پیشگال
..................
”کِسہ ءِ آسر” ءِ سرھال ءَھما ھیالانی آدینک اَنت کہ گوستگیں دہ سالاں من ھمے راستیاں گوں دوچار کپتگاں، اے ھیالانی کتابے دروشم زیرگ ءَ باز وھد درکار اِنت۔ پدا بازیں راستی دگہ بازیں گپچل ھم ودی کن اَنت۔ دِلپروشی ودی بنت۔ بازیں کَسہ اَنت کہ ھر کسی سگ ءُ اوپار ءَ ڈن اَنت۔ بلے راستی اِش اِنت کہ اے کتاب ھما وھد ءَ من گوں ارساں نبشتہ کُتگ کہ شھید واجہ قبر ءَ ایر دیگ بیتگ۔ پمیشا کِسہ دردناکیں ، دہ سالانی راستیانی آدینک اِنت۔ بلے کِسہ ءِ وھد ءَ چہ پیش دیم ءَ آرگ تھلی ودی کنت ءُ منی زند ءَ پُلیت۔ ھما کِسہ کہ دہ سالانی تھا من گوں واجہ ءَ نِند ءُ نیاد کُتگ۔ ھمتران بیتگ اَنت۔ ھما کِسہ کہ واجہ ءِ گالوار ءَ منی گورا است اَنت ءُ کئے بابت ءَ اَنت ءُ چی گُشے؟ پدا ھما تران کہ من گوں واجہ ءَ سِستگ اَنت، سوب چی بیتگ ءُ راستی چی اِنت۔ کجام سبب ءُ اسباب ءُ لاچاری بیتگ اَنت کہ من ءَ گپچلانی آماچ اِش کُتگ۔ ھما جاور ھال چی بیتگ اَنت کہ لھتے پہ زانت ءُ لھتے پہ نازانت ھمے کِسہانی کردار بیتگ۔ زمین سوداگر ءِ رنگ ءُ دروشم چی بیتگ اَنت۔ آئی ءِ بلوچ سیاسی زند ءِ کجام کمزوریاں چہ نپ چِست کُتگ ءُ راج پروشی ءِ کرداں گوں ھوار بیتگ۔۔ ھما راستی اَنت کہ 2004 ءِ آپریشن ءِ وھد ءَ زمین سوداگراں سازتگ اَنت۔۔ این۔پی ءِ راستی چی اِنت ءُ آئی ءِ مند ءِ سیادی داروکیں ورکر ءَ کجام ٹاسک دیگ بیتگ ءُ آ زمین سوداگری ءِ چونیں رپکاں گوں ھوار بیتگ اَنت۔ اے راستیانی چِن ءُ یک جاہ کنگ ءَ بازیں وھد لَگ اِتگ۔ بی۔این۔پی (عوامی) ءِ سوداگرانی ھما آدینک ھم کتاب ءِ بھر اَنت کہ شھید واجہ ءِ زندانی ءِ وھد ءَ من گوں آھاں دوچار کپتگ اَنت۔ ھما راستی کہ صوبائی وزیر گوں سئے مردم ءَ گوں من منی میتگ ءَ دوچار کپت ءُ من ءَ سارتیں گاڑی ءِ تھا سوار کُتے گُشتے کہ دان یازدہ تاریخ ءَ ترا آئی۔ایس۔آئی ءِ ”میجر برکی” ءَ دوچار کپگی اِنت۔ اگاں ناں رندا وتی ذمہ وار تئی جِند بیت ءُ رندا تئی مردم مئے گورا میاینت ءُ مارا مہ گُشاں۔۔ من گُشت ”واجہ دنیگہ من ءَ اے کار کنگ ءِ ضرورت محسوس نہ بیتگ، اگاں من لوٹاں گُڑا تئی گُشگ ءِ ضرورت نہ اِنت۔ بلے زمین ءِ سوداگری منی وسی گپے نہ اِنت”۔۔ ھمیش ءُ ھمے وزیر ءِ برات ءُ این۔پی ءِ کاردارانی اسل آدینک اِنت کہ کتاب ءِ بھر اَنت۔ ھمے تھلیاں کہ من گوں ایشاں دوچار کپتگ اَنت ءُ ایشانی دیم ءَ آیگ ءَ ھرکس وتی اصل دروشم ءَ گِندیت ءُ این۔پی ءُ بی۔این۔پی ءِ کُشتگیں لیڈر ءِ سرا کس ھم واہ ءُ کوکار ھم نہ اَنت۔۔ چیاکہ اے کتاب راستیانی آدینکے ءُ گوں دِل ءِ ھوناں نبشتہ کنگ بیتگ ءُ شھیدیں راج پُل ءِ سکین ھم ھوار اَنت ۔۔

