شیشہ ءِ سائنسی نام Methamphetamine اِنت۔ بلے ایشی ارزانیں دروشم باز اَنت، چوشکہ کرسٹل، مارفین ءُ دگہ بازیں(ایرانی گولی ٹراماڈول ءِ تھا ھم Methamphetamine ءِ کمے کچ ءَ مواد است اَنت)۔ ناکیں دور ءِ شیشہ کہ ما ایشی ءَ Methamphetamine ءِ نام ءَ دئیں، درستاں پیش بازیں ماں جرمنی ءَ تیار کنگ بیتگ۔ بلے Methamphetamine پہ اے ھاترا تیار کنگ نہ بیتگ کہ نشہ ءِ ھاترا کارمرزگ بہ بیت۔ بلکیں جرمنی ءَ اے ڈپریشن ءُ دگہ نفسیاتی نادراھیانی ھاترا تیار کنگ بیتگ۔
بنی آدم ءِ بد بھتی ھمیش اِنت کہ اے مردم کُشیں نشہ نفسیاتی نادراھیانی علاج ءِ ھاترا ،یا سردیں ھنداں چہ سردی ءِ دارگ ءِ ھاترا 1930 ءَ Methamphetamine پہ بھا ءِ ھاترا قانونی صورت ءَ مارکیٹ ءَ آرگ بیتگ۔ 1937 ءَ انچیں گولی ھم نھادی ءَ آرگ بیتگ کہ آھانی تھا Methamphetamine ءِ کمے کچ است اَنت۔ ایشانی مول ءُ مراد انسان ءِ نفسیاتی نادراھیانی علاج کنگ بیتگ۔ بلے ابئید ءِ علاج ءَ اے انسان ءِ کوش ءِ سوب جوڑ بیتگ اَنت۔
Methamphetamine ءِ ارزانیں نام کرسٹل اِنت کہ اے گیش ءَ چہ گیش نھادی ءَ بھا بیت کہ اے ارزانیں دروشم درستاں چہ پیش 1919 ءَ جاپان ءَ جوڑ بیتگ۔ اے چو آرت ءِ دروشم اِنت ءُ امریکا ءَ ایشی ءِ کوڈ نام Desoxyn اِنت ءُ ایران ءُ بلوچستان ءَ ”کرستال” ءِ نام ءَ بھا بیئگ اِنت۔
Methamphetamine ءَ فوجی ھم کارمرز کن اَنت کہ ما جنگ ءِ میدان ءَ واب مہ کپ ایں۔
تاریخ زانت گُشنت کہ ماں ویتنام ءَ امریکی زوراکیں فوج ءِ پروش ورگ ءِ یک مستریں سوبے ھمے بیتگ کہ آ ھمینکہ ذھنی نادراھیانی آماچ بیتگ اَنت کہ آھاں گیش ءَ چہ گیش Methamphetamine کارمرز کُتگ۔ دومی ٹوھیں جنگ ءَ ھم جنگ کنوکیں مرداں Methamphetamine دیگ بیتگ۔ ایشی ءِ سوب ایش اِنت کہ Methamphetamine ءِ کارمرزگ ءَ فوجی واب نہ کپیت ءُ دومی آئی ءَ ٹپ بہ لگ ایت تہ آئی ءَ مارشت نہ بیت۔ بلے آ فوج ءَ کہ اے مردم کُشیں نشہ کارمرز کُتگ تہ اے نشہ آھانی پروش ورگ ءِ سوب جوڑ بیتگ۔
1950 ءَ ماں امریکا ءَ Methamphetamine ءِ گولی تیار کنگ بیتگ، اے گیش ءَ چہ گیش ٹرک ڈرائیور، لئیبی آں کارمرز کُتگ کہ ما دم مہ بریں ءُ کالجانی بچک ءُ جنکاں پہ SEX ءِ ھاترا کارمرز کُتگ کہ رندا ماں امریکا ءَ اے مزنیں نادراھی ءِ جوڑ بیتگ ءُ ایشی ءِ سرا سر زاھری بندش جنگ بیتگ۔1960 ءِ دھک ءَ Methamphetamine انجیکشن ءِ دروشم ءَ نھادی ءَ آرگ بیتگ ءُ ایشی ءِ سوب ءَ امریکی چاگرد روچ ءِ مروچی بازیں جنجالانی آماچ اِنت۔ 1970 ءَ ماں امریکا ءَ Methamphetamine ءِ چیریں شپکی (اسمگلنگ) بندات بیتگ کہ امریکی تاں مرچی ھمے سِلیں نادراھی ءِ آماچ اَنت۔ چرشی ءَ چہ امریکا ءِ روکپتی چاگرد ءِ سرا انچیں تاوان اَتکگ کہ اودے بازیں ورناھیں جنک ءُ بچک ھمے شومیں نادراھی ءِ آماچ اَنت ءُ امریکی سرکار اے نادراھی ءِ گِر ءُ دار ءَ بے سوب بیتگ۔
