شست ءُ شش سال ءَ برداشت کنت۔ بلے وتی براتے پہ نزانتکاری گپے بہ گُشیت ئے، آ برانز گیپت ءُ گُشیت اے مزنیں غداری، ۔۔۔۔۔۔ دومی نیمگ ءَ اے راج ءِ تھا غدار ھم ھَست ۔ شَپُک ھم ھست، بلے ابئید ء وتی راجمان ءِ پلگارگ ءُ ساپ کنگ ءَ چاکری مڑاھداری ءِ شوپچ ءَ کپتگ ءُ وتی جند ءِ برات ءِ سرا سک ڈڈیں...............