اے سرھال ءَ رد ءُ بند داتگیں ھیال بیت کنت کہ گوں سرھال ءَ دپ مہ ور اَنت۔ کِسہ چہ وتی رد ءُ بنداں در کاینت۔ بلے ”کِسہ ءِ آسر” ءَ ھما کِسہ اَنت کہ 2004 ءَ تاں شھید واجہ ءِ قبر ءِ ایر دیگ ءِ وھد ءَ منی دیم ءَ گوستگ اَنت۔ کِسہ ءِ یک دری 2004 ءَ تاں شھید ڈاکٹر خالد ءُ دِلجان  ءِ مرگ ءَ دو ماہ پیش  آسر بیت ، دومی تاں ھمدا بندات بیت ءُ تاں شھید واجہ ءِ مرگ ءَ آسر بیت۔
اے ھشتیں سالاں ندکار گوں کجام راستیاں دوچار کپتگ۔ چونیں چونیں آدینک دیم ءَ گوستگ اَنت۔ کیا چی کُتگ ءُ دو رنگیں سیاست ءِ کردار کئے بیتگ۔ دو رنگیں سیاسی ”تُرم خانانی” کرداں چہ چونیں گپچلاں ردوم زُرتگ؟ سیاسی ناپُختگی ءِ آسر چی درآتکگ؟ افضل دلبر ءِ کِسہ چی اِنت؟ ڈاکٹر خالد ءِ کوش ءِ پژگرد ءَ چونیں رنگ ءُ دروشم دیم ءَ اَتکگ اَنت۔ غیر مستقل مزاجیں سیاسی کردارانی اسل دروشم چی بیتگ؟ شھید واجہ ءِ زندان ءِ وھد ءَ دُشمن سیاسی بد اعتمادی ءِ پیدا کنگ ءَ چون سوب مند بیتگ۔ مرچیگیں سیاسی پُرشت ءُ پروش ءِ بُن شون چی اِنت ؟ چہ کئے ءُ کجام کرداں بندات بیتگ ؟ غداری ءِ سرٹیفیکٹ دیگ ءِ راستی چی اِنت ءُ بن شون چہ کجا سر بیت ؟ ما پرچا ھرکسی سرا سِتک دار ایں ءُ دومی نیمگ ءَ دوست ءَ ھم ڈوباریں، یک شری ءَ ما مردم ءَ آسمان ءَ سر کنیں ءُ دومی نیمگ ءَ اگاں کسے ءِ یک عملے مئے تب ءَ مہ کپیت تہ ما آئی ءِ غدار گُشگ ءَ ھم چَک ءُ پد نہ بئیں۔ دُشمن ءَ راجی تکانی کجام کمزوریاں چہ نپ چِست کُتگ ءُ مئے تھا ھمے سِنچ ردوم داتگ کہ ما وتی دوست ءُ دَشمن ءِ پجار ءَ نا آشنا ایں۔ مئے تھا چیا ستک پُرشت ءُ پروش ءِ آماچ کنگ بیتگ۔ ما چیا پُرشت ءُ پروش ءِ آماچ بیتگ اِنت۔ تب نا آشانئیں باگپان ءِ نادلگوشیانی سوب ءَ لگتمال بیتگیں پلانی راستی چی اِنت۔ ھمے سرھالاں کہ منی دہ سالئیں زند ءِ ھمراہ اَنت۔ مارا ٹوھیننت۔ ما اگاں دوبر اے تکانی سرا چار ءُ تپاس مہ کنیں تہ تاوان مارا رسیت۔

