اے قحبگانی مُلک ءِ آمیدگس ءَ باز کوکار ءُ جگا اِنت کہ ماں بلوچستان ءَ بلوچ ورناھانی آوار جنگ ءُ ٹپ ءُ ٹوریں لاشانی چگل دیگ ءَ ایف۔ سی ءِ دست ھوار اِنت۔ چیف جسٹس افتخار چودھری ءَ دانکہ اے گپ ھم جتگ کہ بلوچ ورناھانی آوار جنگ ءَ ایف۔سی ءِ دست ھوار اِنت۔ آ گوشیت کہ چِست بیتگیں ورناھانی ھما وھد ءِ عکس ھم موجود اَنت کہ ایف۔سی آھان ءَ آوار جنگ اِنت۔ چیف جسٹس ءُ دگہ بازیں پاکستانیانی گُشگ ءِ ردا اگاں ٹپ ءُ ٹوریں لاشانی دز کپگ ءِ رد برجاہ بہ بیت تہ آھانی گپانی مطابق ءَ بلوچستان مئے دست ءَ در کئیت۔۔۔دومی نیمگ ءَ چہ اخباری بیاناں بازیں پارلیمانی بلوچانی گپاں ھمے زاھر بیت کہ آھانی دلاں نو پاکستان ءُ آئی ءِ آمیدگس بلوچانی ترانگاں کپتگ ءُ نو بلوچ ءِ جیڑہ گیشوار ءَ کن انت۔۔ بلے راستیں گپ اِش اِنت کہ آمیدگس بہ بیت یا پاکستان ءَ سیادی داروکیں وتگڑیں انسانی حقانی گل، آھاں بلوچانی غم ءَ نہ گیپتگ اَنت۔۔۔ بلکیں آھاں پاکستان ءِ پُرشگ ءِ غم اِنت۔ مرچی کہ انٹر نیشنل تکاں بلوچ ورناھانی بازیں قُربانیاں ھما جیڑہ کہ دیم ءَ اَتکگ۔ بلوچ وتواکی ءِ گپ بیئگ اِنت۔ آئی ءِ ایرموش کنگ ءَ مرچی پاکستان ءِ آمیدگس بہ بیت کہ آ دگہ ادارہ گنوکیاں گیپتگ اَنت۔ دانکہ افتخار چودھری ءَ وت ھمے گپ جتگ کہ اے تھنا بلوچستان ءِ جیڑہ نہ اِنت۔ اے پاکستان ءِ سالمیت ءِ جیڑہ اِنت مرچی دیم ءَ اَتکگ۔۔۔ نو گپ اِش اِنت کہ اے سرجمیں پندل ءُ توجیل کہ بیئگ ءَ اَنت، اے پہ پاکستان ءِ رکّینگ ءَ بیئگ اَنت۔ اگاں اے کار پہ پاکستان ءِ رکینگ ءَ بیئگ ءَ اَنت (اَنچو کہ چیف جسٹس دپ ء وت گُشیت)۔ گُڑا چوشیں عملانی تھا بھر زورگ پاکستان ءِ نیم زندیں تلام ءَ را رکینگ ءِ توجیلانی تھا بھر زیرگ ءِ برابر اِنت ءُ اگاں کجام بلوچ چوشیں ”آل پارٹی کانفرنس ” ءُ پاکی آمیدگسی پندلانی تھا بھر بہ زیریت ءُ گپ ءُ تراناں گوں ھور بہ بیت گُڑا ما ھمے سرپد بئیں کہ آ بلوچ ءِ دُژمن اِنت ءُ پاکستان ءِ نیم زندیں تلام ءَ را رکینگ ءِ جُھد ءَ اِنت(اے کاراں پاکستان ءِ پارلیمنٹ ءِ تھا ھم بھر زیرگ ھوار اِنت، آ تُری کجام پارٹی بہ بیت)۔۔۔سنگتاں من دگہ گپے ادا پدر کنگ لوٹاں کہ ھما مردمانی بابت ءَ کہ چیف جسٹس ءَ گپ دیم ءَ آؤرتگ اَت کہ آھانی عکس منی گورا است اِنت کہ ایف۔