پاکی وتگڑیں مُلک ءِ وتگڑیں گچین کاریاں کمے وھد پشت کپتگ ءُ بلوچ جیڑہ ءِ بابت ءَ ھم بازیں گپ دیم ءَ آیگ اِنت۔ بازیں گچین ءُ چار ءُ گُزارے بیئگ اِنت۔ بازیں وتساچیں راجدوست گلانی نیمگ ءَ بازیں گپ ءُ ھبر دیم ءَ آیگ اِنت ءُ نوکیں گچین کاریانی تھا بھر زورگ ءِ تیاری نوکیں وڑی ءَ بیئگ اِنت۔بازیں جاک ءُ صلواتے بیئگ اِنت۔ سوداگرانی صف بندی برجاہ اِنت ءُ چو پیشی وڑا یک گلے ءَ دزکشی ءُ دومی گلانی تھا ھوار بیئگ ءِ کار ھم پاکی چیریں ایجنسیانی گُشگ ءِ پدا بیئگ اِنت تاکہ آئی۔ایس۔آئی کچ ءُ تور بہ کنت کہ دیم ءِ الیکشناں کئے وزیر اعلیٰ ءِ بستار ءَ دیم ءَ آرگ بہ بیت۔ ملا ، مالک یا سردار۔۔۔۔۔۔۔۔۔۔۔۔۔۔۔دومی نیمگ ءَ دگہ مانگیش اِتگیں لیکہے دیم ءَ آیگ اِنت کہ اگاں ٹپ ءُ ٹوریں لاشانی دور دیگ ءِ رد بند بہ بیت تہ ھما واجہانی نیکیں واھگاں چہ ھمے گپ پدر بیت کہ ما ڈیموکریٹک سیاست ءِ منوک اِنت ءُ ڈیموکریسی ءِ سیاست ءَ دزکش نہ بئیں۔۔ چو گُشئے کہ ھمے واجہ تہ انگت سرپد نیاں کہ کجا ملائی اسلامی نام گیپتیں مُلک ءُ کجا ڈیموکرسی۔۔ پمیشا اے واجہ تہ گُشئے انگت ھمے نیکیں واھگ ءَ چہ دزکش بیئگ نہ لوٹ اَنت نو دیم ءَ اے گچین کاری وت پدر کنت کہ کئے بھر زوریت ءُ کئے پہ بالاچی مڑاھداری ءِ رھبندانی سرا رؤت ءُ وت ءَ زندگ کنت۔۔۔۔۔۔۔
دومی نیمگ ءَ پاکی آمیدگس ءُ لھتے پاکستانی پارٹی ھم چو گُشئے کہ ھمے واجہانی واھگانی پدا پہ نام بازیں گامگیجی ءِ زورگ ءَ دِلمانگ اَنت ءُ بیت کنت کہ آیوکیں چیزی وھداں اے پہ بلوچ ءَ مھربان بہ بنت ءُ ٹپ ءُ ٹوریں لاشانی دور دیگ ءَ دزکش بہ بنت ءُ پارلیمانی واجہانی گُشگ ءِ پدا وتی نوکیں پندلانی سازگ ءَ چہ پیش آ بلوچ ءِ نام ءِ سرا ادا دگہ سرکاری جوڑ بہ کن اَنت ءُ دُنیا ءَ پیش بہ دارَنت کہ راجدوست مئے ھمراہ اَنت۔۔۔(قحبگ ،قحبگی مکر ءُ ھُنر ءَ سک زبریں)۔۔۔۔۔۔۔
آیوکیں شیطانی مکر ءُ گچینکاریانی بابت ءَ باریں کواس ءُ زانوگرانی نیمگ ءَ بازیں گپ دیم ءَ آیگ ءَ اَنت۔ لھتے گُشیت کہ اے گچینکاریانی بائیکاٹ کنگ پہ بلوچ ءَ ریفرنڈمے بستار ءَ داریت۔ بائد بلوچ ھما گل وت ءَ راجدوست گُشنت آ بائیکاٹ بہ کن اَنت۔ آ این۔پی ءُ بی۔این۔پی ءِ نیمگ ءَ ھمے گپ ءَ جن اَنت کہ ایشانی ماں گچینکاریاں بھر نہ زورگ بلوچ ءِ ماں دُنیا ءِ دیم ءَ ریفرنڈم ءِ بستار ءَ داریت۔ این۔پی ءَ وتی فیصلہ کُتگ کہ من پاکستان ءِ بھر باں ءُ پاکی فریم ورک ءِ تھا پہ بلوچ ءَ شیر ءِ جو ءَ کاراں ، بلے بی۔این۔پی ءِ نیمگ ءَ دنیگہ چوشیں گپ دیم ءَ نیاتکگ کہ آ گچینکاریاں بھر زوریت یا ناں۔۔۔۔۔ بازیں دانشور ءُ کواساں پاکی سازتگیں پندلانی پُژدر ءَ یک بلاھیں واھگے بندوک کُتگ ءُ آیوکیں گچینکاریاں پاکی اڈ داتگیں توجیلانی پُشت ءَ ھمے واھگ ءَ پہ زانت ءُ نزانتکاری درشان کنگ ءَ اَنت کہ بلوچ الیکشناں بھر زوریت ءُ ایشی چہ بقول ھمایاں بلوچ علیحدگی ءِ جُنز ھم نزور تَرّگ اِنت۔اگاں کسے تھا کمے ھم راستی ءُ ایمانداری بہ بیت تہ آ اے گپ ءَ زانت کہ بلوچ ءِ علیحدگی ءِ جُنز نہ اِنت۔۔بلکیں آزادی ءِ جُنز اِنت چیاکہ بلوچ ءِ پیش ءَ یک آزادیں بستارے بیتگ ءُ بلوچ ءِ سرا زور قبضہ کنگ بیتگ ۔اے درگت ءَ یک بلوچ کواسے وتی نیکیں واھگاں دُنیا ءِ دیم ءَ وتی نبشتانکی تھا چوش درنگاز کنت کہ من اے مرد ءِ سرا بازیں اوستے داشتگ۔۔۔
”besides it's gradually subsiding secessionist movement”
بلے راستی اِش اِنت کہ بلوچ ءَ وتی فیصلہ کُتگ۔ بلوچ ناں ٹپ ءُ ٹوریں لاشانی بند بیئگ ءَ چہ راجی جُنز ءَ دزکش بیت ءُ ناکہ پاکستان ءِ بھر بیت کنت۔ ناکہ اے توجیلاں بلوچ ءِ جُنز نزور ترّیت۔۔ بلکیں اے وھد ءَ بلوچ یک انچیں وھدی ءَ گوزگ اِنت کہ آیوکیں الیکشن پہ بلوچ ءَ یک گیشواری بیت۔ چر اے الیکشن ءَ بلوچ وتی دوست ءُ دُشمن ءِ پجار ءَ کنت۔۔۔ اے گچینکاری ءَ چہ بلوچ ھمے گپ ءَ زانت کہ کئے قحبگ ءُ کئے پارسا۔۔۔۔ اے الیکش ھمک مردم ءَ چو روچ ءَ بلوچ ءِ دیم ءَ پیشداریت ءُ بلوچ ءِ ذھنی گپچلاں ھلاس کنت ءُ ھرکسے راستیں آدینک ءَ بلوچ ءِ دیم ءَ پیشداریت۔۔۔۔ اے فائدہ مندیں پہ بلوچ راج ءَ۔۔۔۔۔۔۔۔۔۔۔
