اگاں ما راستی بلوچستان ءِ گوستگیں سی ءُ چل سالانی تاریخ ءِ سرا چماں شانک بِدئیں تہ مارا یک راستی یے گندگ ءَ کئیت کہ اینکہ بلوچ ورناہ چیریں ادارھانی کمک ءَ سرکاری شَپُکاں منشیات داتگ ءُ کُشتگ، اینکہ تُپنگ ءُ ٹوپانی وسیلت ءَ کُشگ نہ بیتگ اَنت۔اگاں کسے پہ راستی پٹ ءُ پول بہ کنت تہ دگہ راستی ئے ھم دیم ءَ کئیت کہ ماں بلوچستان ءَ گیشتر منشیات زدگیں ھند مکران اِنت۔ ادا بلاھیں عالمی ڈرگ مافیا ءِ مردم نِشتگ اَنت۔ چو امام بھیل ءِ دروشم ءَ ۔۔۔۔۔۔۔۔۔۔۔ او درمیانہ طبقہ ءِ لیڈرانی مھکم تریں ھند ھم مکران بیتگ۔ پدا اگاں بچارے تہ ھمے راستی ھم دزکپیت کہ منشیات ھم درمیانہ طبقہ ءِ داتگیں دادے کہ مرچی ھمے درمیانہ طبقہ ءِ مردم وھد ءَ پدر کُتگ اَنت کہ ایشانی سیادی گوں ڈرگ مافیا ءَ است اِنت۔ مرچی اے گپ چہ کس ءَ چیر نہ اِنت کہ شپکیں امام بھیل کئے اِنت ءُ کئے ھمراہ اِنت۔ درمیانہ طبقہ ءِ لیڈر تہ انگت وتی پندلاں چہ دزکش نہ بیتگ اَنت۔اے انگت اے بزگیں راج ءَ ریپّینگ لوٹ اَنت۔ او لھتے بلوچ پہ ذاتی نپانی ھاترا تہ انگت ھمیشانی رند ءَ کپتگ اَنت ءُ پہ لاشعوری ھمے راج دُشمنی ءِ کار ءَ ھوار اَنت۔ درمیانہ طبقہ ءِ اینٹی سردارازم ءِ نعرہ وا دیریں پدر بوتگ بلے مرچاں اے راجی تپاکی ءِ ٹرم، شعوری ءُ سائنسی سیاست ءِ نام ءِ سرا راج ءَ رد دیگ لوٹ اَنت۔۔۔۔۔۔۔۔۔

بلے راستی اِش اِنت کہ ماں بلوچستان ءَ منشیات ءِ کار ءُ بار ءِ ردوم دیگ ھم درمیانہ طبقہ ءِ دادے کہ ایشاں اے بزگیں راج ءَ بخشاتگ، بلے راج بے سما اِنت۔ چیاکہ ایشاں پہ زاھری منشیات ءِ ھلاپ ءَ بلاھیں نعرہ جتگ۔ مکران ءِ مردم کُشیں امام بھیل کہ دُنیا ءِ بدنام تریں مردمانی لڑا ھوار اِنت ، اے مرچی ھمیشانی ھمراہ اِنت۔ مردم کُشیں امام بھیل آ وھد ءَ کہ ”بانکے” ءِ سیاست کنوکانی ھمراہ اَت، گُڑا ھمے درمیانہ طبقہ ءِ مردم ھرجاہ ءَ گَشت ءُ ھمے گپ ءِ جت کہ بچار بلاھیں منشیات فروشی ایشانی ھمراہ اِنت۔۔۔بلے مرچی درمیانہ طبقہ ءَ دیست کہ مھلوک ءِ دیم ءَ مئے بستگیں دروگ پاشک اَنت۔ نو آ پہ زاھری امام بھیل ءِ ساھگ ءِ چیر ءَ وتی نیم زندیں سیاسی تلام ءَ را زندگ کنگ لوٹ اَنت۔ ما مرچی چہ درمیانہ طبقہ ءِ لیڈرانی دپ ءَ چہ ھمے گپ ءَ اِش کنگ ءَ اِنت کہ امام بھیل، بقول ھمایاں امام بزنجو وا میر غوث بخش ءِ سیاسی سنگتی بیتگ۔ اے میر ءِ سیاسی وارث اِنت۔۔۔۔۔

