کماش نواب خیر بخش مری گُشیت.
بلوچ ندکار ءَ اے گپ ءِ سرا جیڑگ لوٹیت۔ اے کمیں لبزانی تھا مزنیں فلسفہ ئے چیر اِنت۔ وکالت باز آسانیں کارے ، ایشی ءَ ھرکس ذاتی پسند ءُ ناپسند ءِ گچین ءَ وتی تب ءُ مئیل ءِ مطابق ءَ کُت کنت۔ ھما نیمگ ءَ کہ مردم ءِ ذاتی نپ بندوک اَنت، یا پہ نام کشی ءُ دومی ءِ دیم ءَ وتی بستار ءِ ودّینگ ءَ مردم آئی ءِ وکالت ءَ کنت۔ بلے راستیں فیصلہ دیگ (Judgements) ذات ءَ ابئید گوں راجی اجتماعی نپاں بندوک اِنت۔ باز گران ءُ مُشکلیں کارے۔ پہ اے کار ءَ مردم ءَ وتی ذات نفی کنگی اِنت۔ بازیں مشکلاں گوزگ لوٹیت ءُ دوست ءُ گنگلانی شگان سگگ لوٹ اَنت۔
ندکار ءَ جیڑگ لوٹیت۔۔۔۔چیاکہ ندکار راج ءِ ھما ٹولی اِنت کہ آئی ءِ ھمک گُشتگیں گپ راجدپتر ءِ بھر جوڑ بیت کنت۔۔۔ مرچی ندکار ھما گپ ءَ جنت۔۔ وتی ذاتی پسند ءُ ناپسند ءِ بنیاد ءَ ھما تران ءَ کہ راج ءِ دیم ءَ کاریت۔۔ راج زھگ ءِ سنچ ءِ تھا ھما توم ءَ کہ کِشیت۔۔ گُڑا باندا ھمے رُستگیں درچک ءِ بَر آئی ءِ جند ءَ ھم چشگ لوٹاں۔۔۔۔۔۔
ندکار راجی زند ءِ سماروک اِنت۔ پہ راجی زند ءَ یک ”ججے” یے بستار ءَ داریت۔ ندکار راھبند جوڑ کنت ءُ رھشون پہ چار ءُ بچار ھما رھبند ءِ سرا گام جنگ ءِ سکین ءَ دنت ۔ جوانیں ندکار ءِ سپت ھمیش اِنت کہ آ پہ بے ریائی ھرکسے ردیاں بہ ڈس ایت۔۔۔ پہ راستی دوست ءِ ردیاں زاھر بہ کنت۔ پہ مِھر ءُ دلیل برگشتگ چہ راجی لیکہاں سر سستگیں مردم ءِ راجی درچ ءَ آرگ ءِ جُھد ءَ بہ کنت۔۔ آئی ءَ اے ھم ڈسگ لوٹیت کہ راجی رھشون ءِ کجام کِرد استمانی ءُ میان استمانی تکاں راج ءَ تاوان بار کنگ ءَ اَنت۔۔۔ آئی ءَ اے نشونداری ھم کنگی اِنت کہ راجی رھشون ءِ دست ءَ پہ نہ زانتکاری سرزد بیتگیں کجام کرد ءُ عملانی سوب ءَ دُشمن نپ چِست کُت کنت۔۔۔۔۔ اگاں ندکار بُرز ءِ گُشتگیں گپانی کیلو ءَ در بئیت ءُ پہ نام کشگ ءِ ھاترا گلا ءُ ستاہ ءِ لوٹوک بہ بیت۔۔ ذاتی پسند ءُ ناپسند ءِ بنیاد ءَ پہ نپ ءُ نام کشی ءِ ھاترا،یا پہ کینگ ریا ءُ رو بہ کنت ءُ دوست ءِ تعریف ءَ زمین ءُ آزماناں یک بہ کنت ءُ آئی ءِ ھمک جوان ءُ ردیں کِردانی پلہ مرزی ءَ بہ کنت ءُ مخالفین ءِ کِرداں سرا ابئید آئی ءِ ذات ءِ سرا ایراد بہ گیپت تہ بزاں آ دوست ءَ گوں مخالفین ءَ ھوار تھاریں چاتی ءِ نیمگ ءَ رھادگی یے سکین ءَ دیگ اِنت۔۔۔ گُڑا رند ءَ آئی ءِ سیاھگ ھچ کسے ھچ دردانی دوا بیت نہ کن اَنت ءُ ناکہ آ ججے بیت کنت۔ آیوکیں وھد ھم آئی ءَ معاف نہ کنت۔۔ چیاکہ وھد ھما راستیں جج اِنت کہ ھرکسے فیصلہ ءَ وت کنت ءُ وھد ءِ بے ریائیں فیصلہ ھرکسے دل ءَ چو تیر ءَ سُمب اَنت ءُ گوز اَنت۔۔۔۔۔۔۔۔۔گپ کہ دوست ءِ پلہ مرزی ئیگ اِنت ءُ آئی ءِ ھر ردیانی چیر دیگ ءِ بئیت گُڑا فارسی زبان ءِ ٹوھیں ندکار شیخ سعدی گُشیت۔
”منی دوست ھما اِنت کہ منی ردیاں بہ ڈس اِیت ءُ منی دُشمن ھما اِنت کہ منی ردیاں چیر بِدنت ءُ منی ھر کرد ءَ جوان بہ گُشیت ءُ منی تعریف ءَ بہ کنت”
بلوچ ”ندکار” وت ءَ ھمے شاھیم ءَ بہ تور اَنت، باریں آ چِنکس آپ ءَ اَنت۔ باریں آھانی قلم ذاتی پسند ءُ ناپسند ءِ بنیاد ءَ کَست ءُ کینگ ردوم دیگ ءَ نہ اِنت؟
