گُشنت کہ شیطان بنی آدم ءِ ازلی دُشمن اِنت۔ سکّیں گوچل ءُ گمراھیں جِنّے کہ ملایانی ردا چہ رُژن ءَ پیدا بیتگ۔ شیطان ءِ ھیالی تصور دُنیا ءِ بازیں مذھباں جُتاھیں  دروشماں است اِنت۔ درستاں چہ پیش مرچیگیں شیطان ءِ تصور چہ عبرانی پیغمبر حضرت موسیٰ (1570 BC) ءِ کِسہ ءُ آیاتاں دست کپیت۔ بازیں ملا گُشنت کہ حضرت موسیٰ ءَ شیطان ءِ چپی چم ءَ لَٹے جتگ ءُ کور کُتگ۔ ایرانیانی مذھب زرتشت (583 BC,660) ءَ ھم شیطان ءِ تصور  دست کپیت۔ بلے زرتشتی آںی شیطان چہ اے دگہ مذھبانی شیطان ءَ تمرد ءُ زوراک تر بیتگ۔ آھانی خدا ءِ واھگ ءِ ھلاپ ءَ ھم شیطان ءَ آھانی خدا ءِ کاراں دزمانجنی کُتگ۔ زرتشتی آنی شیطان ءِ تصور چہ یہودی،عیسائی، اسلام ءِ ملایانی شیطانی تصور ءَ جتا اِنت ءُ زوراک تر اِنت۔ پمیشا زرتشتی ماں اے جھان ءَ دو خدایانی دزمانجنی ءِ منوگر اَنت۔ بزاں نیکی ءُ راستی ءِ خدا(اھورا مزدا، یا یزدان) ءُ دروگ ءُ بدیانی خُدا (اھرمن)،۔۔ زرتشت ءِ منوگرانی ردا اے دوئیں خدایانی میان ءَ جنگ ءُ بجنگ تاں ازل ءَ بگر تاں ابد جاری ءُ برجم اِنت۔ زرتشتانی خدا ءُ شیطان مدام جنگ اَنت۔ وھدی خدا(یزدان) گیش بیت تہ دُنیا ءَ امن ءُ ایمنی کئیت ، پدا وھدیکہ شیطان(اہرمن) گیش بیت ءُ خدا ءَ چیر کنت گُڑا دنیا ءِ تھا گناھگاری ءُ بدکاری ءُ جنگ ءُ فساد گیش بیت۔(زرتشتانی گُشگ ءِ ردا اگاں بچار یے تہ مرچیگیں استیں وھد ءَ ھمے راستی رسیت کہ شیطان(اہرمن) ءِ شاھیم ءِ سر گیش بوتگ ءُ خدا(یزدان) چیر تراِتگ ءُ دُنیا ءَ جنگ ءُ بجنگ ءُ کُشت ءُ کوش گیش بیتگ) بلے زرتشت ءِ منوک چو اے دگہ مذھبانی منوگراں دگہ ھم گپے جن اَنت کہ انچیں وھدی کئیت کہ اہرمن پہ مدامی یزدان ءِ دست ءَ پروش وارت ءُ ماں اے جھان ءَ پہ مدامی امن ءُ ایمنی کئیت ءُ بنی آدم دلجم بیت ءُ مذھب ءُ خدایانی نام ء سرا کُشت ءُ کوش نہ بیت۔ (خدا بہ کنت اہرمن زوت ءَ چہ زوت پروش بہ وارت)۔۔۔۔۔۔۔۔۔۔۔

بزاں زرتشتانی شیطان ءِ تصور چہ عبرانی، عیشائی ءُ مسلمانانی شیطان ءِ تصور ءَ باز فرق داریت ءُ زوراک تر اِنت ءُ آ دیمی پہ دیمی گوں آھانی خدا ءَ جنگ کنت۔ بلے اے سئیں مذھبانی شیطان سکیں چیر جنگ ءُ چالاک ءُ گوچلیں شیطانی۔۔۔۔۔اگاں پہ راستی بِچاریے بائیبل، انجیل ءُ قُرآن ءِ شیطان ھمے یکیں شیطان اِنت کہ آئی ءَ ایشانی خدا ءِ گپ نہ من اِتگ ءُ بنی آدم سجدہ نہ کُتگ ءُ پدا بنی آدم ءِ پِت حضرت آدم رد داتگ ءُ چہ جنت ءَ کَش اِتگ ءُ ماں دُنیا ءَ سربتگ کُتگ۔ نو ھمائیں اے شیطان انسان ءِ سرا چٹی اِنت ءُ ایشاں رد دنت ءُ چہ خدا ءِ رھبند ءَ گِسر کنت ءُ وتی ھمکار جوڑ کنت۔ ایشانی ردا ھما کس کہ شیطان ءِ راہ ءَ برؤت ءُ آئی ءِ جاہ جہنم اِنت ءُ ھما کس کہ خدا ءِ گیشینتگیں رھبند ءَ بہ زوریت تہ آئی ءِ جاہ ءَ پدا ھما جنت اِنت کہ بنی آدم ءِ پِت آدم یک رندی ھمے شیطان ءَ رد داتگ ءُ چہ ھمے جنت ءَ کش اِتگ۔۔۔

