ایٹمی اُرش  ءِ بیمناکیں تباھیانی بابت ءَ ھرکس ءَ اِش کُتگ۔ بلے لس مھلوک ءِ تھا اے گپ ءَ باز کم مردم سرپد ءُ زانتکار اَنت کہ ھما ھند ءُ دمگ ءَ کہ ایٹمی پلانٹ جنگ بوتگ اَنت یا ھما ھند ءَ کہ اے بمب چکاسگ بیت ، ھما آبگوات ءُ ھما جاہ ءَ ایٹمی اثرات یا بہ گُش ایٹمی تابکاری (Atomic Radiation) داں کرناں ماننت۔ اے اثرات ھما ھند ءُ دمگ ءِ انسان بہ بیت یا کجام وڑیں سھداری ءَ وڑ وڑیں بیماریانی آماچ کن اَنت۔ بزاں ھما زمین ءِ دِلبند ءَ کہ ایٹمی تابکاری ءِ اثرات شِنگ بہ بنت تہ اودا زندگی نہ بیتگیں گپے ءُ اے اثراتانی گِر ءُ دار ھم بیت نہ کنت۔ پمیشا دردناکیں کِسہ ھما راج ءِ بیت کہ آئی ءِ زمین ءِ دِلبند ءَ ھمے بمب چکاسگ بیتگ یا اودا ایٹمی تابکاری ءِ اثرات است انت۔

اے ردا دُنیا ءِ اولی بد بھتیں راج امن ءِ پیغمبر حضرت گوتم ءِ  منوگرانی سرزمین ءِ جاھنند جاپانی اِتاں کہ آھانی زمین ءِ دِلبند 1945 ءَ عھد ءِ شیطان ءَ گوں ایٹم بمباں تراکینت۔ زانتکار گُشنت ماں جاپان ءَ ایٹم بمب ءِ اُرش ءَ مُرتگیں مردمانی کچ یک لکھ ءُ چِل ھزار بیتگ۔۔ بلے 2006 ءَ امریکا ءِ ”میڈیکل جرنل” ءَ شنگ بیتگیں پٹ ءُ پولی ردا ھما مردم کہ ایٹمی ارش ءَ چہ رکّ اِتگ اَنت ءُ آ وھد ءَ آھانی عمر کسان بوتگ ، بلے 60 سال ءَ چہ رند آھانی بیماریانی آماچ بیئگ ءِ گمان ءِ تھا گیشی اَتکگ۔ بزاں وھد ءِ ھمراھی ءَ ایٹمی تابکاری ءِ اثرات گیش بیان اَنت۔ ارش ءَ رکّ اِتگیں مردمانی تھا ”تھائی رائیڈ” ءُ ”کینسر” ءِ نادراھی ءِ آماچ بیئگ ءِ گمان زاھر کنگ بیتگ۔ پٹ ءُ پول ءِ ردا 2000 ءَ تاں 3003 ءَ ھپتاد سالی  3185 مردمانی رپورٹ دیم ءَ اَتکگ کہ آ ایٹمی تابکای ءِ سوب ءَ ”تھائی رائیڈ” ءُ ”کینسر” ءِ نادراھی ءِ آماچ بیتگ اَنت۔ پٹ ءُ پول ءِ ردا ایٹمی تراک ءِ یا ارش ءِ وھد ءَ ھما کسانی کہ عمر بیست سال ءَ کم بہ بیت تہ آ بازیں نادراھیانی آماچ بیت کن اَنت۔ برٹش ءِ کینسر ءِ بابت ءَ پٹ ءُ پول کنوکیں کارگسے ءِ ردا ھمے نشون رَستگ کہ ”تھائی رائیڈ” گمان ھمک Atomic Radiation زدگیں ھند ءَ بیت کنت۔۔۔۔