بلے اے سرجمیں تاریخی حوالہاں چہ ابئید ھم دگہ حوالہے دست کپیت کہ Methamphetamine جرمنی ناں بلکیں ایران ءُ کُردستان ءِ دمگاں یازدھمی صدی ءَ ھم کارمرز کنگ بیتگ۔ ماں ایران ءُ کُردستان ءِ دمگاں جنگولیں مرداں دیگ بیتگ۔ دوازدھمی صدی ءَ حسن بن صبا کہ چو اسامہ بن لادن ءَ جنت ءِ نیمون ءَ ماں کُردستان ءِ کوھاں در کئیت ءُ عباسی مملکت ءِ ھلاپ ءَ جنگ ءَ شروع کنت۔ آئی ءِ جنگی دروشم ھمے بیتگ کہ مرچی ئیں ملا کنگ ءَ اَنت۔ حسن بن صبا ءَ وت ءَ کُردستان ءِ کوھاں داشتگ ءُ عباسی شاہ ءُ وزیرانی ھلاپ ءَ چھاپہ مار جنگ کُتگ۔ آئی ءَ وت کُشیں جنگول ھم تیار کُتگ۔ تاریخ ءَ ثابت اِنت کہ حسن بن صبا ءَ ھما مردم کہ عباسی مملکت ءِ وزیر ءُ آفیسرانی کُشگ ءَ دیم داتگ اَنت تہ آھاں یک انچیں دوائی وارینتگ کہ واب مہ کپاں۔بزاں Methamphetamine ءِ دروشمیں دوائی بیتگ۔ مرچیگیں ملا ھم ھما مردم ءَ کہ وت کُشیں تراک ءَ دیم دینت تہ باز مردم ھمے گپ ءَ جنت کہ اے ملا ھمے گونڈلاں Methamphetamine ءِ دوائی واریننت ءُ گنوک کن اَنت۔
Methamphetamine مرچی ماں دُنیا ءَ مزنیں جنجالے جوڑ بیتگ۔ آ ھند ءَ کہ اے شومیں نشہ ءَ ردوم زُرتگ تہ پدا بازیں پابندیاں چہ ابئید ھم آئی ءِ گر ءُ دار نہ بیتگیں ھیالے۔۔ پمیشا چیزی سال اِنت کہ ھمے نشہ ءَ ماں مکران ءُ بلوچستان ءِ بازیں دمگاں ردوم زُرتگ۔ اگاں چِد ءُ گیش شِنگ بہ بیت تہ پہ بلوچ ءَ مزنیں سر دردی جوڑ بیت کنت۔ امریکا ءِ وڑیں سپر پاور کہ ایشی ءِ گر ءُ دار ءَ بے سوب اِنت تہ بلوچ ءِ من گُشاں اے مستریں بد بھتی اِنت کہ بازیں دگہ جنجال وتی جاہ ءَ مرچی Methamphetamine ھم بلوچستان ءَ ردوم دیگ بیتگ۔ ایشی ءِ مستریں ذمہ دار بلوچستان ءِ منشیات پروشاں کہ ایشاں وتی ذاتی نپ ءُ پہ زَرّ ءِ لالچ ءَ پہ اے راج ءِ ورناھاں انچیں آسے روک کُتگ کہ مرچی دُنیا ھم اے آس ءِ گر ءُ دار ءَ بے سوب اِنت۔۔ بلوچ ءَ چار سال اِنت کہ اے مردم کُشیں نشہ ءَ آشنا اِنت۔ ھما بلوچ کہ ایشی ءِ سوداگری ءَ کن اَنت یا کارمرزی کن اَنت۔ آ وت ھم نہ زاننت کہ اے چی ئے ءُ پرچیا جوڑ بیتگ۔ ماں بلوچستان ءَ Methamphetamine ءِ ردوم گِرگ بلوچ نسل کُشی ءِ سازشے، بلوچ پہ تُپنگ ءِ زور ءَ ھتم نہ بیت بلے Methamphetamine ءِ کمک ءَ چہ ھست ءَ بے ھست بیت۔ دنیگہ دیر نہ گوستگ، دو راہ پشت کپتگ پہ اے مردم کُشیں دوا ءِ گِر ءُ دار ءِ ھاترا، یکے ایش کہ اے بلوچ ءِ کواس ءِ فرض اِنت کہ انچیں لٹریچر بہ ٹھینیت ءُ اے دوا ءَ بیمناکیں شکلے ءَ پیش بہ کنت۔ انچیں سیاھگ جوڑ کنگ بہ کہ اے دوا ءَ بدیں رنگ ءُ دروشمے ءَ پیشدارگ بہ بیت ءُ نصابی شکل دیگ بہ بیت ءُ ماں دربرجاھاں بلوچ زھگ ءَ وانینگ بہ بیت۔۔ اے وا بیت نہ کنت ، چیاکہ بلوچ وتی سرزمین ءِ حاکم وت نہ اِنت۔۔۔ دومی راہ ایش اِنت کہ بلوچ دگہ نُقصانے ھم بہ زیریت پہ وتی عاقبت ءِ اوبادگانی رکینگ ءَ۔۔ بزاں ھما مزنیں شپک کہ اے درمان ءَ ھمدا شنگ کنگ ءَ اَنت ، اے جَنَگ ءُ کُشگ بہ بنت۔بلوچ ھمے رھبند گیپتگ کہ ساقی خانہاں ماندار اَنت کہ ما منشیات ءَ ھتم کنیں، اے جوانیں کارے نہ کار شر اِنت، بلے رھبند جوان نہ اِنت۔ پہ ساقی ماندارگ ءَ منیشات بند نہ بیت ءُ ھرکس وتی لوگاں بھا کنت۔۔ پہ ایشی ءِ بند کنگ ءَ ھما ٹوھیں منیشات فروش ءُ غنڈہ بلوچ ءَ جنگ ءُ ھتم کنگ لوٹاں کہ آھاں ھمے چیز چہ ڈن ءَ آؤرتگ ءُ مئے سرا چٹی کُتگ اَنت
