Facebook
RSS

کِسّہ ءِ آسر

-
شپچراگ


گوست دربرجاھے
......................
گوست پہ انسان ءَ دربرجاھے، بائد وا ھمیش اَت کہ آئی ءَ چہ گوست ءَ سبق بہ زُرتیں۔ بلے راستی ایش اِنت کہ شخصی یا راجی درچاں، انسان وتی ھمک کُرتگیں کار ءُ کردانی سرا پھر بندیت ءُ پہ مڑاہ وتی ھمک گپّ ءِ سرا اوشتاتگ۔۔۔۔۔۔۔۔۔ چیاکہ انسان ءِ تب ءُ آتب ھمیش اِنت کہ آ وتی گوست ءِ کُرتگیں کار ءُ کردانی ایرجنگ ءُ وتی وڈم داتگیں گپانی دوبر واپس زورگ ءَ وتی شخصی واھگ ءُ وتی ذات ءِ نفی سرپد بیت۔ فردی بہ بیت یا راجی، آ وتی گوست ءِ ھمک کرد ءُ گپ ءِ شر ءُ راست ثابت کنگ ءَ پہ تمردی اوشتاتگ ءُ وت ءَ عاقل ءُ دُنیا ءِ بہادرتریں راج سرپد بیت۔

بلوچ ءَ ھم ھمے یاتانی پژگرد ءَ وت ءَ زندگ داشتگ۔ بلوچ ءِ پیرُک چاکر ءُ گوھرام آں یک انچیں آسے روک کُت کہ ھزاراں بامردیں براھندگیں بلوچ ھمے وت براتی کینگانی وڈالاں شُت اَنت۔ سی ھزار راج ورناہ وت براتی اڈانی سکین ءَ زھر دپیں تیگانی دپار بوت اَنت ءُ ھلک ءُ دمگ سُتک ءُ ویرندان بوت اَنت۔ ھمے جنگ اِتاں کہ ایشاں بلوچ ءِ قومی وحدت پروشت ءُ بلوچ در پہ در ءُ ھاک پہ سر کُت ءُ روچ ءِ مروچی بلوچ درامدانی غلامی ءَ چہ در نئیت۔ بلوچ تاریخ ءَ ”چی سرا شست ءُ چا سرا پنجاہ” تنگھیں ورناہ باگاڑی میارانی مڑاھداری ءِ ڈیساں شُت اَنت۔ بلے بِچار بلوچ ءِ شاعر ءُ دانا ءُ زانوگر ءَ کہ ابئید ء اے سرجمیں کردانی سرا سبق زورگ ءُ اے جاھلی کردانی ایرجنگ ءَ، آ پہ مڑاہ وتی گوست ءِ اے جاھلی سِنچ ءَ بلوچ ءِ مڑاھداری ءُ میار جلّی ءِ نشان سرپد بنت۔۔۔۔۔

چیاکہ بلوچ ءِ تب ءُ مئیل ھمیش اِنت کہ آ پہ وش مَنّی ءُ لاچاری وت ءَ دُنیا ءِ بھادر ءُ مڑاھداریں راج منارینگ ءَ چہ ھمے جاھلی ءُ منفی سِنچ ءَ چہ کمک زیریت ءُ وتی دل ءَ وشنود کنت۔ تھنا بلوچ اِنّاں ، بلکیں دُنیا ءِ کجام راجے بہ بیت، آ ھمے گوست ءِ جاھلی ءُ منفی کردانی باپُشت ءَ وتی مڑاھداری ءُ بھادُری یے منارینگ ءِ جُھد ءَ کنت ءُ وتی دل ءَ وش کنت۔ پہ مثال مسلمان کہ وتی گوست ءِ سرا پھر بنداَنت ءُ آ وتی گوست ءِ ھونریچی، دری راجانی کُشت ءُ کوش، ”مالِ غنیمت” ءِ نام ءِ سرا آھانی مڈی، نیاڑی، مال ءُ دلوتانی پُلگ ءُ برگ ءَ شان ءُ مڑاہ ءُ مستریں جھاد ءِ نام ءَ دنت۔

بلے بنی آدم ءَ میار پِر نیست۔ آ سَک بَزگ ءُ لاچار اِنت۔ آ وتی ذاتی واھگ ءُ راجی سِنچ ءَ نفی کنگ نہ لوٹیت۔ آ اگاں گوست ءِ ھمے جاھلی ءُ منفی کردانی باپُشت ءَ وت ءَ زِندگ دارگ ءِ جُھد ءَ مہ کنت تہ آئی ءِ راستی پاشک بیت۔ گوست ءِ یاتانی آدینک ءَ ھچ چوشیں جوانیں ءُ مثبت کردی پَرآئی ءَ پَشت نہ کپیت کہ آئی ءِ سرا آ پھر بست بہ کنت۔ شاعر ءُ دانا ھم وتی راجی مڑاھداری ءِ جتگیں بٹاکانی سرا اوشتاتگ۔ چیاکہ آ ھم منفی کردانی باپُشت ءَ وتی ذاتی ءُ راجی سِنچ ءَ برجاہ دارگ لوٹیت۔ وت ءَ ءُ وتی راج ءَ دُنیا ءِ مڑاھدار ءُ بھادُریں راج ءِ منارینگ ءِ جُھد ءَ اِنت۔ ھمیش اِنت انسان ءِ حقیقت ءُ ھمیش اِنت آئی ءِ راستیں کِردانی آدینک۔۔۔۔

چمشانک بہ دئے