Facebook
RSS

قلم، ھون ءِ پاسپان

-
شپچراگ


نبشتہ کارے نیاں، بلے بس یک گپے ءَ دِلجماں کہ قلم راستی ءِ نام اِنت۔ ھما کہ راست اِنت گُشگ لوٹ اِت۔ تُرس ءُ ریا ءُ رو قلم ءِ آواز ءَ گُٹگیر کنت۔ بلے قلم بائد فردانی ستاہ ءُ توصیف ءِ منت ءَ زندگ مہ بیت۔ چیاکہ فرد اگاں مرچی شَر اِنت، باندا ھراب بیت۔ ناکہ قلم ءَ فرد ڈوبارگی اِنت۔ چیاکہ فرد ءَ شَر بیئگ ءِ ھم گُمان اَست۔ مرچی کہ کسے حراب اِنت باندا بیت کنت کہ ھوش بہ کنت ءُ وتی ردیاں بہ ماریت ءُ راہ ءَ تِچک بہ کنت۔ بائیبل ءَ نبشتہ اِنت کہ عیسیٰ گوشیت ” ترا فرد ھراب گُشگی نہ اِنت، بلکیں کِرد ھراب گُشگی اِنت۔ چیاکہ انسان ھراب نہ اِنت۔ بلے آئی ءِ کرد ھراب بیت کن اَنت” او انسان ءِ سرا یک اوستے دارگ لوٹیت کہ آ شَر بیت کنت۔ بلے کرد پدر اَنت ءُ کردانی ھراب گُشگ بد اخلاقی گُشگ نہ بیت ءُ بلکیں راستی ھم ھمیش اِنت۔ چیاکہ چو مہ بیت گُڑا شر ءُ ھراب ءِ فرق نہ گیشیت۔ کس نہ زانت کہ راست چی اِنت ءُ ناراست چی؟۔ زندمان دو راستی ءِ نام اِنت۔ راست ءُ دروگ۔۔ بس ھمے فرق اِنت۔ فرق دارگی اِنت۔ فرق زاھر کنگ لوٹیت کہ کئے راست ءُ کئے دروگ۔۔۔۔۔۔۔۔۔۔۔۔

بلے مردم گُشنت کہ تو سکیں بد تمیزی یے۔ لبزاں گُستاخی فرمایے۔ زاہ ءُ بد کن یے۔ ڈوباریے۔ بے سریں ایراد گِریے۔ مخالفین ءَ ڈوباریے ءُ دوست ءِ تعریف ءَ کن یے۔ پمیشا تو سکیں بد اِخلاقی یے۔ بلے راستی اِش اِنت من کسے ڈوبار اِتگ ءُ ناں کسے بُت جوڑ کُتگ۔ چی دوست ءُ چی دُژمن؟۔ بلے راستیں لبز آدینک اِنت ءُ آدینک ءِ تھا ھرکس وتی اصلیں رنگ ءَ دیست کنت۔۔۔آدینک پیشداریت۔ اگاں کسے وت ءَ ھمینکہ پاک ءُ پلگار پیشدارگ ءِ جُھد ءَ بہ کنت۔ بلے آ لبزانی آدینک ءَ وتی اسلیں کردارانی گِندیت۔ پمیشا من ءَ ناں دوست ءِ ستاہ ءِ ضرورت اِنت ءُ ناں مخالفین ءِ ڈوبارگ ءِ۔۔۔۔قحبگانی مُلک ءِ بابت ءَ منی زبان انگر گواریت ءُ چہ اخلاقی سیمسراں در کئیت۔ چیاکہ اے بنی آدم ءِ ابرمی راستی ئے، شھیدیں راج پُل نیم شپے پاساں ٹوھینیت ءُ گُشیت۔ کجام وڑیں لبزے کہ قحبگیں اسلامی مُلک ءِ بابت ءَ بہ بیت، چوشکہ پاکستان، پارلیمنٹ، پاکستانی عدالت، ایچ،آر،سی،پی یا کجام لبز ءِ سیادی گوں پاکستان ءِ رھبند ءُ قانون ءَ بہ بیت، تہ آ لبز ءِ نبشتہ کنگ ءِ وھد ءَ شھیدیں راج پُل اسمائیل بگٹی، عرفات جان، خیام جان، زبیر جان،عابد سلیم ءُ کسانکیں جیئند جان ءِ ھونانی بوہ کئیت۔۔۔ نو کسے وت بِزانت کہ آ لبزانی نبشتہ کنگ ءِ وھد ءَ قلم ءِ سیاھیانی تھا شھید ءِ ھونانی بوہ تالان بیت۔ گُڑا ھماکہ پاکستان ءِ نظام ءِ تھا بھر زور اَنت ءُ گوں قحبگ ءِ چُکّ ءَ ھور نند اَنت۔ گوں پاکی ملائی سنگتی کن اَنت ءُ شھید ءِ ھونانی غدار نہ اَنت ، گُڑا چی گُشگ بنت؟

کیچ ءِ امام بھیل بہ بیت یا دُزیں برکت، یا سوداگریں محمد علی رند ءِ گروپ۔ ایشاں ھرکس زانت کہ دُز ءُ قحبگ اَنت۔ شفیق ءُ سراج ءَ ھرکس سرپد اِنت کہ ایشاں تُپنگ بڈا کُتگ ءُ بلوچ ءِ نسل کُشی ءَ ھوار اَنت۔ اے سر عام ھمے گپ ءَ جن اَنت کہ ما بلوچ ءَ بیگواہ کنگ لوٹیں۔ ایشانی سیاھیں کِرد پدر اَنت ءُ ھر کس گِندیت کہ چی کنگ ءَ اَنت۔۔۔۔۔ بلے گپ اِش اِنت کہ چہ دُژمن ءَ منافق گیشتر تاوان دنت۔ ھما کہ دیم ءَ بلوچ ءِ دوست اِنت ءُ پُشت ءَ راج ءِ ھُنڈالاں بُرّگ اِنت۔ نیشنلزم ءِ نام ء سرا آھاں بلوچ ھر دور ءَ تاوان داتگ ءُ انگت دیگ لوٹ اَنت۔۔ آھانی بابت ءَ شمئے ھیال چی گُشئے۔۔۔ ابدالیں قاضی گُشیت۔

                             دگہ  لھتے  ھمے   دلار   ءُ      سیاڈی
                              نزوریں  سیاست  ءِ   ژندیں   کھلاڑی
                             کہ نوش ءُ جان کن اَنت بولان ءِ شیراں
                             رو اَنت   سئیل ءَ   نگورپان ءِ  کھیراں
                            چہ  راج  ءَ   پھک  بیھالاں  نہ   زاننت
                            وتی بُن درچک ءِ ھُندالاں  گوجان  اَنت
                            نِھنگ اَنت چم ءُ کیچ اِنت دِل ھڈیسکیت
                            قلم  شرمندہ  اِنت  کہ   چی  بہ  لیکّھیت
                            ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چمشانک بہ دئے