سرھال ءَ اے گپ ءِ پدرائی ھم کنگ بیتگ کہ منی معصومیں گُھار پانزدہ سالئیں ”بانُک سعیدہ بلوچ” ءِ چہ نودربرانی گل ءَ در کنگ ءِ سوب کجام ذاتی کینگ بیتگ اَنت کہ آھاں پہ زانت سیاسی رنگ دیگ بیتگ۔ آ کجام سوب بیتگاں کہ گل چہ سیاسی ءُ لیکوی درچاں در اتکگ ءُ ھرکسی ذاتی میراث جوڑ بیتگ اَنت۔ ھرکس ءَ کجام وھد ءَ لوٹ اِتگ ، کسانیں ردیانی سرا باسک در کتگ اَنت۔ بلوچ چاگرد ءُ تب ءَ نا آشنائیں واجہ ءِ راستی چی اِنت؟

اے سرھال ءَ صوبائی وزیر ءِ ھما تران ھم منی ھیالانی آدینک ءِ تھا نکش اَنت کہ ماں کراچی ءَ بالاچ مری ءِ زندگی ءِ وھد ءَ آئی ءَ منی گورا گپ گپ ءِ سرا گُشتگ اَنت۔ اے ھم ھوار اَنت کہ ایشاں وتی نزیکیں سنگتانی گورا چونیں گپ جتگ ءُ نواب اکبر خان ءِ شھادت ءِ وھد ءَ ایشاں وتی دامن ءِ پولنگ اختر مینگل ءِ دامن ءَ مُشگ ءِ جھد کُتگ۔ عوامی سِنچ ءِ رھشون ءَ چونیں گپچل ودی کنگ ءِ جھد کُتگ، ایشاں ھما دو دیمی آدینک شر تر سرپد بیتگاں کہ ھمیشانی سوب ءَ سنگتانی تھا بد اعتمادی ودی بیتگ۔ بلے مرچی گپ ھمائی ءِ سرا اوشتاتگ کہ آ نزور بیتگ ءُ آئی ءَ دوتل ءُ دوپوستی نہ زانتگ۔

سرھال ءِ کسہانی پدا  اگاں پہ راستی بہ جیڑیں، تہ مارا یک گپے زانگ لوٹیت کہ من بلوچیاں، من ءَ راجدپترے است اِنت۔ ناں تھنا من بلوچیاں بلکیں ھما زمین ءَ کہ من نِشتگاں، اے زمین من ءَ چہ نِسبت داریت۔۔۔۔ بزاں بلوچستان۔۔۔منی کِسہ چہ وتگڑیں قحبگانی جوڑینتگیں مُلک ءِ دومی راجانی کِسہ ءَ چہ باز فرق داریت۔ بزاں پنجابی ءِ جند چہ پنچیں کؤراں نِسبت داریت۔ سندھی پمیشا سندھی اَنت کہ سندھ ءَ نِشتگ اَنت۔ بلے ایشاں ایشی ءَ چہ ابئید دگہ راجدپترے بِستار نیست۔ بلے منی کِسہ دگرے ، اے ڈیھ گوں بلوچ ءَ نِسبت داریت، گوں بلوچی ءَ نِسبت داریت، اے زمین ءَ پمیشا بلوچستان گُشنت کہ ادا بلوچ نِشتگ۔ اے زمین گوں بلوچ ءُ بلوچی ءَ نِسبت داریت، پمیشا من بہ باں یا منی ماتیں زبان مزنیں راجدپترے ءِ ھُدابُنداں۔۔۔ من بلوچی بیتگ آں، بلوچی آں ءُ تہ انگت بلوچی باں۔ تُرسگ نہ لوٹیت کہ منی راجدپتر ءَ کس لُڑینت نہ کنت۔ من ءَ کس گار ءُ بیگواہ کُت نہ کنت۔ اے زمین ءِ سِنگانی سرا من وتی راجدپتر گوں دِل ءِ ھوناں نبشتہ کُتگ۔ ھمیش اِنت منی پجار ءُ ھمیش اِنت منی نام ءُ نشان۔۔۔۔