نو ھمے گپ پدر اِنت کہ منشیات، کہ بازیں بلوچ ورناہ منشیات ءِ ھرجان بیتگ اَنت ءُ بازیں گِس تباہ ءُ برباد بیتگ اَنت۔ اے ھم درمیانہ طبقہ ءِ پندلے بیتگ کہ سر زاھری ایشاں پہ راج ءِ ریپّینگ ءَ منشیات ءِ ھلاپ ءَ نعرہ جتگ بلے چیر ءُ اندری گوں ھمے راج دشمنیں کار ءَ ھوار بیتگ اَنت۔ اگاں کسے نہ منیت گُڑا مرچیگیں امام بھیل ءِ گوں ایشاں ھمراھدرای پدریں مثالے۔۔درمیانہ طبقہ بہ بیت یا میر محمد علی رُپت ءُ روپ گروپ، اے سکیں دروگ بند ءُ شتلیں مردم اَنت۔ ایشاں پہ ذاتی نپانی ھاترا سرجمیں بلوچی روایت سرگوز کُتگ اَنت۔ ایشاں یک نیمگے سیاست ءِ نام ءَ بلوچ ریپّینتگ ءُ دومی نیمگ ءَ گوں شپکاں ھوار بیتگ اَنت ءُ بلوچاں زھر داتگ ءُ کُشتگ۔ اے گپ ءَ ھما بلوچ ماریت کہ آھاںى بچ ھمے شومیں نشہ ءِ ھرجان بیتگ ءُ مُرتگ اَنت۔۔۔مردم کُشیں امام بھیل بنیاد ءَ آئی۔ایس۔آئی ءِ جوڑ کُتگیں مردمے۔۔ آئی۔ایس۔آئی کجام وھد ءَ بہ لوٹیت آئی ءَ کجام گروپ ءِ ھمراھی ءَ دیم دات کنت۔ درمیانہ طبقہ یا رُپت ءُ روپ گروپ۔۔۔۔۔۔۔۔۔۔اے دوئیں گروپاں پہ وتی پلہ مرزی ءِ ھاترا بے پرکیں دانشور ھم پیدا کُتگ۔۔۔ ھما وھد ءَ کہ امام بھیل رُپت ءُ روپ گروپ ءِ ھمراہ اَت۔ من رُپت ءُ روپ گروپ ءِ دانشور لال بخش قومی ءِ برات ڈاکٹر خدابخش قومی ءَ را گُشت ”واجہ اے چونیں سیاستے شما کنگ ءَ یے، مکران ءِ مستریں منشیات فروش وتی ھمراہ کُتگ ءُ گُشئے کہ ما راج ءِ نمائندہ اِنت” گُڑا واجہ ءِ جواب ھمے بوت کہ ”امام بزنجو وا مزنیں سماجی رہنمائی، امام تریاک ءُ چرس بھا نہ کنت، بلکیں دگہ کار ءُ بار کنت۔ امام ءِ برکت ءَ مکران ءَ ھزاراں غریب ءُ بزگر نان ورگ ءَ اَنت۔ من دل ءَ گُشت کہ امام ءِ سماجی حىثيت ءُ بزگر پروری ءِ راز ءَ من شر سرپداں، امام ھزاراں بزگر ءُ غریباں نان دیگ ءَ نہ اِنت، بلکیں تریاک ءُ چرس دیگ اِنت۔ بلے ترا ذاتی نپاں اَنچو کور کُتگ کہ ترا ھمے تریاک ءُ چرس نان ءِ دروشم ءَ نظر ءَ کاینت۔۔۔

مرچی ھرکس ءُ ناکس سرپدیں کہ  ھمے مردم کُشیں امام بھیل ھمے درمیانہ طبقہ ءِ ھمراہ اِنت ءُ ، من ءَ گیشتر ھما مردمانی عقل ءِ سرا بزگ بیت کہ آ تہ انگت ھمے درمیانہ طبقہ ءِ لیڈرانی ھمراہ اَنت ءُ وتی دوست ءُ دُشمن ءَ انگت پجاہ آرگ ءَ نہ اَنت ءُ وتی راجی پجار ءِ درچک ءَ گوں وتی دستاں گُڈگ ءُ تباہ کنگ ءَ اِنت۔۔۔۔۔۔۔۔