ھالتاک ”توار” ءَ شِنگ بیتگیں واجہ غنی پھوال ءِ نبشتانکے ءِ سکین ءَ لھتے گپ نبشتہ کنگ لوٹاں، درمیانہ طبقہ ءِ لیڈرانی بابت ءَ بازیں راستی کہ مرچی ءَ چہ بیست سال پیش واجہ شئے رگام ءَ دیم ءَ آؤرتگ اَنت۔ چر آھانی وانگ ءَ ھم مردم بازیں پنجابی پندل ءُ راستیاں گوں دوچار کپیت۔ واجہ پھوال ءَ ھم بازیں راستی دیم ءَ آؤرتگ اَنت۔ دگرا نہ زاناں منی جند بازیناں سرپد نہ بوتگ کہ سرکاری دانشورانی تھا کئے ءُ کئے گون بوتگ اَنت کہ آھاں اینٹی سردار ازم ءِ نعرہ ورناھانی زبان ءَ داتگ۔۔۔۔۔۔۔۔۔چوناھا اے ملایانی مُلک ءَ پہ بلوچ ءِ غلام دارگ ءُ بلوچ ءِ مال ءُ مڈیانی آوار جنگ ءَ ادا بازیں لِٹک ءُ قوم پرستی ءِ نام ءِ سرا بازیں مردم جوڑ کُتگ ءُ آیان ءَ بازیں نعرہ دپ ءَ داتگ۔ اے نعرھانی ھم بازیں رنگ ءُ دروشم بیتگ اَنت۔ بزاں بلوچ راجی فکر ءَ چہ نیشنلزم ءِ سِنچ ءَ کَشّگ ءُ سوشلزم ءِ بے سریں نعرہ ءَ پہ زور مئے سرا مُشگ ھم ھمے دوست دروشمیں غدارانی پندلے بیتگ کہ سرکار ءَ ایشانی زبان ءَ داتگ۔۔۔بلوچ راج ءَ چہ راجی روایتاں در کشگ ءُ بازیں وتگڑیں طبقہانی تھا بھر کنگ، بزاں سردارى طبقہ، میانی طبقہ ءُ جھلی طبقہ، ایش ھم پنجابی ملایانی پندل بیتگ اَنت کہ ایشاں بلوچ ءَ را تقسیم کنگ ءُ آھانی تپاکی ءُ تکوی ءِ ھتم کنگ لوٹ اِتگ۔۔ اگاں ناں بلوچ سماج تاریخ ءَ چوشیں طبقہانی بندیگ نہ بیتگ ءُ ادا سردار پہ قابلیت ءِ بنیاد ءَ گچین کنگ بیتگ۔
آ وھد ءَ ھمے درمیانہ طبقہ ءِ لیڈراں اینٹی سردارازم ءِ نعرہ ھم جَتگ۔۔ گُڑا ما نِشتگ ءُ چاپ جَتگ۔۔۔بلے مرچی ھمے سرداریں ماں بلوچستان ءِ کوھانی تھا گوں غریب ءَ جنگ اِنت ءُ وتی ماتیں زمین ءِ دیمپانی ءَ کنگ اِنت۔ شھید بئیگ اِنت چو اکبر خان ءَ او چو بالاچ ءَ۔۔۔ بلے ھما کامریڈ کہ گُشتے سردار شَر نہ اَنت ۔ مرچی پنجاب ءِ گوما نِشتگ ءُ بلوچ ءِ سودا ءَ جنگ ءَ اَنت۔۔
بلوچ دانشوری گُشیت من ھمے درمیانہ طبقہ ءِ بابت ءَ نواب اکبر خان جُست کُتگ کہ واجہ اے چونیں بلاہ ءُ بِترے تہ نواب صاحب ءَ گُشتگ
”بلوچ ءِ تھا درمیانہ طبقہ نیست۔ ادا بلوچ چاگرد ءِ تھا درست برابر اَنت۔ البت ما بگا ءَ درمیانہ طبقہ ءِ مھلوک گُشت کنیں”
شئے رگام ءَ ھما وھد ءَ گُشت کہ اے بلوچ ءِ دوزواہ نہ اَنت۔ اے پیشہ وریں پیدا گیراں۔ ایشاں ھمے ٹاسک دیگ بیتگ کہ ایشاں اے ٹاسک پنجاب ءَ داتگ کہ تاکہ آ بلوچ ءِ سرداری، مڑاھداری ءُ بُرد ءُ بار ءِ جاہ ءَ دگہ نوکیں طبقہ یے پہ لیڈری ءُ رھشونے ءِ ھاترا تیار بہ کنت۔ شئے رگام ءِ اے راستیں تران مرچی تاریخ ءِ دِلبند ءَ نکش اَنت ءُ کس ایشاں دروگ کُت نہ کنت۔ مرچی ھرکس زاھر اِنت ءُ بقول واجہ شئے رگام نو ھرکس زانت کہ چے درمیانہ طبقہ ءِ لیڈری ءُ چی حق خود ارادیت ءُ چی آزادی؟
مرچی ھما سردار ءُ نواب کہ بلوچ ءِ مڑاھداریں سردار اِنت۔ آ ھم زاھر اِنت کہ چی کنگ اِنت۔ تاریخ ءِ دلبند ءَ ھر چیز چو روچ ءَ سھرا اَنت۔ ھرکس پدر اِنت۔۔۔۔۔ بلے ھما سردار کہ پاکستان ءِ جوڑ کُتگیں سردار اَنت۔۔ آ مرچی گوں درمیانہ طبقہ ءِ لیڈر ءَ ھمکار اَنت۔۔۔۔ چو ثنااللہ زھری ءِ وڑا چو رئیسانی ءِ وڑا۔۔۔۔۔۔ ھو وھد سکیں زوراکی۔۔ وھد ھرکسی اصل دروشم ءَ پیشداریت۔۔ بہ تُرسے چہ وھد ءَ۔۔۔۔۔۔۔۔۔ وھد ءَ اکبر خان ھم پیشداشت ءُ درمیانہ طبقہ ءِ لیڈر رازق ءُ مالک ھم پیشداشتاں کہ ایشانی اصل دروشم چی اِنت............