ملا گُشنت شیطان ءِ بدبھتی ءِ مستریں سوب وت منّی ءُ وت گلائی بیتگ۔ شیطان ءُ خدا ءِ میان ءَ بُنکی جیڑہ چہ ھمودا بندات بیتگ کہ خدا ءَ گُشتگ من بنی آدم ءَ جوڑ کناں، گُڑا ملائکاں خُدا ءِ اے ھیال ءِ سرا ایراد گیپتگ ءُ گُشتگ کہ تئی عبادت ءَ ما وت بس ایں۔ انسان ءَ جوڑ مہ کن کہ زمین ءِ سرا کُشت ءُ کوش کنت۔۔۔ بلے خدا ءَ بنی آدم جوڑ کُتگ ۔ فرشتہ فرمان داتگ اَنت کہ آدم ءَ سجدہ بہ کن یے۔۔ آ دگہ درستیں فرشتہاں بنی آدم سُجدہ کُتگ ءُ شیطان ءَ گُشتگ کہ یا خدا، تو عظیمیں خدائی یے۔۔ تو پیش ءَ وت گُشتگ کہ من ءَ چہ ابئید کس سُجدہ ءِ لائق نہ اِنت۔ گُڑا آدم ءِ سجدہ ءِ حکم چون؟؟؟؟ پاکیں خدا ءَ گُشتگ۔۔ آ منی حکم بیتگ ءُ اے ھم منی حکم اِنت۔ ”آ گپ ءَ کہ من زاناں شما نہ زان یے۔۔ بلے شیطان ءَ گُشتگ کہ من آدم ءَ سجدہ نہ کناں کہ من چہ رُژن ءَ پیدا بیتگ اَنت ءُ آدم چہ خاک ءَ۔۔۔گُڑا خدا ءَ حکم داتگ کہ تو منی دین ءَ چہ دراَتکگ یے ءُ مدام گمراہ یے ءُ تئی جاہ جہنم اِنت۔ گُڑا شیطان ءَ درائینتگ یا پاکیں خدا من ءَ گمراھی قبول اِنت۔ بلے منی  بس یکیں گپ ءَ قبول کن کہ من ءَ ماں جھان ءَ تاں قیامت زندگ بہ کن۔ خدا ءَ شیطان ءِ یکیں گپ منّ اِتگ ءُ نو ھمائیں شیطان بزگیں انسان ءِ سرا چٹی اِنت ءُ ھرجاہ انسان ءِ رندا کپتگ ءُ انسان ءَ گمراہ کنت۔۔۔۔۔۔ھندوآنی مذھب ءِ تھا ھم شیطان ءُ بدیں روحانی تصور وڑی ناں وڑی گندگ بیت۔ بلے نزوریں وڑی ءَ۔۔۔۔۔۔۔۔۔۔۔۔۔۔

بلے اگاں پہ راستی بِچاریے ماں دُنیا ءَ اینکہ جنگ ءُ بجنگ ءُ کُشت ءُ کوش خدا ءُ مذھبانی نام ءَ کنگ بیتگ، بزگیں شیطان ءِ نام ءَ کنگ نہ بیتگ۔ شیطان ءِ نام وسرا بدنام اِنت۔ اے نوکیں سائنسی دور ءَ ھم ماں خدا ءِ نام ءَ جوڑ بیتگیں مُلک پاکستان ءَ خدا ءِ نام ءِ سرا بزگیں راجانی کُشت ءُ کوش برجاہ اِنت۔۔۔شیطان کدی کدی کہ لاچار بیت وت ءَ بنی آدم ءِ دروشم ءَ ھم پیشداریت ۔گُشنت کہ ھندوستان ءَ صوفی ءَ شیطان دیستگ، آ گیابان ءَ درچکے ءِ بُن ءَ نِشتگ ءُ باز گریوگ ءُ ھیسکارگ ءَ بیتگ۔ آئی ءَ جُست کُتگ کہ تو کئے ءُ چیا گریوگ ءَ یے؟ گُڑا شیطان ءَ درائینتگ کہ من بزگیں شیطاناں ءُ من پمیشا گریواں کہ پاکستانی ملایاں منی کار وتی دست ءَ زُرتگ ءُ من بے روزگار آں۔۔۔۔۔