سی ءَ آوار جتگ اَنت۔ بلے آھانی لاش دیم ءَ اَتک اَنت۔ نو زانگ بیت کہ چیف جسٹس چنکہ با اختیار اِنت۔ الم پہ پاکستان ءِ رکینگ ءَ آئی ءَ اختیار است۔ بلے بلوچ ءِ کُشت ءُ کوش ءَ آمیدگس بہ بیت کہ کجام ادارہ اے سرجم یک دست اَنت۔۔ بلے دُنیا ءِ دیم ءَ ھمے نشون ءَ دیگ لوٹ اَنت کہ ادا قانون است۔ ما بلوچ ءَ وش کنگ لوٹیں۔۔۔۔۔۔۔۔
مستریں گپ اِش اِنت کہ آمیدگس بہ بیت کہ ملا ءُ عاصمہ، ایشانی تھا کس بلوچ ءِ درد ءَ نہ گیپتگ، بلے پاکستان ءِ نیم زندیں تلام ایشاں وڑی ناں وڑی رکینگ لوٹیت۔۔۔ اے چوش کہ لھتے روچ پیش امریکا ءِ محکمہ خارجہ ءِ نیمگ ءَ ھمے گپ دیم ءَ اَتکگ اَت کہ بلوچستان ءَ انسانی حقانی ھلاپ ورزی بیئگ اِنت۔ دومی سویڈن ءِ پارلیمنٹ ءَ بلوچستان ءَ انسانی حقانی ھلاپ ورزی ءُ بلوچ چُک چینی ءِ سرھال ءَ مراگشے برجم بیتگ اَت۔ تہ پاکستانی قحبگاں ھمے گپانی پژگرد ءَ کوکار ءُ جگا بندات کُت ءُ بلوچ ءِ ترانگ ءَ کپتاں۔ بلے دومی نیمگ ءَ ٹپ ءُ ٹوریں لاشانی رد انگت برجاہ اِنت ءُ بلوچ ءِ گُلزمین ءَ آس یکشلا روک اِنت۔۔۔ نو کئے اِنت کہ اے قحبگی ملک ءِ سرا بھیسہ بہ کنت ءُ پدا وتی پاداں وت تپر بہ جنت۔ اے بلوچ ءِ وش بھتی اِنت کہ بازیں ورناھانی قُربانیانی سوب ءَ بلوچ ءِ جیڑہ میان استمانی تکاں شریں وڑی ءَ دیم ءَ شُتگ۔ دگہ حاصیں گپ اگاں دیم ءَ نیاتکگ ، بلے مرچی بلوچ ءَ وت ءَ دُنیا ءِ دیم ءَ منینتگ کہ من یک قومیاں واجہاں۔ اے جاوراں اگاں کسے پدا گوں پاکستان ءِ رکینگ ءِ کاراں ھوار بہ بیت تہ بزاں کہ آ راج ورناہ ءِ ھونانی غدار اِنت۔ ادا ما پدا چہ ھما واجہاں دزبندی کنیں آ پاکی آمیدگس ءِ سرا ءَ آخری اُمیت ءَ دارنت ءُ دِلمانگ اَنت کہ مئے جیڑہ پاکی پارلیمنٹ ءِ اندر ءَ گیش ءُ گیوار بنت، کہ آ واجہ بائد ھونانی ھیالداری ءَ بہ کن اَنت ءُ وت ءَ پدا گوں پاکستان ءَ مہ پیڑاھاں کہ پشومان بنت۔۔۔۔۔اگاں کسے اینکہ ھونانی رِچگ ءَ پد ھم پاکستان ءِ گما بہ نندیت ءُ گپ ءُ تران ءَ ھور بہ بیت گُڑا بقول ء کچکول علی ایڈوکیٹ آ بلوچ ءِ غدار اِنت۔ بلوچ ءِ رِتکگیں ھونانی غدار اِنت ءُ ماتیں گُلزمین ءِ ھم غدار اِنت۔