درمیانہ طبقہ ءِ لیڈر گُشیت کہ من وت کُشی کنگ ءَ آں۔ اے جنگ ءَ مارا ھِچ نپ نہ رَسیت۔۔ آ گُشیت کہ بلوچ مِرَگ اِنت۔ بلوچ ءَ وت ءَ بے فائدائیں جنگانی تھا پیڑاتگ۔ اے جنگ ءَ ھچ وڑیں آسر نیست۔ بلے زاناں اے واجہ منی راجدپتر ءَ سرپد ءُ پوہ نہ اِنت۔ من زاناں کدی پہ دِلجمی نِشتگاں؟ من ھر وھد ءُ ھر زمانگ ءَ وتی مات ءِ پھازگ ءَ وتی گھگیریں سر ندر کُتگ اَنت۔ مِڑ اِتگاں۔ بلے من گار ءُ بیگواہ نہ بیتگاں ءُ تہ انگت من مِڑاں۔ من زمین ءِ ھاترا مِراں۔ زبان ءِ ھاترا مِراں۔ بلے وھدیکہ من مہ مِڑاں ۔ ھمے واجہ ءِ گپ ءَ بہ گراں ءُ وت ءَ پاکستانی بہ گُشاں ، گُڑا بزاں کہ من مُرتگاں۔۔۔۔۔۔۔۔۔۔۔

مارا دگہ گپے ھم جیڑگ لوٹیت، منی دُشمن کئے اِنت۔ کئے اِنت کہ منی قومی بنیاداں لُڑینگ لوٹیت۔ منی تیاب ءِ مڈیانی لُٹ ءُ پل ءَ کئے کنگ اِنت؟ منی زمین مات ءِ سودا ءَ کئے جنگ اِنت؟ کئے اِنت منی دُژمن ءَ منی راہ ءُ دراں پیشداریت۔ ھماکہ پاکستان ءِ پارلیمنٹ ءَ نِشتگ اَنت ءُ منی گار ءُ بیگواہ کنگ ءِ پندلاں گوں ھوار اَنت۔ ھو من شر چارتگ کہ آئی۔ایس۔ آئی تپنگ ءَ کئی کوپگاں ایر کنت ءُ من ءَ کُشیت۔ ھو من شر چار ءُ ٹپاس کُتگ کہ تپنگ کئی کوپگاں ایر اِنت۔ آئی۔ایس۔ آئی کئی پُشت ءَ ٹپ اِتگ ءُ منی سرا تیرگواری کنگ اِنت۔۔ گُڑا شما ھم بِزان یے کہ وھدیکہ منی تُپنگ آس بارت تہ ھمائی ءَ لگّ ایت کہ آئی ءِ پُشت ءَ آئی۔ایس۔آئی ٹپ اِتگ۔ نو چیا واہ ءُ کوکار کن یے واجہ۔۔ اے منطقی گپے ءُ بازیں چار ءُ بچار ءَ پد کنگ بیتگ۔۔

نو کئے اِنت کہ اے سرجمیں راستیاں سرگوز کُت کنت۔ بلے استیں وھد ءِ تھا راستی ءِ گوشدارگ ءَ کس تیار بیت نہ کنت۔ پمیشا حقیقت بازیں وھداں رند پدر بیت۔ اے سرھال ڈس اَنت کہ کئے قحبگ ءُ کئے پارسائیں، کردارانی اصل رنگ چی اِنت ءُ چون پیشدارگ ءِ جُھد کنگ بیتگ۔ عوامی سِنچ ءِ واجہ کارانی اصل رنگ چی اِنت۔۔

                                                            شمئے مِنت