تاریخ ءِ تھا است اِنت کہ تریاک(Opium) قبضہ گیریں زوراک ءَ یک مضبوطیں سلاھے ءِ بستار ءَ ھم کارمرز کُتگ۔ تاریخ ءِ تھا بازیں ھنداں اے نشان گندگ ءَ کاینت کہ جنگانی وھد ءَ زالمیں لشکراں وتی ھندی دلار ءُ داشتگیں مردمانی کمک ءَ ایردستیں راجانی ھند ءُ دمگاں تریاک ءُ دگہ نشہ ءِ ردوم دیگ ءِ جُھد کُتگ، دانکہ آ راج نشہ ءِ تھا وت ءَ بہ پیڑائی ءُ آئی ءِ راجی سِنچ ءُ زانش ھلاس بہ بیت۔ بلے اے درگت ءَ مستریں مثال چائنا(CHINA) اِنت۔۔ ھژدھمی صدی ءَ وھدی انگریز ءَ ماں ایشائی ھند ءُ دمگاں وتی پاد ایر کُتنت ءُ ادا بازیں راجی انگریزاں جَت ءُ غلام داشت اَنت۔ بلے ایشیا ءَ انگریز ءِ دیم ءَ یک مستریں دُژمنے چائنا اَت۔۔ انگریز ءَ نہ چائنا ءِ سرا ارش کُت کُتگ اَت نہ آئی ءَ اودا کار ءُ ھاترا چوشیں حاصیں گامگیجی زُرت کُتگ اَت۔ انگریزانی نظر ءَ چائنائی راجانی سوب مندی ءُ مضبوطی ءِ مستریں راز اِش اَت کہ چائنائی فضول حرچ نہ اِتاں ءُ چائنائیاں دری چیز ھم کارمرز نہ کُتگ اَت۔ پمیشا انگریزاں ماں چائنا ءَ تجارت ءِ میدان ءَ حاصیں گامگیج زُرت نہ کُت۔۔ چائنیزانی اے سِنچ ءِ پروش دیگ ءَ انگریز ءَ بس یک پندلے ساز اِت کہ آئی ءَ ماں چائنا ءِ چاگرد ءَ وتی ھندی دلارانی کمک ءَ تریاک (Opium) ردوم دات۔ پہ راستی بچاریے تہ انگریز تاں حدی ءَ وتی اے سازتگیں پندل ءَ سوب مند ھم بوت۔ تاں چائنا سوشل آشوب ءِ وھد ءَ ماں چائنا ءَ لکھاں مردم ھمے مردم کُشیں نشہ ءِ ھرجان اَت۔ یک ھسابے ءِ ردا ماں چائنا ءَ تاں سوشلسٹ آشوب ءِ وھد ءَ سی لکھ مردم ھمے مردم کُشیں نشہ ءِ دیمپان بیتگ اَنت۔۔۔
بلے اے چائنیز راجانی وش بھتی اَت کہ اودا ”مازے تنگ” ءِ وڑیں راجی رھشونے پیدا بوت ءُ ماؤ ءِ بازیں جُھد ءُ کوشستاں چہ چائنیز راج ءَ وتی اصل رھبند گیپت ءُ آھاں ھمے شومیں نشہ ءِ ھلاپ ءَ کار بندات کُت ءُ لکھانی ھساب ءَ تریاک ءِ کارمرزوک ءُ بھا کنوک جَت ءُ جیلاں دیم دات اَنت ءُ چائنیز راج چر اے سازش ءَ رکینت۔ مرچی چائنا ءَ تریاک ءِ کارمرز کنوک است اَنت بلے کمیں کچے ءَ ءُ اودا سرکاری رھبند ءِ ردا اے یک بلاھیں جُرمے ھم۔۔۔۔۔۔ مرچی ماں اگاں بلوچستان ءِ چاگرد ءَ بچاریں تہ یک یک راستی ئے پدر بیت کہ ماں بلوچستان ءَ ھم ریاستی ادارہ وتی شون داتگیں ایجنٹ ءُ دلارانی کمک ءَ اے نشہ ءَ سلاھے ءِ بستار ءَ کارمرز کنگ ءَ اَنت۔ چیاکہ ظالم ءَ اے تجربہ بیتگ کہ راج پہ تُپنگ ءِ زور ءَ جنگ ءُ کُشگ ءُ ھلاس کنگ نہ بیت۔ بلے نشہ راجی چاگرداں سِنچی ءُ اندری صورت ءَ پروش دنت ءُ چہ ھستاں بے ھست کنت۔