دُنیا ءِ دو مذھب چر اے خدا ءُ شیطان ءِ جنگ ءُ بجنگانی شوپچ ءَ رَکّ اِتگ اَنت۔ یکے بدھ ازم(BUDHISM) ءُ دومی شنٹوازم(SHINTOISM)۔۔۔۔۔۔۔ بدھ ازم ءِ ردا مذھب ءُ نیکراھی ءِ گُڈی منزل اِش اِنت کہ بنی آدم چہ ”ھست”(Existence) ءَ در کئیت ءُ عدم وجود (Non-existence) یا ”نروان” ءَ سر بیت۔۔بدھ ازم ءِ ردا مذھب ءِ مول ءُ مراد بس ھمیش اِنت کہ بنی آدم چہ زند ءِ مارشتانی مان گیشّاں بہ رک ایت ءُ پہ مشکل ءُ تکانسری ءُ دومی زنداں آجو بہ بیت کہ آ ایشی ءَ ”نروان” گُشنت۔۔۔بدھ مت ءِ لیکہ ءِ ردا خدا ءُ شیطان نیست۔ چار بنکی رھبند اَنت کہ ایشانی  زانگ ءُ فھمگ ءَ بنی آدم ءَ نیستی ”نروان” رسیت۔۔۔۔

1۔ زندگی مشکلانی نام اِنت

2۔ مشکلانی سوب نفسی واھشت اَنت۔

3۔ نفسی واھشتاں ایرجیگ بہ کن یے تہ مشکل ھتم بنت۔

4۔ نفسی واھشتانی ولگوج کنگ ءَ بنی آدم ءَ ھشت رھبندانی سرا رؤگ لوٹیت۔

1۔راستیں واھشت(نفسی واھگانی ولگوج کنگ، یا اہنسا 2۔ راست گُشی۔ 3۔ راست روی 4۔ ھلاریں روزیگ 5۔ ایمنی 6۔ نیک نیتی 7۔ راست بازی 8۔ حقیقی رھبند ءِ سرا رؤگ (Right Ecstasy)۔۔۔۔۔۔

مڑاھداریں جاپانیانی دومی مذھب شنتوازم( Shintoism) ءِ تھا ھم چوشیں عبرانی ءُ عیسائی ءُ مسلمانانی خدائی ءُ شیطانی تصور گواہ نہ کنت۔ پمیشا جاپانی ھم چوشیں خدا ءُ شیطانی جنگ ءُ چوپانی شوپچاں چہ رکّ اِتگ اَنت۔ دُنیا ءِ رسم ءُ دودانی ردا جاپانی زبان ءَ پہ خدا ءِ بزانت ءَ لبز ”کامی” (道) کارمرز بیت۔ بلے پہ راستی بچاریے ماں شنٹو مذھبی لٹریچر ءِ تھا اے لبز ءِ اصلی بزانت خدا نہ اِنت۔ دومی بزانت ءَ ”کامی” ءِ لبز روحانی بزانت ءَ کارمرز بیت۔ بلے پہ جاپانیاں اے روحانی بزانت اے نہ اِنت کہ عبرانی ، عیسائی ءُ مسلمانانی کتابانی تھا است اِنت۔ پہ جاپانیاں اے بزانت گوں جاپان ءِ گُلزمین ءِ ابرمی راستیاں سیادی داریت۔۔۔پہ جاپانیاں جاپان ءِ سرزمین ءِ ابرمی راستی کہ جاپان ءِ گُلزمین بہ بیت کہ آئی ءِ دِلبند ءَ مِکّیں کوہ ءُ اگار ءُ رُستگیں درچک ءُ دار ءُ کؤر ءُ دریا، اے درست یک زندگیں ارواھی ءِ خُدابند اَنت۔ پمیشا پہ جاپانی مھلوک ءَ چہ جاپان ءِ گُلزمین ءَ سیادی داروکیں کُل چیز مقدس اَنت ءُ ”کامی” اَنت۔ پمیشا شنٹو مذھب ءِ منوگریں جاپانی وتی گُلزمین ءِ ءُ گلزمین ءَ سیادی داروکیں ابرم ءِ سجدہ ءَ کن اَنت ءُ پہ جاپانیاں لبز ء ”کامی” ءِ تصور ایش نہ اِنت کہ یہودی، عیسائی ءُ مسلمانی تصور اِنت۔۔ ادا چہ جاپانی خدا ءُ شیطانانی جنگ ءُ بجنگانی کزا ءَ چُٹّ اِتگ اَنت۔۔۔