سفر جاری اَت۔ سنگت جُنزان اِتاں۔ ھمراہ گیش بیّان اِتنت۔کم بیان اِتنت۔ سِدان اِتنت۔ روان اِتنت۔ مِران اِتنت۔ پُرشان اِتنت۔ بلے سفر جاری دارگی اَت۔ آ پہ تمردی راہ گِپتگ اَت۔ سفر جنان اَت۔ آئی ءِ لیکہ بس ھمیش اَت کہ رھبند جُتا بیت کن اَنت ۔ کِشک بدل بیت کن اَنت۔ بلے بس پہ مِنزل ءَ سفر جاری دارگی اِنت۔ پرآئی ءَ بنکی مول کِشک نہ اَت۔ بلکیں منزل اَت۔ آئی ءَ منزل ءَ سر بیئگی اَت۔ پمیشا آئی ءَ مدام ھمے گپ جتگ اَت کہ وھد ءِ لوٹانی پدا کِشک بدل کنگ کپیت۔ رھبند جتا بیت کن اَنت۔۔ بلے منزل جتا بیت نہ کن اَنت۔ منزل یک ءُ بلوچ یک۔۔۔۔۔۔ پمیشا اے زند ءِ سفر ءَ آئی ءَ گِلگ نہ کُت۔ پر آئی ءَ کل یکیں راہ ءِ مسافر اتنت ۔ دُراہ سنگت اِتنت۔ بلے اے انسان ءِ ابرمی راستی ئے تب یک بوت نہ کن اَنت۔۔۔۔ پمیشا کِشک ءَ انسان وتی تب ءِ ردا وا گچین کُت کنت۔ بلے منزل مقصد اِنت ءُ بدل بیت نہ کنت۔۔۔ آ راھی اَت۔ آئی ءَ دوستانی تژن ءُ پیگور ءُ دُشمن ءِ زوراکی برداشت کنان کُتاں ، ھر گپ ءِ سرا بس آئی ءَ کند اِتگ اَت۔۔ تژن ءُ پیگور ءُ زلم ءُ زوراکیاں بابت ءَ آئی ءَ گُشئے وت ءَ غیر سنجیدہ کُتگ اَت۔ بلے آئی ءِ چماں چہ ھمے پدر اَت کہ آئی ءَ وت ءَ اے وڑ پمیشا کُتگ کہ دوست ءُ دُژمن آئی ءِ ھما درد ءُ کولنجاں پوہ مہ بنت کہ آ اندریں ٹپ دُژمن آئی ءَ جتگ اِتنت۔ بلے پہ راستی آ سک باز سنجیدہ اَت ءُ آئی ءِ چماں چہ ھمے پدر اَت کہ آئی ءِ دل ءَ چونیں ٹپ برداشت کُتگ ءُ آئی ءِ اندر چِنکہ پُرسیگ اِنت۔۔۔ بلے آ کندگ ءَ اَت۔ دگرا سکین دیگ ءَ اَت کہ منزل ءَ سر بیئگی اِنت۔ جُنزگی اِنت ءُ ھچ دل ءَ نیارگی اِنت۔۔۔۔۔۔۔
پدا آ تھنا بوت۔ سنگت گِسر کپت اَنت۔ جُتا بوت اَنت۔ ڈیھ ءِ ڈیناں شُت اَنت۔ بلے آئی ءَ گُشتگ اَت۔ ھمراہ ھمینکہ کم بہ بنت۔ جنگ بہ بنت۔ پَچ گِرگ بہ بنت۔ بلے سفر جاری دارگی اِنت کہ بلوچ ءِ مرگ ءُ زِند گوں ھمے سفر ءَ بندوک اِنت۔ سفر مہ بیت تہ بلوچ مِریت۔۔۔۔۔۔۔ آئی ءَ سفر جاری داشتگ ءُ تہ انگت جُنزان اِنت ۔۔۔بلے آئی ءِ یکیں گپ من ءَ گیر آیگ اِنت کہ
”کِشک جُتا بہ بنت۔ ھمراہ کم بہ بنت۔ بلے منزل ءِ سر بیئگ ءَ سفر جاری دارگی اِنت”
پدا آئی ءَ گُشتگ اَت۔
پدا آئی ءَ گُشتگ اَت۔
” بلوچ دُنیا ءِ کجام کُنڈ ءَ بہ بیت۔ آ کجام کِشک ءَ گام جنان بہ بیت۔ آئی ءِ سلاہ قلم بہ بیت کہ تُپنگ ، بلے پہ یکیں منزل ءِ سر بیئگ ءَ آئی ءَ سفر جاری دارگی اِنت”
من دیست کہ آئی ءِ سفر تہ انگت جاری اِنت ءُ آ روان اِنت ءُ ھچ وڑیں اڑانداں مان نیارگ اِنت۔