گُشنت کہ ماں جاپان ءَ 12 مارچ 2011 ءِ اَتکگیں سونامی ءَ پُرشتگیں ایٹمی پلانٹ ءِ ایٹمی تابکاریانی سوب ءَ دنیگہ 300 مردم مَرگ ءِ آماچ بیتگ ءُ زانتکارانی گُشگ ءِ ردا اثر مندانی کچ گیش ھم بیت کنت۔ فوکو شیما ءِ پلانٹ ءِ اثرمند بیئگ ءِ سوب ءَ لکھاں مردماں چہ وتی گِساں لَڈ ءُ بوج کُتگ ءُ دگہ ھنداں برگ ءُ سر کنگ بیتگ اَنت۔ ایٹمی تابکاری ءِ تُرس ءَ ھپتگ ءِ تھا لکھاں مردم ڈس اِتگیں وھد ءَ وتی ڈیوٹی آں ھم سر بیت نہ کن اَنت۔ جاپان ءَ ایٹمی تابکاری ءَ پد یورپ ءَ ھم ایٹمی تابکاری ءِ گمان زاھر کنگ بیتگ اَت ۔ مارچ 2011 ءَ یورپ ءَ جاپانی وردنی چیزانی ایمرجنسی ٹیسٹ ھم کنگ بیتگ اَت ، چیاکہ یورپی ھم ھمے تُرس ءَ گور جتگ اِت اَنت کہ ھمے اثرات مئے ھنداں سر مہ بنت۔۔۔۔جاپان ءَ ایٹمی تابکاری ءِ سوب ءَ اے اثر لاپ پُریں ءُ چِلگ بیتگیں زالبولانی گور ءِ شیرانی تھا ھم گِندگ بیتگ اَت۔ جاپانی سرکاری رپورٹ ءِ ردا ماں جاپان ءَ ایٹمی تابکاری ءِ دارگ ءِ ھاترا سرکار ءَ سالے دو ارب ھشتاد کروڑ ڈالر ءِ ھرچ کنگ ءِ جار پِرینتگ۔

لھتے وھد پیش ھندوستان ءِ شھر دھلی ءَ پنچ مردمانی تھا ایٹمی تابکاری Atomic Radiation ءَ اثر مند بیئگ ءِ وئیل دیم ءَ اَتکگ اَت۔ پٹ ءُ پول ءَ چہ اودا 9 ھنداں ایٹمی تابکاری ءِ گمان زاھر کنگ بیتگ اَت۔ زانتکارانی ردا ایٹمی تابکاری ءِ سوب یک بیمناکیں موادے ”آئسوٹوپ کوبالٹ” بیتگ کہ رندا یک کباڑی یے دُکانے ءَ دز کپتگ کہ اے چیز ایٹمی الیکٹرک گِسے ءَ دُزی بیتگ ءُ کباڑی ءَ بھا کنگ بیتگ۔ کباڑی نادراھجاہ ءَ سر کنگ بیتگ ءُ ٹیسٹ ءَ چہ ھمے نشوندھی رستگ کہ کباڑی ایٹمی تابکاری ءِ آماچ بیتگ ءُ پولیس ءَ اے جُرم ءَ بازیں کس دزگیر کُتگ اَنت ءُ ھند ءِ مردم کمے وھد ءَ دگہ ھنداں برگ ءُ نندارینگ بیتگ اَنت۔۔۔۔۔

بلوچستان ءُ ایٹمی تابکاری۔۔۔۔۔۔۔

مرچیگیں نواز شریف کہ وت ءَ بلوچ راج ءِ بلاھیں غمواری گُشیت۔ بلے ھمے مرد ءِ حاکمی ءِ دور ءَ بلوچ دُنیا ءِ ھما بد بھتیں راجاں گوں ھوار کنگ بوت کہ آھانی دِلبند ءِ سرا ایٹم بمب تراکینگ بیتگ اَت۔ 28 مئی 1998 ءِ نیم روچ ءِ 3:20 پہ بلوچ راج ءَ ھما شومیں ساھت اَت کہ ھمے ساھت ءَ بلوچ ءِ ایردستی وتی جاہ ءَ بلوچ ایٹم زدگیں راجانی کِسّہ ءِ کرداری جوڑ بوت۔ ھرسال ءِ اے ساھت بیت کنت پہ لاشعوریں بلوچ ءَ چو ھمک روچئیں ساھتے بہ بیت۔ بلے راستی اِش اِنت کہ اے ھما شومیں ساھت اَت کہ تاں اے سر زمین ءَ بلوچ زندگ اِنت وت ءَ چہ اے بد بھتیں راجانی کِسّہ ءِ کردار ءَ در کَشّ اِت نہ کنت ءُ پاکستان ءِ اسلامی بمب ءِ نعرہ جنوکیں ملایانی دامن ءَ اے ھما داغ اِنت کہ ایشی ءِ تھا تاں کرناں مظلوم ءِ ھونانی بوہ ھوار بیت ءُ ملا ءُ میر ءُ سرداراں ھمک پاس ناولیت کہ واجہ تئی بدیں کردانی آس ءَ من تاں کرناں سُچاں ءُ پیلوشاں۔۔۔۔۔۔۔۔۔